Kilumbu Mosi ya Sipesiali ya Kulomba Bantu na Kulonguka Biblia
1 Yantika na Yanuari, konso dibundu tapona wikendi mosi konso ngonda, ziku wikendi ya ntete, sambu na kusala kikesa mingi na kulomba bantu na kulonguka Biblia. Yo lenda vanda kilumbu ya Mposo to ya Lumingu, na kutadila kilumbu yina kele mbote sambu na teritware na beno. Kana bawi mebuya kulonguka Biblia kilumbu yina, bansamuni lenda pesa bo mukanda Biblia Kelongaka to banimero ya mpa ya baperiodike. Bankuluntu ti bansadi ya kisalu yonso fwete yilama sambu na kudipesa mingi na kisalu yai mpi kusadisa bansamuni na kuyantika kulonguka Biblia ti bantu.
2 Komite ya Kisalu ya Dibundu tasosa nki kilumbu ya wikendi bo tapona sambu na kulomba bantu na kulonguka Biblia. Dibundu fwete salaka bangibusa mbala na mbala na mpila nde bansamuni kudibongisa mpi kusala kikesa mingi sambu na kulomba bantu na kulonguka Biblia nzo na nzo, mpi na ntangu bo kevutukila bantu yina kumonisaka mpusa.
3 Mutindu ya Kudibongisa: Beto lenda baka bangindu sambu na kuyantika kulonguka Biblia ti bantu na ngika ya Kisalu na Beto ya Kimfumu ya Yanuari 2006 mpi na mukanda Comment raisonner na lutiti 12. Bansamuni yankaka lenda pona na kusadila trakiti, mu mbandu Keti Nge Tazola Kuzaba Kyeleka? Dyaka, lutiti ya 3 ya Kisalu na Beto ya Kimfumu ya Augusti 2007 kepesa bangindu yina kemonisa mutindu ya kuyantika kulonguka Biblia ti bantu ntangu beto kevutukila bayina kundimaka baperiodike. Bo tapona na ntwala bankuluntu mpi bansadi ya kisalu sambu na kutwadisa lukutakanu mosi ya nkufi na minuta 10 to 15 sambu na kisalu ya bilanga. Na lukutakanu yango, bo lenda tubila to kusadisa nsonga ya ngindu mosi ya mfunu to ya bangindu zole sambu na kuyantika kulonguka Biblia ti bantu.
4 Ya kyeleka, bantu yonso ve tandima kulonguka Biblia to talanda kulonguka na nima ya ntangu mingi. Dyambu yai fwete lembisa beto ve, sambu Yehowa muntu kebendaka bantu yina mefwanana na mameme na kukwisa na organizasio na yandi. (Yoa. 6:44) Mukumba na beto kele ve kaka ya kukuna bankeni ya kyeleka, kansi mpi ya kukuna ti kulosa masa na bankeni yina mebasisa misisa. Yo kelombaka mpi kulonguka Biblia ti bantu ya ntima masonga. Ntangu beto kesala mpidina, beto kesadila dibaku ya kusala bonso banduku ya kisalu ya Nzambi.—1 Kor. 3:9.