Ndima nde Yehowa Me Lolulaka Nge

1-2. Ntangu beto ke bakisaka nde Yehowa me lolula masumu na beto, nki mutindu beto ke kudiwaka? (Tala mpi kifwanisu.)

NTOTILA Davidi waka mpasi mingi sambu na masumu yina yandi salaka. (Nk. 40:12; 51:3, bangogo yina kele na zulu ya kapu) Yandi salaka masumu ya nene na luzingu na yandi. Kansi yandi balulaka ntima na masonga yonso mpi Yehowa lolulaka yandi. (2 Sam. 12:13) Yo yina Davidi bakisaka kiese yina muntu ke waka kana Yehowa me lolula masumu na yandi.​—Nk. 32:1.

² Bonso Davidi, beto mpi lenda wa kiese yina muntu ke waka kana Yehowa me lolula masumu na yandi. Yo ke pesaka kibeni kikesa mutindu beto ke zabaka nde kana beto me balula ntima na masonga yonso, beto me songa bankuluntu masumu na beto mpi beto ke sala yonso sambu na kuvutukila yo diaka ve, Yehowa ta lolula masumu na beto na luzolo yonso ata yo kele masumu ya nene kibeni! (Bing. 28:13; Bis. 26:20; 1 Yoa. 1:9) Beto ke vandaka na kiese sambu beto ke zabaka nde kana Yehowa me lolula masumu na beto, yandi ke vilaka masumu yango mpi na meso na yandi, yo ke vandaka bonso nde beto salaka yo ve!​—Ezek. 33:16.

3-4. Mpangi-nkento mosi vandaka kuyindula nki na nima ya kubaka mbotika mpi nki beto ta tubila na disolo yai?

³ Kansi, bantangu ya nkaka yo lenda vandila beto mpasi na kundima nde Yehowa me lolulaka mpenza masumu na beto. Beto tadila mbandu ya mpangi-nkento Jennifer yina yelaka na kieleka. Ntangu yandi kumaka toko, yandi kumaka kusala mambu ya mbi ya kubumbana. Mwa bamvula na nima, yandi sobaka bikalulu na yandi mpi nsuka-nsuka yandi bakaka mbotika. Yandi ke tuba nde: “Ntete mono vandaka kusala pite, kulawuka malafu, kuwa makasi ya mingi mpamba-mpamba mpi kuzola mbongo mingi. Mono vandaka kuzaba nde kana mono me lomba Yehowa pardo mpi mono me balula ntima, yandi ta lolula mono sambu na kimenga ya Yezu. Kansi ata mono lombaka Yehowa pardo mpi mono balulaka ntima, mono vandaka kundima mpenza ve nde yandi me lolulaka mono.”

⁴ Keti bantangu ya nkaka nge ke yindulaka nde Yehowa me lolulaka ve masumu na nge? Yehowa ke lolulaka kibeni na ntima ya mvimba mpi yandi ke zolaka nde beto ndima nde yandi me lolulaka beto mutindu Davidi vandaka kundima yo. Na disolo yai, beto ta longuka sambu na nki beto fwete ndima nde Yehowa me lolulaka beto mpi nki lenda sadisa beto na kundima nde Yehowa me lolulaka beto mpenza.

SAMBU NA NKI BETO FWETE NDIMA NDE YEHOWA ME LOLULAKA BETO?

