DISOLO YA KULONGUKA 3
Kimvuka ya Nene ya Mameme ya Nkaka Ke Kumisa Nzambi mpi Kristu
“Luguluku me katuka na Nzambi na beto, yina me vanda na kiti ya kimfumu, mpi na Mwana-Dimeme.”—KUS. 7:10.
NKUNGA 14 Beto Kumisa Ntotila ya Mpa ya Ntoto
MAMBU YINA DISOLO YAI KE TUBILAa
1. Diskure yina salamaka na lukutakanu mosi ya distrike na 1935 sobaka nki na luzingu ya leke mosi?
LEKE mosi ya bakala bakaka mbotika na 1926 ntangu yandi vandaka ti bamvula 18. Bibuti na yandi vandaka Balongoki ya Biblia, mutindu bo vandaka kubinga Bambangi ya Yehowa na ntangu yina. Bo vandaka ti bana-babakala tatu mpi bana-bankento zole; bo vandaka kusadisa bo na kusadila Nzambi mpi kulanda mbandu ya Yezu Kristu. Mutindu Balongoki ya Biblia yonso ya kieleka vandaka kusala na ntangu yina, leke yai mpi vandaka kudia dimpa mpi kunwa vinu konso mvula na Madia ya Nkokila ya Mfumu. Kansi mutindu na yandi ya kutadila kivuvu na yandi sambu na bilumbu ke kwisa, sobaka ntangu yandi landaka diskure mosi ya mfunu yina vandaka ti ntu-diambu, “Kibuka ya Nene.” Mpangi Joseph Rutherford muntu salaka diskure yango na 1935 na lukutakanu mosi ya diskrike yina salamaka na Washington, na États-Unis. Inki kieleka bo longukaka na lukutakanu yina?
2. Inki ntendula ya mpa mpangi Rutherford tubilaka na diskure yina yandi salaka?
2 Na diskure yina mpangi Rutherford salaka, yandi tendulaka ‘kimvuka ya nene’ yina Kusonga 7:9 ke tubila. Na ntangu yina, Balongoki ya Biblia vandaka kuyindula nde kimvuka ya nene vandaka kimvuka ya bantu yina ta kwenda na zulu kansi bo vandaka ve ya kwikama mingi bonso Bakristu yina bo me tulaka mafuta. Mpangi Rutherford sadilaka Masonuku sambu na kutendula nde Nzambi me ponaka ve bantu ya kimvuka ya nene sambu na kuzinga na zulu. Kansi bo kele mameme ya nkaka ya Kristu yina ta guluka na mpasi ya nene mpi ta zinga mvula na mvula awa na ntoto. (Kus. 7:14) Yezu tubaka nde: “Mono kele ti mameme ya nkaka, yina kele ve ya lupangu yai; bo mpi, mono fwete kotisa bo na lupangu, mpi bo ta wa ndinga na mono, ebuna bo ta kuma kimvuka mosi, ngungudi mosi.” (Yoa. 10:16) Mameme yai ya nkaka kele Bambangi ya Yehowa ya kwikama yina kele ti kivuvu ya kuzinga mvula na mvula na Paladisu awa na ntoto. (Mat. 25:31-33, 46) Beto tala mutindu ntendula ya mpa ya kieleka ya Biblia sobaka luzingu ya bansadi mingi ya Yehowa mpi ya leke yina ya bamvula 18 ya beto me tubila na luyantiku.—Nk. 97:11; Bing. 4:18.b
NTENDULA YA MPA YINA SOBAKA LUZINGU YA BANTU MINGI
3-4. Na lukutakanu yina salamaka na 1935, nki bampangi mingi bakisaka na yina me tala kivuvu na bo mpi sambu na nki?
