Kuta Kimbangi na Telefone Lenda Buta Mbuma ya Mbote

1. Sambu na nki beto lenda tadila kuta kimbangi na telefone bonso kitini mosi ya mfunu ya kisalu na beto ya kusamuna?

¹ Sambu na nki beto lenda tadila kana beto lenda sadila kuta kimbangi na telefone na kisalu na beto ya kusamuna? Sambu yo kele mutindu yankaka ya kusadisa bankaka na kubaka nzayilu ya sikisiki sambu na kuguluka. (2 Pie. 3:⁠9) Ata kusamuna nzo na nzo kele metode na beto ya ntetentete ya kuzabisa nsangu ya mbote ya Kimfumu ya Nzambi, beto kesadilaka na luzolo yonso bametode yankaka sambu na kusolula ti bantu yina beto lenda kuta ve na banzo na bo.​—⁠Mat. 24:14; Luka 10:​1-7; Kus. 14:⁠6.

2. Inki mutindu beto fwete bongisa kuta kimbangi na telefone?

² Mutindu Beto Fwete Bongisa Yo: Kaka mutindu beto kebakaka bangidika sambu na kusamuna nzo-nzo, bo kepesaka mpi bansamuni teritware sambu na kuta kimbangi na telefone. Muntu lenda ta kimbangi na telefone yandi mosi, to yandi lenda sala yo na kibuka mosi ya fyoti, ziku ya bantu zole to tatu. Kisika ya beto fwete sadila fwete vanda suku mosi ya pima mpi ya kukonda makelele. Bantu mingi kemonaka mbote na kuvanda na mesa mpi kuvanda ti mikanda yina bo kesadilaka mbala mingi ntangu bo kesamunaka nzo na nzo.

3. Inki mambu beto fwete yibuka ntangu beto keta kimbangi na telefone?

³ Mutindu ya Kuta Kimbangi na Telefone: Ntangu beto keta kimbangi na telefone, beto fwete tuba mutindu beto kesolulaka. Bantu yina meyantika kusamuna lenda tangila muwi mambu yina bo kezola kuzabisa yandi kansi na mutindu bo kesolulaka. Bangogo ya kuyantika masolo ya kele na mukanda Comment raisonner, na Kisalu na Beto ya Kimfumu, mpi na trakiti Keti Nge Tazola Kuzaba Kyeleka? lenda sadisa beto na dyambu yai. Ntangu nge kebongisa mambu ya nge tatuba, pona disolo ya nge tatubila, ngyufula ya nge tayula, mpi vanda ya kuyilama sambu na kutangila yandi mwa baverse yina kepesa mvutu. Mbala mingi, nge fwete pesa mikanda yina beto ke na kupesa na kisalu ya nzo na nzo. Tadila bangibusa ya kelanda: Vanda na kyese mpi tuba malembe. Vanda luzitu, ntima-nda, mpi tuba bonso nduku, sambu mambu yai lenda monana na telefone. Widikila ntangu muwi kepesa bangindu na yandi, na nima ndima mpi monisa ntonda sambu na yo. Keba: kutubila ve ngidika ya kupesa makabu, sambu muwi lenda mona bonso nde yo kele mwaye ya nge kesadila sambu na kulomba mbongo na nzila ya telefone.

4. Kuta kimbangi na telefone lenda sadisa beto na kusala inki na teritware ya bo mepesaka beto?

⁴ Ziku muntu ya nge kesolula na yandi na telefone mekangamaka na nzo sambu na maladi to kikuma yankaka to manaka ya kisalu na yandi kesalaka nde nge kuka ve kukutana na yandi na kisalu ya nzo na nzo. Kele na bantu yankaka ya kezingaka na bakartie yina balupangu kevandaka ti byelo ya kutanina mbote-mbote to na banzo yina kevandaka ti byelo ya kukanga mpi banzenza lenda kota ve kukonda nswa. Yo yina, sambu na kulungisa mbotembote mpenza kisalu na beto ya kusamuna, bika beto sadila metode yai ya kebutaka mbuma ya kuta kimbangi na telefone.