Bamvutu na Bangyufula na Beno

◼ Sambu na nki yo kelomba kusadila luswasukusu na yina metala kulanda balukutakanu ya dibundu na nzila ya telefone?

Mabundu mingi mebakaka bangidika sambu bampangi yina, bantangu yankaka, kekukaka ve kukwenda na balukutakanu ya dibundu na Nzo ya Kimfumu sambu na maladi to mambu yankaka ya mpasi kulanda lukutakanu na nsadisa ya telefone na banzo na bo. Yo kelombaka luswasukusu mpi kuyidika mambu mbote sambu ngidika yai kusalama kaka sambu na bantu yina kele mpenza na mfunu na yo. Yo yina, bankuluntu yina ketwadisa ngidika ya mutindu yai fwete bongisa yo mpi kutwadisa yo na mpila nde mambu yonso kusalama “na nzila ya mbote ti na luzitu.”​—⁠1 Kor. 14:⁠40.

Bankuluntu fwete sosa nde ngidika yango kusadisa ntete-ntete bansamuni ya dibundu na bo yina kele ti maladi yina kemanaka ve to kifu na nitu to bayina mekangamaka na banzo na bo sambu na bikuma yankaka. Nsamuni yina kebela sambu na ntangu fyoti to kele dyaka ve na ngolo, to longoki mosi ya Biblia yina keyela mbote ya mekangamaka na nzo, lenda baka mpi mambote na ngidika yai mpi kutangama na ntalu ya bantu yina kuvandaka na lukutakanu. Na bisika yina beno lenda kuka ve kusadila telefone sambu na kusadisa bantu yina kele mpenza na mpusa yina, ziku beno lenda baka bangidika yankaka, mu mbandu kukotisila bo manaka na kaseti.

Ya kyeleka, ata ngidika mosi ve lenda pesa beto mambote ya kiteso mosi ti kuvanda na kisika ya balukutakanu kesalama. Kuvanda kumosi ti bampangi na beto kepesaka beto dibaku ya ‘kupesana kikesa’ mpi yo kesadisaka bantu ya mpa na kubakisa mfunu ya kukwenda na balukutakanu. Ntangu beto kevandaka na balukutakanu na beto, beto kebakisaka mbote-mbote bansonga, bankuluntu kevandaka na makuki ya kupesa beto lusadisu, mpi beto kemonaka zola ya ngolo ya kimpangi na meso na beto. Ntangu mpangi-nkento mosi ya mununu vandaka kubasika na Nzo ya Kimfumu, mpangi mosi kuyambaka yandi; ebuna mpangi yina ya mununu kutubaka mambu yai ya kyeleka: “Muntu lenda yamba nge ve mutindu yai na telefone!”​—⁠Roma 1:​11, 12.

Bonso Anna yina vandaka kukwenda “konso ntangu na nzo-Nzambi,” bubu yai, bampangi na beto mingi ya minunu kekwendaka mbala na mbala na balukutakanu ya Bukristu na kiteso yina mavimpi mpi luzingu na bo kepesaka bo nzila. (Luka 2:​36, 37) Ata bo kelandaka balukutakanu na nzila ya telefone kana yo kelomba nde bo sala yo, bo kemonaka ve nde ngidika yina fwete baka kisika ya kukwenda na balukutakanu na Nzo ya Kimfumu. Na kulandaka mbandu na bo ya mbote, bika beto landa na kusepela na kusala ngolo na kuvandaka na balukutakanu na beto sambu na kusambila Nzambi na beto ya nene, Yehowa.​—⁠Nk. 95:​1-3, 6; 122:⁠1.