Yidika Bantu ya Mpa na Kunwana ti Kimbeni
1 Ntangu bantu keyantikaka kulonguka Biblia mpi “ke zolaka kulemfuka na Nzambi,” bo kekumaka bantu ya ntete yina Satana kenongaka. (2 Tim. 3:12) Kimbeni lenda katuka na banduku ya kisalu, ya nzo-nkanda, to na bamfinangani. Yo lenda vanda mpasi mpenza kana kimbeni yina bantu ya mpa kekutana na yo kekatuka na bampangi yina kele ti mabanza ya mbote.—Mat. 10:21; Mar. 3:21.
2 Kimbeni Kuzabisamaka na Ntwala: Bantu ya mpa fwete bakisa nde bo takutana ti mbangika mpi nde yo kele kidimbu mosi ya kemonisa nde bo mekuma balongoki ya kyeleka ya Kristu. (Yoa. 15:20) Bantangu yankaka, bantu yankaka kemonisaka kimbeni sambu bo kebakisaka mbote ve Bambangi ya Yehowa. Kuvila ve nde kana bo kepesa nge nsoni sambu nge kele longoki ya Yezu mpi sambu nge kelemfukilaka Nzambi yo kele kyese ya nene. (Bis. 5:27-29, 40, 41) Ndimisa bantu ya mpa nde Yehowa tasadisa bo na zola yonso. (Nk. 27:10; Mar. 10:29, 30) Kutanina kwikama na bo ketula bo na lweka ya Yehowa na ntembe ya metala luyalu ya luyalanganu ya mvimba.—Bing. 27:11.
3 Mfunu ya Nzayilu ya Sikisiki: Monisa bantu yina nge kelongukaka na bo Biblia mfunu ya kulanda na kubaka nzayilu ya sikisiki ata bo kekutana ti bampasi ya nki mutindu. Na nzila ya kimbeni, Satana kesalaka yonso sambu mambu ya bo kelonguka kubasisa ve misisa na ntima na bo ya kifwani. (Bing. 4:23; Luka 8:13) Bo fwete landa na kubaka nzayilu ya sikisiki ya Ndinga ya Nzambi sambu na kutula ngolo mpenza misisa na lukwikilu.—Nk. 1:2, 3; Kol. 2:6, 7.
4 Mfunu ya Kukanga Ntima: Na konso mambu ya mpasi, kukanga ntima kele mfunu mpi lenda buta bambuma ya mbote. (Luka 21:16-19) Ntangu bantu ya mpa kekanga ntima na kimbeni, yo kenatilaka bo ti bantu yankaka mambote. Bo kemonaka ngolo ya Yehowa ya kusakumuna mingi mpenza bantu yina kekangaka ntima na kwikama yonso.—Yak. 1:12.
5 Ntumwa Polo vandaka na kyese na kumona bampangi na yandi ya Tesalonika keyela na kimpeve. Yandi pesaka Nzambi matondo sambu na bo; yandi sadisaka mingi na kati na bo na kyeleka. (2 Tes. 1:3-5) Beto mpi lenda baka kyese ti mambote ya mutindu mosi kana beto keyidika bantu yina beto kelongukaka ti bo Biblia na kunwana ti kimbeni.