5. Inki Satana ke sosaka kundimisa beto? Pesa mbandu.

⁵ Kana beto ke ndima nde Yehowa me lolulaka beto, yo ta sadisa beto na kubwa ve na mutambu mosi ya Satana. Kuvila ve nde Satana ke salaka yonso sambu na kupusa beto na kuyambula kusadila Yehowa. Sambu na kulungisa lukanu na yandi, yandi lenda pusa beto na kuyindula nde Yehowa ke lolulaka ve masumu na beto. Beto tadila mbandu ya muntu mosi yina bo katulaka na dibundu ya Korinto sambu na pite. (1 Bak. 5:1, 5, 13) Ntangu yandi balulaka ntima, Satana vandaka kuzola nde bampangi na dibundu ya Korinto kulolula yandi ve ata fioti mpi bo vutula yandi ve na dibundu. Satana vandaka kuzola mpi nde muntu yina balulaka ntima kuyindula nde Yehowa lenda lolula yandi ve ata fioti. Yo lendaka kusala nde “mawa ya mingi kibeni kulutila yandi” mpi yandi yambula kusadila Yehowa. Satana me sobaka mpi ve lukanu na yandi mpi mitambu na yandi. Kansi “beto ke zabaka mayele na yandi.”​—2 Bak. 2:5-11.

6. Kana beto ke yindula nde Yehowa me lolulaka ve masumu yina beto me salaka, nki beto lenda sala?

⁶ Kana beto me ndima nde Yehowa me lolulaka beto, beto ta kudiyangisa diaka ve sambu na masumu yina beto salaka. Kana beto me sala disumu, beto ke kudiyangisaka. (Nk. 51:17) Yo kele kima ya mbote. Kansansa na beto lenda pusa beto na kusoba bikalulu na beto mpi na kusala mambu ya mbote. (2 Bak. 7:10, 11) Kansi kana beto ke landa kudiyangisa ata na nima ya kubalula ntima, yo lenda lembisa beto nitu mpi yo pusa beto na kusadila diaka ve Yehowa. Kana beto me ndima kibeni nde Yehowa me lolulaka beto, beto fwete yambula kudiyangisa. Mpidina, beto lenda sadila Yehowa mutindu yandi ke zolaka, disongidila na kansansa ya mbote mpi na kiese ya mingi. (Bakol. 1:10, 11; 2 Tim. 1:3) Ebuna, nki lenda sadisa beto na kundima kibeni nde Yehowa me lolulaka beto?

INKI LENDA SADISA BETO NA KUNDIMA NDE YEHOWA ME LOLULAKA BETO?

7-8. Inki Yehowa songaka Moize mpi yo ke ndimisa beto nki? (Kubasika 34:6, 7)

⁷ Yindula mambu yina Yehowa ke tubaka sambu na yandi. Mu mbandu, tala mambu yina Yehowa songaka Moize na Ngumba ya Sinai.a (Tanga Kubasika 34:6, 7.) Yehowa lendaka kusonga Moize mambu mingi ya me tala bikalulu na yandi mpi mutindu yandi ke salaka mambu. Kansi, yandi yantikaka ntete kusonga Moize nde yandi kele “Nzambi yina ke wilaka bantu mawa mpi ke fwilaka bo nkenda.” Keti Nzambi ya mutindu yai lenda buya kulolula nsadi na yandi yina me balula ntima na masonga yonso? Ata fioti ve! Kana yandi sala mutindu yina, yo ta monisa nde yandi kele ve Nzambi ya mawa mpi yandi kele ntima-ngolo. Kansi Yehowa ke vandaka ve mutindu yina.

⁸ Beto fwete ndima kibeni nde Yehowa lenda tuba ve ata fioti mambu ya luvunu sambu na yandi, sambu yandi kele Nzambi ya kieleka. (Nk. 31:5) Yo yina, beto fwete ndima mambu yina yandi ke tuba. Kana nge ke landa kudiyangisa mingi sambu na masumu yina nge salaka, kudiyula nde: ‘Keti mono ke ndimaka kibeni nde Yehowa ke wilaka bantu mawa mpi nde yandi ta buya ve ata fioti kulolula konso muntu yina me sala masumu mpi me balula ntima? Kana mpidina, keti mono fwete ndima ve nde yandi me lolulaka mono mpi?’