3 Ntangu ya kiese mingi na lukutakanu yina ya distrike vandaka ntangu mpangi Rutherford tubaka nde: “Bantu yonso yina kele ti kivuvu ya kuzinga mvula na mvula awa na ntoto lenda telema.” Mpangi mosi yina vandaka na lukutakanu yina tubaka nde bantu kiteso ya 20 000 telemaka. Na nima mpangi Rutherford tubaka nde: “Tala! Kibuka ya nene!” Bantu yonso tulaka milolo ya kiese. Bantu yina telemaka bakisaka nde Yehowa ponaka bo ve sambu na kuzinga na zulu. Bo bakisaka nde mpeve santu ya Nzambi ponaka bo ve. Na kilumbu ya kulanda ya lukutakanu yina, bantu 840 bakaka mbotika mpi bo kumaka Bambangi mpi mingi na kati na bo vandaka na kimvuka ya mameme ya nkaka.
4 Na nima ya diskure yina, leke yina beto me tubila mpi bantu mingi ya nkaka yambulaka mbala mosi kudia dimpa mpi kunwa vinu na Madia ya Nkokila ya Mfumu. Bampangi mingi mpi tubaka bonso mpangi yai ya kudikulumusa nde: “Mbala ya nsuka yina mono diaka dimpa mpi nwaka vinu na nkinsi ya Kuyibuka Lufwa ya Yezu vandaka na 1935. Sambu mono bakisaka nde mono vandaka ve ti kivuvu ya kuzinga na zulu sambu mpeve santu ya Yehowa ponaka mono ve. Kansi mono vandaka ti kivuvu ya kuzinga awa na ntoto mpi ya kupesa maboko na kisalu ya kukumisa ntoto Paladisu.” (Bar. 8:16, 17; 2 Bak. 1:21, 22) Banda na mvula yina, bantu ya kimvuka ya nene ke landa kukuma mingi mpi bo ke sala kumosi ti Bakristu yina bo me tulaka mafuta, bayina kele awa na ntoto.
5. Inki mutindu Yehowa ke tadilaka bampangi yina ke yambulaka kudia dimpa mpi kunwa vinu na nkinsi ya Kuyibuka Lufwa ya Yezu?
5 Inki mutindu Yehowa tadilaka bampangi yina yambulaka kudia dimpa mpi kunwa vinu na nkinsi ya Kuyibuka Lufwa ya Yezu na nima ya mvu 1935? Ebuna bubu yai, nki mutindu Yehowa ke tadilaka mpangi yina vandaka kudia dimpa mpi kunwa vinu na Madia ya Nkokila ya Mfumu kansi na nima yandi me bakisa nde mpeve santu ya Yehowa ponaka yandi ve? (1 Bak. 11:28) Bampangi ya nkaka vandaka kudia dimpa mpi kunwa vinu sambu bo bakisaka ve mbote kivuvu na bo. Kansi kana bo bakisa na masonga yonso nde bo vandaka kusala kifu, bo yambula kudia dimpa mpi kunwa vinu, mpi bo landa kusadila Yehowa na kwikama yonso, Yehowa ta kotisa bo na kimvuka ya mameme ya nkaka. Ata bo ke diaka ve dimpa mpi ke nwaka ve vinu, bo ke kwendaka kaka na nkinsi ya Kuyibuka Lufwa ya Yezu sambu na kumonisa ntonda ya mingi sambu na mambu yina Yehowa mpi Yezu me sadilaka bo.
KIVUVU MOSI YA KITOKO
6. Yezu songaka bawanzio na kusala nki?
6 Sambu ntama mingi ve mpasi ya nene ta yantika, yo kele mbote nde beto tubila diaka mambu yina Kusonga kapu 7 ke tuba sambu na Bakristu yina bo me tulaka mafuta mpi kimvuka ya nene ya mameme ya nkaka. Na mbona-meso yina, Yoane monaka Yezu ke songa bawanzio na kulanda kusimba mipepe ya ke fwaka. Bo fwete bika ve nde mipepe yina kubula na ntoto tii ntangu bo ta tula Bakristu yonso yina bo me tulaka mafuta kidimbu, disongidila, Yehowa kundima bo nde bo kele ya kwikama. (Kus. 7:1-4) Bampangi ya Kristu yina bo me tulaka mafuta ta kuma bantotila mpi banganga-nzambi ti Kristu na zulu sambu na kwikama na bo. (Kus. 20:6) Yehowa, Yezu mpi bawanzio ta wa kiese mingi ntangu bo ta mona mutindu Bakristu 144000 yina bo me tulaka mafuta ke baka lufutu na bo na zulu.
