Beto Kezabisaka Bankaka Kivuvu na Beto ya Kimfumu

¹ Na bilumbu yai ya nsuka mpi ya mpasi mingi, bantu mingi na nsi-ntoto kele ve ti kivuvu. (Ef. 2:12) Na buzoba yonso, bantu yankaka ketula ntima na bo na bima ya kinsuni, na bamfumu, na siansi, mpi buna na buna. Beto ke na kyese mpenza sambu beto kele ti kivuvu ya kyeleka sambu na bilumbu kekwisa, kivuvu yina “kele bonso kibende yina ke kangaka maswa. Yo ke pesaka kikesa ti ngolo na ntima.”​—⁠Baeb. 6:⁠19.

² Na nsi ya luyalu ya Kimfumu ya Nzambi, ntoto takituka paladisu. Bantu yina beto kezolaka ya mefwaka tafutumuka. (Bis. 24:15) Kinsukami, kukonda lunungu, maladi, kimununu, mpi lufwa tavanda dyaka ve. (Nk. 9:19; Mat. 12:​20, 21; Kus. 21:​3, 4) Yai kele mwa balusilu ya Yehowa yina talungana kubika fyoti. Inki dyambu ya metala kivuvu na beto nge kekinga mingimingi nde yo lungana?

³ Zabisa Nsangu ya Mbote: Beto fwete bumba ve kivuvu ya Kimfumu sambu na beto mosi. Zola sambu na Nzambi ti nkweno kepusaka beto na kulanda mbandu ya Yezu mpi “kuzabisa nsangu ya mbote na bansukami, . . . kuzabisa bantu yina ya bo kangaka na bitumba nde bo ta bikisa bo, mpi na kuzabisa bantu ya kufwa-meso nde bo ta mona diaka,” mpi kugulusa “bantu yina ya bo ke monisaka mpasi.” (Luka 4:18) Ntumwa Polo kuzabisaka nsangu ya mbote na bazandu mpi bisika yonso yina yandi vandaka kukuta bantu. Yandi kudipesaka ya mvimba na kisalu ya kusamuna. (Bis. 18:⁠5) Kana beto kelanda mbandu na yandi mpi kesala kisalu ya kusamuna na kikesa yonso, basusi ‘sambu na luzingu yai ya nsi-ntoto ya keyangisaka mpi kiese ya kimvwama’ talembisa ve kivuvu na beto ya Bukristu.​—⁠Mar. 4:⁠19.

⁴ Kivuvu na beto ya Kimfumu kelembaka ve na ntangu beto kekutanaka ti bantu yina kebuyaka nsangu ya Kimfumu, ya ketudilaka yo ve mpenza dikebi, to ya kemengaka beto mpenza. Beto kesimba “na ngolo mambu yina ya beto ke tulaka ntima na malongi na beto.” (Baeb. 10:23) Beto “ke monaka nsoni ve na kuzabisa nsangu ya mbote.” (Roma 1:16) Nsukansuka, lukwikilu mpi kukwamina na beto ya pwelele lenda pusa bantu na kuwidikila beto.

⁵ Ata yo ke mbote nde beto benda dikebi ya bantu nde mambu ya kebeba na nsi-ntoto ke na kulungisa bambikudulu ya Biblia, beto kele ve bansamuni ya kenatilaka bantu kaka nsangu ya lufwa. Kansi, kisalu na beto ya kusamuna kebendaka dikebi na kivuvu na beto ya Kimfumu, disongidila nsangu ya mbote ya Kimfumu ya Nzambi. Bika nde beto longa nsangu yai ya mbote ti kundima mpi kikesa yonso, sambu na kukwikila mpenza nde “mambu yina ya [beto] ke tulaka ntima” talungana.​—⁠Baeb. 6:⁠11.