9. Kana Yehowa me lolula masumu na beto, yo ke tendula nki ? (Nkunga 32:5)

⁹ Yindula mingi mambu yina Yehowa ke longa beto na Biblia ya me tala mutindu yandi ke lolulaka beto. Mu mbandu, beto tadila mambu yina Davidi tubaka ya me tala mutindu Yehowa ke lolulaka beto. (Tanga Nkunga 32:5.) Yandi tubaka nde: “nge lolulaka kifu ya masumu na mono.” Ngogo ya Kiebreo ya bo me balula nde “kulolula” lenda tendula “kunangula,” “kukatula” to “kunata.” Ntangu Yehowa lolulaka Davidi, yo vandaka bonso nde yandi katulaka masumu yina Davidi salaka mpi yandi nataka yo ntama ti yandi. Davidi vandaka na kiese sambu Yehowa katulaka yandi kizitu yina yandi vandaka kunata. (Nk. 32:2-4) Beto lenda kudiwa mpi bonso Davidi. Kana beto me balula ntima na masonga yonso, yo kele diaka ve mfunu na kulanda kudiyangisa sambu na masumu yina beto salaka. Kansi beto fwete vanda na kiese sambu Yehowa me lolulaka beto dezia.

10-11. Bangogo “ya kuyilama na kulolula” ke longa beto nki sambu na Yehowa? (Nkunga 86:5)

¹⁰ Tanga Nkunga 86:5. Na verse yai, Davidi ke tuba nde Yehowa ke vandaka “ya kuyilama na kulolula.” Mukanda mosi ya ke tendulaka Biblia ke tuba sambu na bangogo yai nde: “[Yehowa] kele ‘muntu yina ke lolulaka.’ Yo kele ‘kikalulu’ na yandi.” Sambu na nki Yehowa ke vandaka ti kikalulu ya kulolula? Kitini ya zole ya verse yango ke tuba nde: “Nge kele ti zola ya kwikama mingi sambu na bantu yonso yina ke bingaka nge.” Mutindu beto longukaka yo na disolo ya me luta, Yehowa ke sila nde yandi ta monisa zola ya kwikama na bantu yonso yina ke zolaka yandi mpi yandi ta bika bo ve ata fioti. Zola yina ya kwikama ke pusaka yandi na ‘kulolula na luzolo yonso’ bantu yonso yina me balula ntima. (Yez. 55:7.) Kana nge ke yindula nde Yehowa lenda lolula nge ve, kudiyula nde: ‘Keti mono ke ndimaka kibeni nde Yehowa kele Muntu Yina Ke Lolulaka mpi nde yandi ke vandaka ya kuyilama na kulolula bantu yonso yina ke balulaka ntima mpi yina ke lombaka yandi na kuwila bo mawa? Kana mpidina, keti mono fwete ndima ve nde yandi lolulaka mono ntangu mono lombaka yandi na kuwila mono mawa mpi na kulolula mono?’

¹¹ Beto ta baka kikesa kana beto ke zaba nde Yehowa ke bakisaka mbote-mbote nde beto kele bantu ya kukonda kukuka. (Nk. 139:1, 2) Mambu yai kele pwelele na nkunga ya nkaka yina Davidi sonikaka mpi yo lenda sadisa beto na kundima kibeni nde Yehowa ke lolulaka beto.

KUVILA VE MAMBU YINA YEHOWA KE YIBUKAKA

12-13. Mutindu Nkunga 103:14 ke monisa yo, Yehowa ke yibukaka nki sambu na beto mpi yo ke pusaka yandi na kusala nki?

¹² Tanga Nkunga 103:14. Davidi tubaka nde Yehowa “ke yibukaka nde beto kele mfututu.” Mambu yai ya Davidi tubaka ke monisa kikuma mosi yina ke salaka nde Yehowa kulolula bantu yina ke balulaka ntima: Yandi ke zabaka nde beto kele bantu ya kukonda kukuka. Sambu na kubakisa ngindu yai mbote, beto tadila mbote-mbote mambu yina Davidi sonikaka.

