Kusamuna Kelombaka Kukanga Ntima

¹ Na nsungi ya bamvula kuluta 30, ntumwa Polo kubakaka kyese na kisalu na yandi ya kievanzelizatere. Yandi kutanaka ti mwa bampasi na kisalu na yandi ya kusamuna, kaka mutindu muntu yonso ya kesalaka mambu ya mbote kekutanaka ti bampasi. (2 Kor. 11:​23-29) Ata mpidina, Polo kuyambulaka ve kusamuna. (2 Kor. 4:⁠1) Yandi bakisaka nde ngolo yina vandaka kusadisa yandi na kukanga ntima na ntangu yina yandi vandaka kusala kisalu na yandi vandaka kukatuka na Yehowa. (Filp. 4:13) Na kutadilaka mbandu na yandi ya kukanga ntima na kwikama yonso, Polo lendaka kutuba nde: “Beno baka mbandu na mono, mutindu mono mpi ke bakaka mbandu na Kristo.”​—⁠1 Kor. 11:⁠1.

² Kukanga Ntima na Bampasi Bubu Yai: Konso kilumbu, bantu ya dibuta, banduku ya kisalu to ya nzo-nkanda kesekaka, ketelaminaka bampangi na beto mingi, mpi kendimaka ve nsangu ya Biblia yina beto kenataka. (Mat. 10:35; Yoa. 15:20) Mbala yankaka yo kele mpidina sambu na nge. Dyaka, yo lenda vanda nde nge kenwana ti maladi mosi, to nge kenwana konso kilumbu sambu na kubuya bansaka ya kulutisila ntangu mpi bampukumuna yina kemekaka lukwikilu ti kukanga ntima na nge. Beto lenda baka kikesa na kutadilaka bambandu ya bansadi ya kwikama ya ntama mpi ya bampangi Bakristu ya bubu yai ya mekutanaka ti bampasi mpi menungaka yo.​—⁠1 Pie. 5:⁠9.

³ Beto lenda baka kikesa ya kukangama na kisalu na beto ya kusamuna na kuzikisaka nde beto me “lwata binwaninu yonso ya Nzambi ke pesaka.” (Ef. 6:​10-13, 15) Kisambu sambu na kukanga ntima kele mpi mfunu. Nzambi kepesaka beto mpeve santu na yandi na mpila nde beto kuka kukanga ntima na bampasi. (2 Kor. 6:​4-7) Sambu na kununga mvita na beto ya kimpeve, beto fwete tula dikebi na bangibusa yina Nzambi kepesaka sambu na kukumisa mabanza na beto ya mpa. (Nk. 119:​24, 85-88) Kaka bonso mwana mosi ya zola lenda tanga mbala na mbala mukanda ya mekatuka na tata mosi ya zola, kutanga Biblia konso kilumbu kekumisaka ngolo bangwisana na beto ti Yehowa. Beto kebakaka mayele ya kunwana ti bampasi na nzila ya kulonguka ya beto mosi mbala na mbala. Kulonguka yina tasala nde mabanza ya Nzambi kuvanda na bupusi na badesizio na beto mpi kukumisa kwikama na beto ngolo.​—⁠Bing. 2:​10, 11.

⁴ Kukanga Ntima Kenataka Balusakumunu: Mutindu yo monanaka na mbandu ya Polo, kana beto kekanga ntima na kwikama yonso na ntangu beto kesala kisalu na beto ya kusamuna, yo tasepedisa ntima ya Yehowa mpi tanatila beto ti bantu yankaka balusakumunu. (Bing. 27:11) Bika beto vanda ti lukanu ya kukwamina na kisalu ya kusamuna sambu na kumonisa nde lukwikilu na beto kele kaka ngolo mpi ‘meluta na mfunu wolo yina ke bebaka, ata bo memekaka yo ntete na tiya.’​—⁠1 Pie. 1:​6, 7.