Kimvuka ya nene me lwata bamvwela ya mpembe mpi bo me simba mandala ya diba, bo me telema na ntwala ya kiti ya kimfumu ya Nzambi yina ke sema mpi na ntwala ya Mwana-Dimeme (Tala paragrafe 7)
7. Mutindu Kusonga 7:9, 10 ke monisa yo, banani Yoane monaka na mbona-meso mpi nki bo vandaka kusala? (Tala kifwanisu ya lutiti ya zulu.)
7 Na nima ya kutubila mambu ya me tala bantotila yai mpi banganga-nzambi 144 000, Yoane monaka diambu mosi ya kuyituka. Yandi monaka “kimvuka mosi ya nene” ya me guluka na Armagedoni. Kimvuka yai me swaswana ti kimvuka yina ya ntete sambu bantu ya kimvuka yai kele mingi mpi ata muntu mosi ve lenda tanga ntalu na bo. (Tanga Kusonga 7:9, 10.) Bo me “lwata bamvwela ya mpembe,” ya ke monisa nde bo kele ya “kukonda ditono” ya nsi-ntoto ya Satana mpi bo me bikala ya kwikama na Nzambi mpi na Kristu. (Yak. 1:27) Bo ke tuba na ndinga ya ngolo nde bo me guluka sambu na mambu yina Yehowa mpi Yezu, Mwana-Dimeme ya Nzambi me sala. Diaka, bo me simba mandala ya diba ya ke monisa nde bo ke ndima na kiese yonso nde Yezu kele Ntotila yina Yehowa me tulaka.—Tala mpi Yoane 12:12, 13.
8. Mukanda ya Kusonga 7:11, 12 ke songa beto nki na yina me tala dibuta ya Yehowa yina kele na zulu?
8 Tanga Kusonga 7:11, 12. Inki salamaka na zulu? Yoane monaka dibuta ya mvimba ya Yehowa yina kele na zulu me fuluka na kiese mpi ke kumisa Nzambi ntangu bo monaka kimvuka ya nene. Dibuta ya Yehowa yina kele na zulu ta vanda na kiese mingi ya kumona kulungana ya mbona-meso yai ntangu kimvuka ya nene ta guluka na mpasi ya nene.
9. Mutindu Kusonga 7:13-15 ke monisa yo, nki mambu kimvuka ya nene ke sala bubu yai?
9 Tanga Kusonga 7:13-15. Yoane tubaka nde kimvuka ya nene me “yobisaka bamvwela na bo mpi bo me kumisaka yo mpembe na menga ya Mwana-Dimeme.” Yo ke monisa nde bo kele ti kansansa ya bunkete mpi nde Yehowa ke sepelaka ti bo. (Yez. 1:18) Bo kele Bakristu yina me kudipesaka na Nzambi mpi me bakaka mbotika, bo kele ti lukwikilu ya ngolo na kimenga ya Yezu mpi bo kele banduku ya Yehowa. (Yoa. 3:36; 1 Pie. 3:21) Bo me fwana na kutelema na ntwala ya kiti ya kimfumu ya Nzambi sambu na kusadila yandi “kisalu ya santu mpimpa ti mwini” na kibansala ya tempelo na yandi ya kimpeve yina kele na ntoto. Bo ke salaka na kikesa yonso kisalu ya nene ya kusamuna nsangu ya Kimfumu mpi kukumisa bantu balongoki mpi bo ke tulaka mambote ya Kimfumu ya Nzambi na kisika ya ntete.—Mat. 6:33; 24:14; 28:19, 20.
Bantu ya kimvuka ya nene ya mameme ya nkaka kele na kiese sambu bo me guluka na mpasi ya nene (Tala paragrafe 10)
10. Inki kimvuka ya nene ke ndimaka mpi nki lusilu ta lungana?
10 Bantu ya kimvuka ya nene yina me guluka na mpasi ya nene ke ndimaka nde Nzambi ta landa kukeba bo sambu “Muntu yina me vanda na kiti ya kimfumu ta tandula tenta na yandi na zulu na bo.” Lusilu yina mameme ya nkaka ke vingilaka banda ntama ta lungana kibeni. “[Nzambi] ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve.”—Kus. 21:3, 4.
