Bamvutu na Bangyufula na Beno
◼ Keti “mpika ya kwikama mpi ya mayele” (NW) kendimaka bimvuka ya Bambangi yina kevukanaka bo mosi sambu na kusala bansosa na Masonuku to na kupesana bangindu?—Mat. 24:45, 47.
Ve, mpika kendimaka yo ve. Ata mpidina, na bisika mingi na ntoto, bampangi fyoti ya organizasio na beto mesalaka bimvuka sambu na kusala bansosa na bo mosi na masolo ya Biblia. Bankaka mesalaka bimvuka na bo mosi sambu na kulonguka Kiebreo mpi Kigreki ya bo sonikilaka Biblia sambu na kuzikisa bukyeleka ya Traduction du monde nouveau. Bankaka dyaka kesalaka bansosa na mambu ya siansi yina kewakana ti Biblia. Bo mesalaka basite ya Internet sambu na kupesana mabanza ti bangindu. Bo mesalaka mpi balukutakanu na bo mosi mpi mebasisaka mikanda sambu na kumonisa mambu ya bo zwaka na bansosa na bo, mpi sambu na kuyika na mambu yina beto kelongukaka na balukutakanu ya Bukristu mpi na mikanda na beto.
Na ntoto ya mvimba, bantu ya Yehowa kezwaka malongi ya kimpeve ti kikesa na balukutakanu ya dibundu, ya sipesiali to ya nzyunga, na balukutakanu ya nene, mpi na nzila ya mikanda yina organizasio kebasisaka. Na nsi ya lutwadisu ya mpeve santu na yandi mpi ya Ndinga na yandi ya kyeleka, Yehowa kepesaka mambu yina kele mfunu sambu nde bantu na yandi yonso kuvanda “mpenza na mabanza mosi ti na ngindu mosi mpi,” ebuna kuvanda na “lukwikilu mosi ya ngolo.” (1 Kor. 1:10; Kol. 2:6, 7) Ya kyeleka, beto kepesa Yehowa ntonda sambu na bangidika ya kimpeve ya yandi kebaka na bilumbu yai ya nsuka. Yo yina, “mpika ya kwikama mpi ya mayele” kendimaka ve konso mikanda yina yandi kebasisaka ve, mpi balukutakanu to basite ya Internet yina kesalamaka ve na lutwadisu na yandi.—Mat. 24:45-47.
Beto kesikisa bampangi yina kezolaka kusadila mayele na bo ya kuyindula sambu na kupesa maboko na nsangu ya mbote. Kansi, ata nsosa mosi ve ya muntu kesala fwete katula dikebi na beto na mambu yina Yezu Kristu ke na kusala na nzila ya dibundu na yandi na ntoto bubu yai. Na mvu-nkama ya ntete, ntumwa Polo kukebisaka na yina metala kudikotisa na masolo yina kelembisaka mpi kebakaka ntangu mingi, bonso ‘kutanga bazina ya kuluta mingi ya bambuta ya ntama, yina ke basisaka kaka ntembe ya mpamba; yo kele mfunu ve, sambu yo ke longa bantu ve mambu yina ya Nzambi ke zolaka. Na kuzaba mambu yina ya Nzambi ke zolaka, bantu fweti vanda na lukwikilu.’ (1 Tim. 1:3-7) Bakristu yonso fwete sala ngolo na “kutulaka ve ntembe ya buzoba, kutangaka ve bazina mingi-mingi ya bambuta ya ntama, kuswanaka mpi ve ti bantu ya nkaka sambu na Bansiku. Mambu yina kele mfunu ve; yo kele ya mpamba.”—Tito 3:9.
Sambu na bantu yina kezola kulonguka mpi kusala bansosa dyaka mingi na Biblia, beto kelongisila bo na kusadila mikanda Étude perspicace des Écritures, “ Toute Écriture est inspirée de Dieu et utile, “ mpi mikanda na beto yankaka, bonso yina ketubilaka bambikudulu yina kele na mikanda ya Biblia ya Daniele, Yezaya, ti Kusonga. Mikanda yai kepesaka malongi mingi ya kulonguka Biblia mpi kuyindulula yo, na mpila nde Nzambi ‘kusonga beto luzolo na yandi mbote-mbote, beto kuvanda na mayele yonso, beto kuzaba mpi mbote-mbote mambu yina ya mpeve-santu ke zabisaka beto. Mpidina, beto ta mona mpila ya kuzinga mutindu [Yehowa, NW] ke zolaka ti kupesa yandi kiese na mambu yonso. Beto ta salaka mambu ya mbote ya mutindu na mutindu, ebuna beto ta zabaka Nzambi diaka mingi.’—Kol. 1:9, 10.