¹³ Davidi tubaka nde Yehowa “me zaba mbote mutindu yandi me salaka beto.” Yandi salaka Adami “na mfututu ya ntoto.” Yandi ke zaba mbote-mbote mutindu yandi salaka bantu mpi yandi ke zaba bima yina bo ke vandaka ti yo mfunu sambu na kulanda kuzinga. Mu mbandu, bo ke vandaka ti mfunu ya kudia, ya kulala mpi ya kupema. Ata bantu ya kukuka fwete sala mpi mambu yai sambu na kuzinga. (Kuy. 2:7) Kansi ntangu Adami ti Eva salaka disumu, bantu kumaka mfututu na mutindu ya nkaka diaka. Sambu beto kele bana ya Adami ti Eva, beto kele bantu ya kukonda kukuka mpi beto fwete nwana ti nzala ya kusala mambu ya mbi. Mutindu Davidi tubaka yo, Yehowa ke sukaka kaka ve na kuzaba nde beto kele bantu ya kukonda kukuka, kansi yandi ke “yibukaka” yo. Ngogo ya Kiebreo yina bo me balula awa nde ‘kuyibuka’ lenda tendula kusala kima mosi ya mbote. Na mutindu ya nkaka, beto lenda balula mambu yina Davidi tubaka nde: Yehowa ke zabaka nde bantangu ya nkaka beto ta sala bifu, kansi kana beto me sala kifu mpi me balula ntima na masonga yonso, Yehowa ke wilaka beto mawa mpi ke lolulaka beto.​—Nk. 78:38, 39.

14. (a) Inki diaka Davidi tubaka ya me tala mutindu Yehowa ke lolulaka beto? (Nkunga 103:12) (b) Inki malongi beto lenda baka na mutindu Yehowa lolulaka Davidi? (Tala lupangu “Mutindu Yehowa Ke Lolulaka mpi Ke Vilaka.”)

¹⁴ Inki diaka lenda ndimisa beto nde Yehowa me lolulaka beto? (Tanga Nkunga 103:12.) Davidi tubaka nde kana Yehowa me lolula masumu na beto, yandi ke tulaka yo ntama kibeni kaka bonso “mutindu kisika yina ntangu ke basikaka kele ntama ti kisika yina ntangu ke dindaka.” Esti, kisika yina ntangu ke basikaka, kele ntama kibeni ti westi, kisika yina ntangu ke dindaka. Bisika yai zole lenda kutana ve ata fioti. Yo ke longa beto nki sambu na masumu yina Yehowa ke lolulaka? Mukanda mosi ya ke tendulaka Biblia ke tuba nde: “Kana Yehowa me tula masumu na beto ntama ti beto, beto fwete ndima kibeni nde nsudi na yo mpi bidimbu na yo ke katukaka kibeni mpi yandi ke yibukaka yo diaka ve ata fioti mpi yandi ta yibusa beto yo ve.” Yindula fioti: Nsudi lenda yibusa beto kima mosi yina salamaka. Kansi ntangu Yehowa ke lolulaka masumu na beto, yo kele bonso nde ata nsudi mosi ve me bikala yina lenda yibusa yandi masumu yango mpi kupusa yandi na kupesa beto ndola sambu na yo.​—Ezek. 18:21, 22; Bis. 3:19.

15. Inki beto lenda sala kana beto ke landa kudiyangisa sambu na masumu yina beto salaka?

¹⁵ Inki mutindu mambu yina Davidi sonikaka na Nkunga 103 lenda sadisa beto na kundima nde Yehowa me lolulaka beto? Kana beto ke landa kaka kudiyangisa sambu na masumu yina beto salaka, beto lenda kudiyula nde: ‘Keti mono ke vila mambu yina Yehowa ke yibukaka, disongidila mono ke vila nde Yehowa ke yibukaka nde mono kele muntu ya kukonda kukuka mpi nde yandi ta lolula na masonga yonso konso muntu yina me balula ntima bonso mono? Keti mono ke yibuka mambu yina Yehowa ke vilaka, disongidila mono ke yibuka masumu yina yandi me lolulaka dezia mpi mono ke yindula nde yandi ta pesa mono ndola sambu na yo?’ Yehowa ke landaka ve kuyindula masumu yina beto salaka. Beto fwete sala mpi mutindu mosi. (Nk. 130:3) Kana beto ke ndima nde Yehowa me lolulaka beto na ntima ya mvimba, beto ta kudilolula mpi ta landa kukwenda na ntwala.