11-12. (a) Mutindu Kusonga 7:16, 17 ke monisa yo, nki mambote kimvuka ya nene ta baka na bilumbu ke kwisa? (b) Inki mameme ya nkaka ke salaka ntangu bo ke vukanaka na nkinsi ya Kuyibuka Lufwa ya Yezu mpi sambu na nki?
11 Tanga Kusonga 7:16, 17. Bubu yai, bansadi ya nkaka ya Yehowa kele na nzala sambu bo kele ve ti mbongo ya kusumba madia to bo ke niokwama sambu na mavwanga yina bantu ke basisaka mpi bitumba. Bo me tulaka bankaka na boloko sambu na lukwikilu na bo. Ata mpidina, bantu ya kimvuka ya nene kele na kiese mingi sambu bo ke zaba nde bo ta guluka ntangu Yehowa ta fwa nsi-ntoto yai ya mbi. Bo ta vandaka ntangu yonso ti madia mingi ya kinsuni mpi ya kimpeve. Ntangu Yehowa ta fwa nsi-ntoto ya mbi ya Satana, yandi ta tanina kimvuka ya nene na makasi na yandi yina kele bonso “tiya ya ngolo” yina yandi ta tiamunina makanda. Na nsuka ya mpasi ya nene, Yezu ta nata bantu yina ta guluka na mpasi ya nene awa na ntoto na “masa ya luzingu” ya mvula na mvula. Kimvuka ya nene kele kibeni ti kivuvu ya kitoko! Bamilio ya bantu yina ta guluka na mpasi ya nene ta vanda ti dibaku ya kuzinga mvula na mvula.—Yoa. 11:26.
12 Mameme ya nkaka kele ti kivuvu mosi ya kitoko yina ke pusaka bo na kupesa Yehowa mpi Yezu matondo mingi. Ata Yehowa me ponaka bo ve na kuzinga na zulu, yandi ke zolaka bo mingi mutindu mosi ti Bakristu yina bo me tulaka mafuta mpi bo yonso kele mfunu na meso na yandi. Mameme ya nkaka mpi Bakristu yina bo me tulaka mafuta ke kumisaka Nzambi mpi Kristu. Mu mbandu, bo ke salaka yo ntangu bo ke vukanaka na Madia ya Nkokila ya Mfumu.
KUMISA YEHOWA NA NTIMA YA MVIMBA NA NKINSI YA KUYIBUKA LUFWA YA YEZU
Dimpa mpi vinu yina bo ke lutisaka na nkinsi ya Kuyibuka Lufwa ya Yezu ke yibusaka beto nde Yezu fwaka sambu na beto sambu beto baka luzingu (Tala baparagrafe 13-15)
13-14. Sambu na nki Bakristu yina bo me tulaka mafuta mpi mameme ya nkaka fwete vukana na nkinsi ya Kuyibuka Lufwa ya Kristu?
13 Na bamvula yai, bantu fioti mpamba na kati ya bantu mingi yina ke vukanaka na nkinsi ya Kuyibuka Lufwa ya Yezu ke diaka dimpa mpi ke nwaka vinu. Na mabundu mingi ya Bambangi ya Yehowa na nsi-ntoto, ata muntu mosi ve ke diaka dimpa mpi ke nwaka vinu na nkinsi ya Kuyibuka Lufwa ya Yezu. Bantu mingi yina ke vukanaka na nkinsi yai kele ti kivuvu ya kuzinga na ntoto. Ebuna, sambu na nki bo ke vukanaka na Madia ya Nkokila ya Mfumu? Bo ke vukanaka na Madia ya Nkokila ya Mfumu bonso bantu yina ke kwenda na feti ya makwela ya nduku na bo. Bantu yina ke kwendaka na feti ya makwela sambu na kumonisa bankwelani nde bo ke zolaka bo mpi bo ke zola kusadisa bo. Mutindu mosi, mameme ya nkaka ke vukanaka na nkinsi ya Kuyibuka Lufwa ya Yezu sambu na kumonisa nde bo ke zolaka Yezu ti Bakristu yina bo me tulaka mafuta mpi bo ke zola kusadisa bo. Diaka mameme ya nkaka ke vukanaka na nkinsi yina sambu na kumonisa ntonda sambu na kimenga ya Yezu, yina me salaka nde bo kuma ti kivuvu ya kuzinga mvula na mvula awa na ntoto.
