Beto Tambula Bonso Bantu ya Mayele
1 Ntangu Yezu kulombaka balobi bambisi iya na kuvanda balongoki na yandi, bo sukininaka ve na kubaka desizio, kansi na mbala mosi, “bo landaka yandi.” (Mat. 4:18-22) Ntangu Saule ya Tarse kukumaka Mukristu mpi kumaka kumona dyaka, yandi mpi kusukininaka ve, kansi “kaka na ntangu yo yina, yandi yantikaka kulonga na banzo ya bisambu ya Bayuda nde Yesu kele Mwana-Nzambi.” (Bis. 9:20) Ntangu kekwendaka kaka na ntwala; kana yo luta, yo memana. Yo yina, yo kele mfunu nde beto tambula “bonso bantu ya mayele” sambu na yina metala mutindu beto kesadilaka ntangu na beto.—Ef. 5:15, 16.
2 Mambu ya Kukonda Kukana: Mabaku yina beto kele na yo bubu yai ya kusadila Yehowa lenda vanda dyaka ve mbasi. (Yak. 4:14) “Mambu ya kukonda kukana” lenda bwila muntu yonso. (Lo. 9:11, NW) Dyaka, beto yonso ke na kuyela. Ebuna, na ngidika yai ya bima ya mbi, ata muntu mosi ve lenda tina “bilumbu ya mpasi” ya kekwisaka ntangu mvula kepusanaka mpi ya kepesaka beto dyaka ve nzila ya kusala mingi na kisalu ya Yehowa. (Lo. 12:1) Yo yina, yo kele buzoba na kuyambula kusadila Nzambi to kukinga bantangu ya mbote na ntwala ya kubaka lukanu ya kusala kisalu ya kusamuna na kiteso yina mefwana. (Luka 9:59-62) Abrahami kuvandaka na ngemba na kimununu na yandi, mpi yandi fwaka na kyese sambu yandi sadilaka luzingu na yandi na mayele mpi kudipesaka ya mvimba na Yehowa.—Kuy. 25:8.
3 Ntangu Ke Mingi Ve: Beto kezola mpi kusadila ntangu na beto na mayele sambu “ntangu me bika diaka mingi ve.” (1 Kor. 7:29-31) Kubika fyoti mpenza, ngidika ya bima yai ya mbi tasuka. Mabaku ya kusala kisalu ya nene ya kuvukisa bantu yina kele bonso mameme na nsungi yai ya “kukatula bambuma” tasuka. (Kus. 14:15) Beto fwete keba na mpila nde beto bika ve nde basusi ti byese ya luzingu kuyiba ntangu na beto yina beto lenda sadila mbote na kisalu ya kusamuna. (Luka 21:34, 35) Yo tavanda kyese kibeni ntangu beto tamona mutindu beto salaka mingi na kisalu ya kukatula bambuma!
4 Beto fwete salaka ntangu yonso ngolo sambu na kusala ti kyese yonso mikumba ya kisalu yina beto lenda sala. Bika beto baka lukanu ya kusala yonso yina beto lenda sala sambu na kusadila Yehowa “awa ya beto ke ntete na ntangu ya kubinga nde: ‘Kilumbu ya Bubu yai.’ ” (Baeb. 3:13) Kana beto sala mpidina, beto tamonisa nde beto kele mpenza mayele, sambu ‘muntu yina ke salaka mambu yina ya Nzambi ke zolaka, yandi tazinga mvula na mvula.’—1 Yoa. 2:17.