Beto Kevandaka Ntangu Yonso Bansamuni
1. Inki mutindu beto mezaba nde bansamuni ya mvu-nkama ya ntete bakisaka nde bo vandaka ntangu yonso bansamuni?
1 Bansamuni ya kikesa ya mvu-nkama ya ntete samunaka nsangu ya mbote kukonda kulemba na bisika yonso yina bo vandaka kukuta bantu. (Bis. 5:42) Yo yina, beto lenda yindula ve nde ntangu bo vandaka kusamuna nzo na nzo, bo vandaka kuluta bantu na nzila kukonda kulonga bo, to kuvila kuta kimbangi ya dibaku ya mbote ntangu bo kesumba bima na zandu na nima ya kumanisa kisalu ya kusamuna. Bonso Yezu, bo bakisaka nde bo vandaka ntangu yonso bansamuni.—Mar. 6:31-34.
2. Kuzinga na kuwakana ti zina na beto ketendula inki?
2 Ntangu Yonso Vanda ya Kuyilama: Zina na beto, Bambangi ya Yehowa, kemonisa kaka ve kisalu yina beto kesalaka; yo kemonisa banani beto kele. (Yez. 43:10-12) Yo yina, beto kevandaka ntangu yonso ya kuyilama sambu na kunwanina kivuvu na beto, ata ntangu beto kesamunaka ve nzo na nzo. (1 Pie. 3:15) Keti nge kesosaka mabaku yina lenda pesa nge nzila ya kuta kimbangi ya dibaku ya mbote mpi na nima kuyindula na mambu yina nge lenda tuba? Keti nge kevandaka ti mikanda sambu na kupesa bantu yina kemonisa mpusa? (Bing. 21:5) Keti nge kesamunaka kaka nzo na nzo, to nge kemwangaka mpi nsangu ya mbote na bisika yankaka kana mpila kele?
3. Inki kele mutindu ya kuluta mbote ya kutubila kisalu ya kusamuna na babalabala ti na baparkingi, na baparke, na bisika ya mumbongo, mpi buna na buna?
3 Kuta Kimbangi na “Meso ya Bantu Yonso”: Ntumwa Polo kutubaka nde yandi vandaka kulonga “na meso ya bantu yonso” mpi nzo na nzo. (Bis. 20:20) Yo yina kuta kimbangi “na meso ya bantu yonso” tavanda mutindu ya kuluta mbote ya kutubila kisalu ya kusamuna na babalabala ti na baparkingi, na baparke, na bisika ya mumbongo, mpi buna na buna. Yo kele kyeleka nde kusamuna nzo na nzo kevandaka ntangu yonso kisalu na beto ya ntetentete mpi mutindu ya kuluta mbote ya kukutana ti bantu sambu na kulonga bo nsangu ya Kimfumu. Kansi, bansamuni ya mvu-nkama ya ntete vandaka kutula dikebi na bantu kansi ve na banzo. Bo sadilaka mabaku yonso sambu na kuzabisa kyeleka—na meso ya bantu yonso, na dibaku ya mbote, mpi nzo na nzo. Bika beto mpi kutula dikebi ya mutindu mosi na bantu sambu na kusalalungisa mbote-mbote kisalu na beto.—2 Tim. 4:5.