Baluzayisu

◼ Mikanda ya kukabula na Septembri: Inki Biblia Kelongaka Mpenza? Beno sala kikesa sambu na kuyantika kulonguka Biblia ti bantu na mbala ya ntete ya beno mekutana ti bo. Kana bawi kele dezia ti mukanda yai, beno monisa na bunkufi mutindu beto kelongukaka Biblia ti bantu sambu na kusonga bo mutindu bo lenda bakila yo mambote. Oktobri: Nzozulu ya Nkengi mpi Réveillez-vous ! Kana muntu kumonisa mpusa, songa mpi tadila ti yandi trakiti Aimeriez-vous en savoir plus sur la Bible ? ti lukanu ya kuyantika kulonguka Biblia ti yandi. Novembri: Longuka na Longi ya Nene. Kana bantu yango metuba nde bo ke na bana ve, pesa bo kamukanda Kangula Meso!

◼ Sambu Septembri tavanda ti bawikendi tanu, yo tavanda ngonda ya mbote sambu na kusala kisalu ya kimupasudi-nzila nsadisi.

◼ Mabundu fwete yantika kulomba bavolime reliye ya Nzozulu ya Nkengi ti ya Réveillez-vous ! ya 2007, Watchtower Library​—⁠2007, mpi CD-ROM na demande na bo ya mikanda yina talanda. Lisiti ya kemonisa bandinga yina ba volime reliye yai kele tabasika na “Luzayisu na Mabundu Yonso,” yina beto ketindaka konso ngonda. Beno vila ve nde bo keyidikaka CD-ROM Watchtower Library​—⁠2007 kaka sambu na bampangi ya mebakaka mbotika mpi bo lenda zwa yo kaka na nzila ya dibundu.

◼ Beto tatadila video Les Témoins de Jéhovah : Organisés pour prêcher la bonne nouvelle na lukutakanu ya kisalu ya Desembri. Kana beno kele na mfunu na yo, dibundu fwete sala komande na yo kukonda kusukinina.

◼ Diskure ya sipesiali ya bantu yonso sambu na nsungi ya Lusungiminu na mvu 2008 tasalama na mposo ya Marsi 31, 2008. Beto tazabisa beno ntu-dyambu ya diskure yango na nima. Mabundu yina tayamba nkengi ya nzyunga to tavanda ti lukutakanu ya nzyunga to ya sipesiali na mposo yina, tasala diskure ya sipesiali na mposo yina talanda. Ata dibundu mosi ve fwete sala diskure ya sipesiali na ntwala ya mposo ya Marsi 31.

◼ Nkengi-ntwadisi to muntu yankaka yina yandi tapona fwete sala emvantere ya konti ya dibundu sambu na ngonda ya Yuni, Yuli, ti Augusti. Kana bo mesala yo imene, bo fwete zabisa yo na dibundu ntangu bo tasala rapore ya konti yina kelanda.​—⁠Tala Bantuma Sambu na Konti ya Mabundu (S-27).