14 Mameme ya nkaka ke vukanaka diaka na nkinsi ya Kuyibuka Lufwa ya Yezu sambu na kulemfuka na nsiku ya Yezu. Yo kele kikuma ya nkaka ya mfunu. Mbala ya ntete yina Yezu diaka Madia ya Nkokila ya Mfumu ti bantumwa na yandi ya kwikama, yandi songaka bo nde: “Beno landa kusala yo sambu na kuyibuka mono.” (1 Bak. 11:23-26) Yo yina mameme ya nkaka ke landaka kuvukana na Madia ya Nkokila ya Mfumu ti Bakristu ya nkaka yina bo me tulaka mafuta yina kele awa na ntoto. Mameme ya nkaka ke bingisaka bantu na kuvukana ti bo na nkinsi ya Kuyibuka Lufwa ya Yezu.
15. Inki beto lenda sala sambu na kukumisa Nzambi mpi Kristu na nkinsi ya Kuyibuka Lufwa ya Yezu?
15 Na nkinsi ya Kuyibuka Lufwa ya Yezu, beto ke vandaka ti dibaku ya kukumisa Nzambi mpi Kristu na bankunga mpi na kisambu. Ntu-diambu ya diskure yina bo ta sala na mvula yai kele, “Monisa Ntonda Sambu na Mambu Yina Nzambi ti Kristu Me Salaka Sambu na Nge.” Yo ta sadisa beto na kumonisila Yehowa mpi Kristu ntonda ya mingi. Ntangu bo ta lutisa dimpa mpi vinu, yo ta sadisa beto na kuyibuka mambu yina nitu mpi menga ya Yezu ke tendula. Yo ta sadisa beto na kuyibuka nde Yehowa pesaka nzila nde Mwana na yandi kufwa sambu beto baka luzingu. (Mat. 20:28) Bantu yonso yina ke zolaka Tata na beto ya zulu mpi Mwana na yandi ta vukana na nkinsi ya Kuyibuka Lufwa ya Yezu.
PESA YEHOWA MATONDO SAMBU NA KIVUVU YINA YANDI ME PESAKA NGE
16. Na nki mambu Bakristu yina bo me tulaka mafuta kele kiteso mosi ti mameme ya nkaka?
16 Nzambi ke zolaka Bakristu yina bo me tulaka mafuta mpi mameme ya nkaka kiteso mosi. Bo yonso kele mfunu mingi na meso na yandi. Yandi futaka ntalu mosi, disongidila luzingu ya Mwana na yandi yina yandi ke zolaka mingi sambu na kusumba Bakristu yina bo me tulaka mafuta mpi mameme ya nkaka. Kivuvu ya Bakristu yina bo me tulaka mafuta me swaswana ti ya mameme ya nkaka. Ata mpidina, bo yonso fwete bikala ya kwikama na Nzambi mpi na Kristu. (Nk. 31:23) Kuvila ve nde Yehowa ke pesaka konso muntu mpeve santu na kutadila mpusa ya konso muntu, yo vanda Mukristu yina bo me tulaka mafuta to dimeme ya nkaka.
17. Bakristu yina bo me tulaka mafuta yina kele awa na ntoto ke vingilaka ti mpusa ya ngolo ya kusala nki?
17 Bakristu yina bo me tulaka mafuta ke butukaka ve ti kivuvu ya kuzinga na zulu. Nzambi muntu ke pesaka bo kivuvu yina. Bo ke yindulaka kivuvu na bo, ke sambaka sambu na yo mpi bo ke vandaka ti mpusa ya ngolo ya kubaka lufutu na bo na zulu. Bo ke zabaka ve mutindu nitu na bo ya kimpeve ta vanda. (Bafil. 3:20, 21; 1 Yoa. 3:2) Ata mpidina, bo ke vandaka na kiese ya kukutana ti Yehowa, Yezu, bawanzio mpi Bakristu ya nkaka yina bo me tulaka mafuta, bayina kele na zulu mpi kuyala ti bo na Kimfumu ya zulu.