16. Pesa mbandu ya ke monisa nde yo kele kigonsa na kulanda kudiyangisa sambu na masumu yina beto me salaka. (Tala mpi kifwanisu.)

¹⁶ Beto tadila mbandu yai. Kana beto ke landa kudiyangisa sambu na masumu yina beto salaka, yo kele bonso nde beto ke landa kupusa kamio sambu yo kwenda na ntwala kansi beto ke landa kutala na nima na kitala-tala ya kamio (rétroviseur). Yo kele mbote na kutala na kitala-tala ya kamio bantangu ya nkaka sambu na kuzaba kana kigonsa kele na nima. Kansi sambu na kulanda kupusa kamio na ntwala na lutaninu, beto fwete tula dikebi ya mingi na nzila yina kele ntwala, kisika beto ke kwenda. Mutindu mosi, yo lenda vanda mpi mfunu bantangu ya nkaka na kuyindula masumu yina beto salaka sambu yo lenda pesa beto malongi mpi kusadisa beto na kuvutukila yo diaka ve. Kansi kana beto ke landa kuyindula mingi masumu yina beto salaka, beto ta vanda diaka ve na kiese mpi ta kudipesa diaka ve mingi na kisalu ya Yehowa. Beto fwete landa kutula dikebi na nzila yina kele na ntwala na beto. Beto kele na nzila yina ke nata na luzingu ya mvula na mvula na ntoto ya mpa yina Yehowa me silaka beto, kisika yina “mambu ya ntama ta kwisa ve na mabanza.”​—Yez. 65:17; Bing. 4:25.

LANDA KUNDIMISA NTIMA NA NGE NDE YEHOWA KE ZOLAKA NGE MPI NDE YANDI ME LOLULAKA NGE

17. Sambu na nki beto fwete landa kundimisa ntima na beto nde Yehowa ke zolaka beto mpi ke lolulaka beto?

¹⁷ Beto fwete landa kundimisa ntima na beto nde Yehowa ke zolaka beto mpi nde yandi ke vandaka ntangu yonso ya kuyilama na kulolula beto. (1 Yoa. 3:19) Sambu na nki? Sambu Satana ta landa kusala yonso sambu na kundimisa beto nde Yehowa ke zolaka beto ve ata fioti mpi nde yandi lenda lolula beto ve. Ata yandi me sadila konso metode yina, lukanu na yandi kele kaka mosi: Kupusa beto na kuyambula kusadila Yehowa. Beto fwete vila ve nde Satana ta landa kunwanisa beto diaka mingi sambu yandi ke zaba nde yandi kele ve ti ntangu mingi. (Kus. 12:12) Kansi beto fwete bika ve nde yandi nunga beto!

18. Inki nge lenda sala sambu na kundima kibeni nde Yehowa ke zolaka nge mpi ke vandaka ya kuyilama na kulolula nge?

¹⁸ Sadila bandongisila yina beto tubilaka na disolo ya me luta sambu na kukuma kundima diaka mingi nde Yehowa ke zolaka nge. Sambu na kundimisa ntima na nge nde Yehowa me lolulaka nge, yindula mambu yina yandi ke tubaka sambu na yandi. Yindula mingi mambu yina Biblia ke tubaka ya me tala mutindu Yehowa ke lolulaka. Kuvila ve nde yandi ke zabaka mbote kibeni nde nge kele muntu ya kukonda kukuka mpi yandi ke wilaka nge mawa. Diaka, kuvila ve nde yandi ke lolulaka na masonga mpenza. Mpidina, nge lenda vanda na kiese sambu nge ke ndima kibeni nde Yehowa ke wilaka nge mawa mpi nge lenda tuba bonso Davidi nde: “Mersi Yehowa, mutindu nge lolulaka ‘kifu ya masumu na mono’!”​—Nk. 32:5.