Bamvutu na Bangyufula na Beno

◼ Kana bankwelani kezola kusadila Nzo ya Kimfumu sambu na diskure na bo ya makwela, inki mambu bo fwete solula ti bankuluntu?

Makwela yina kesalamaka na kuwakana ti minsiku ya Biblia kepesaka Yehowa lukumu. Yo kele mpenza kyeleka sambu na badiskure ya makwela yina bo kesalaka na Nzo ya Kimfumu, sambu manaka yina kesalamaka kuna kemonisaka na meso ya bantu yina ketala mutindu organizasio na beto kele. Sambu ‘mambu yonso kusalama na nzila ya mbote ti ya luzitu,’ yo kele mbote na kuzabisa bankuluntu ya dibundu ntangu beno kelomba Nzo ya Kimfumu sambu na kusala diskure ya makwela.​—⁠1 Kor. 14:⁠40.

Bankwelani yina kezola kusadila Nzo ya Kimfumu sambu na diskure na bo ya makwela fweti sonikila komite ya kisalu ya dibundu mosi yina kesalaka balukutakanu na Nzo ya Kimfumu yina. Bo fweti sonika mukanda na bo bilumbu mingi na ntwala mpi bo fwete pesa dati ti ntangu yina bo kezola kusadila Nzo ya Kimfumu. Bo fweti vila ve nde bankuluntu tasoba ve manaka ya balukutakanu sambu na kubikila diskure ya makwela kisika. Dyaka, bakala ti nkento yina kekwelana fwete vanda ti zina ya mbote, mpi kuzinga na kuwakana ti minsiku ya Biblia mpi bansiku ya lunungu ya Yehowa.

Sambu na kuzikisa nde makwela yina tapesa ve Nzambi na beto ya lukumu nsoni, bankwelani fwete tadila ti komite ya kisalu bangidika yina bo mebaka sambu na makwela na bo na ntwala ya kumanisa mambu yonso. Ata bankuluntu tameka ve kupusa na ngolo bankwelani na kusadila bangindu na bo, kana kima mosi ya bankwelani kezola kusala kele mbote ve, bo fwete sala nsoba. Bo lenda sadila kaka bankunga yina bo tapona na Bamelodi ya Kimfumu to bankunga yina kele na mukanda na beto ya bankunga. Konso kima yina beno tasala sambu na kutomisa Nzo ya Kimfumu to mutindu ya kuyidika bakiti fwete ndimama mpi na bankuluntu. Kana beno tabaka bafoto to tafilme, yo fwete bebisa ve lukumu ya okazio yai. Bankuluntu lenda pesa nswa ya kuvutukila mambu yina beno tasala na Nzo ya Kimfumu kana yo tavwalangasa ve bangidika yankaka ya dibundu. Beno tatula ve ata emvitasio mosi na tablo ya bansangu. Kansi, bankuluntu lenda pesa luzayisu ya nkufi na ntangu ya Lukutakanu ya Kisalu sambu na kuzabisa dibundu na yina metala diskure ya makwela yina tasalama na Nzo ya Kimfumu.

Ata yo kelomba ve nde bantu yonso yina tavanda na feti ya makwela kuvanda bantu ya mebakaka mbotika, yo tavanda mbote ve na kubingisa bantu yina luzingu na bo kewakanaka mpenza ve ti minsiku ya Biblia to bayina bikalulu na bo lenda yangisa mabanza ya bantu yina tavanda pana. Kana nkuluntu mosi kele, yandi muntu fwete sala diskure ya makwela. Bankuluntu kele balongi ya kufwana ya Ndinga ya Nzambi, yo yina bo bantu mefwana mpenza na kutendula minsiku ya Masonuku yina kewakana ti okazio yai ya mfunu.​—⁠1 Tim. 3:⁠2.

Sambu dikwela kemonisaka mpi lukumu na nkuluntu yina kepesa diskure ya makwela, bankwelani fwete zabisa yandi mpi bangidika yonso ya metala makwela. Yandi fwete solula ti bankwelani sambu na kuzaba bikalulu na bo na nsungi ya kutalana sambu na makwela; bankwelani fwete zabisa yandi mambu pwelele mpi na masonga yonso. Kana bakala to nkento kukwelanaka ti muntu yankaka na ntwala, yandi fwete ndimisa nde Masonuku mpi nsiku ya leta kepesa yandi kimpwanza ya kukwela. (Mat. 19:⁠9) Yandi fwete songa nkuluntu kopi ya mukanda yina leta kupesaka yandi na mbala ya nsuka ya yandi fwaka dikwela.

Kana bankwelani kesolula pwelele mpi kewakana mbote ti bankuluntu, dikwela tavanda dyambu mosi ya kyese sambu na bantu yonso.​—⁠Bing. 15:22; Baeb. 13:⁠17.