18. Inki mambu mameme ya nkaka ke vingila na kiese yonso?
18 Mameme ya nkaka ke sepelaka ti kivuvu na bo ya kuzinga mvula na mvula awa na ntoto. (Lon. 3:11) Bo ke vingilaka na kiese yonso ntangu yina bo ta pesa maboko na kisalu ya kukumisa ntoto ya mvimba paladisu. Bo ke vingila mpi ntangu yina bo ta tunga banzo na bo, ta kuna banti, ta sala bilanga mpi ta vanda ti bana yina ta vanda ti nitu ya kukuka. (Yez. 65:21-23) Bo ke vingila mpi na kiese yonso ntangu yina bo ta sala nzietelo na bisika mingi na ntoto, na bangumba, na bamfinda, na banzadi mpi bo ta longuka bima mingi yina Yehowa me salaka. Diambu ya kuluta mfunu kele nde bo kele na kiese mingi ya kuzaba nde kinduku na bo ti Yehowa ta landa kukuma ngolo kibeni.
19. Inki dibaku nkinsi ya Kuyibuka Lufwa ya Yezu ke pesaka beto yonso mpi nki kilumbu yo ta salama na mvula yai?
19 Yehowa me pesaka bansadi na yandi yonso yina me kudipesaka na yandi kivuvu mosi ya kitoko sambu na bilumbu ke kwisa. (Yer. 29:11) Nkinsi ya Kuyibuka Lufwa ya Yezu ke pesaka beto yonso dibaku ya nene ya kukumisa Nzambi mpi Kristu sambu na mambu yina bo me salaka sambu na beto sambu beto baka luzingu ya kukonda nsuka. Ya kieleka, nkinsi ya Kuyibuka Lufwa ya Yezu kele lukutakanu mosi ya kuluta mfunu yina Bakristu ya kieleka ke salaka konso mvula. Na mvula yai, yo ta salama na Mposo, Marsi 27, 2021 na nima ya kudinda ya ntangu. Bantu mingi ta sala lukutakanu yai ya mfunu na kimpwanza yonso. Bankaka ta sala yo ata bo ke kutana ti mbangika. Bankaka diaka ta sala yo na boloko. Yehowa, Yezu mpi kitini ya dibuta ya Nzambi yina kele na zulu ke vingilaka na kiese yonso lukutakanu yai. Yo yina mabundu yonso, bimvuka mpi konso muntu kele ti dibaku ya kusala nkinsi yai ya kitoko, ya Kuyibuka Lufwa ya Yezu.
NKUNGA 150 Sosa Nzambi Sambu Nge Guluka
a Kilumbu ya Marsi 27, 2021, ta vanda kilumbu mosi ya mfunu mingi sambu na Bambangi ya Yehowa. Na nkokila ya kilumbu yina beto ta yibuka lufwa ya Kristu. Bantu mingi yina ta vukana na nkinsi yina ta vanda na kimvuka ya bantu yina Yezu bingaka, “mameme ya nkaka.” Inki kieleka ya me tala “mameme ya nkaka” Balongoki ya Biblia longukaka na 1935? Inki mambu ya kiese mameme ya nkaka ke vingila na nima ya mpasi ya nene? Inki mutindu mameme ya nkaka ke kumisaka Nzambi mpi Kristu ntangu bo ke vukanaka sambu na kuyibuka lufwa ya Kristu?
b NTENDULA YA BANGOGO: Mameme ya nkaka kele bantu yina ke landa Kristu mpi kele ti kivuvu ya kuzinga mvula na mvula na ntoto. Bankaka na kati na bo ke yantika kusambila Yehowa na bilumbu ya nsuka. Kimvuka ya nene kele mameme ya nkaka yina ta vanda na luzingu ntangu Kristu ta sambisa bantu na mpasi ya nene mpi bo ta guluka na mpasi ya nene.