Inki Nge Lenda Sala Sambu Nge Kudiyangisa Ve Kuluta Ndilu
Kana nge ke kudiyangisa kuluta ndilu, yo lenda bebisa sante na nge mpi mabanza na nge. Nkutu, yo lenda natila nge bampasi ya nene kuluta mpasi yina nge vandaka kudiyangisa sambu na yo.
Bandongisila ya mfunu sambu na kudiyangisa ve kuluta ndilu
Tula bandilu na yina me tala kutanga to kulanda bansangu ya mbi. Nge kele ve ti mfunu ya kuzaba mambu yonso ya fioti-fioti na yina me tala diambu mosi buna. Kana nge ke landa ntangu yonso bansangu yina ke pesaka bantu mpasi, nge ta kuma kubanga diaka mingi mpi nge ta vanda diaka ve ti kivuvu.
Ndongisila ya Biblia: “Mabanza ya ke niokwama ke katulaka ngolo ya muntu.”—Bingana 17:22.
“Yo ke vandaka pete nde muntu kukuma mpika ya bansangu ya ke basika mpi ya bansangu ya mbi na Internet. Mono kumaka kudiyangisa diaka ve mingi ntangu mono bikaka kulanda bansangu ya ke basika.”—John.
Mambu ya kuyindulula: Keti nge kele kibeni ti nzala ya kuzaba bansangu yonso ya ke basika?
Landa kusala mambu ya nge ke salaka. Meka kutelama na mpongi, kudia, kulala na ngunga mosi ya siki-siki konso kilumbu. Kana kele ti manaka mosi ya nge ke landaka sambu na kusala mambu, luzingu na nge ta vanda mbote mpi nge ta kudiyangisa ve mingi.
Ndongisila ya Biblia: “Balukanu ya muntu yina ke salaka ngolo ke nataka kibeni na kununga.”—Bingana 21:5.
“Ntangu maladi ya coronavirus yantikaka, mono yambulaka kusala mambu ya mbote yina mono ke salaka mpi mono kudipesaka mingi na bansaka ya kulutisila ntangu. Mono zolaka kusadila mbote ntangu na mono, yo yina mono salaka manaka ya mambu yina mono fwete salaka konso kilumbu.”—Joseph.
Mambu ya kuyindulula: Keti nge ke salaka mambu yina ke sadisaka nge na kumona nde nge me sala kima mosi na nsuka ya konso kilumbu?
Tula mabanza na mambu ya mbote. Kana nge ke lutisaka ntangu sambu na kutuba nde “kana mono zabaka” to sambu na kuyindula kaka nde mambu ta beba, nge ta kuma kudiyangisa kuluta ndilu. Na kisika ya kusala mpidina, yindula mambu yina ta pesa nge kiese na luzingu.
Ndongisila ya Biblia: “Beno pesa matondo.”—Bakolosai 3:15.
“Ntangu mono ke tangaka Biblia, mono ke fulusaka ve mabanza na mono ti bansangu ya mbi. Kusala mutindu yina ke sadisaka mono na kutula dikebi na mambu ya mbote. Yo lenda monana bonso kima mosi ya mpamba-mpamba kansi yo ke simbaka!”—Lisa.
Mambu ya kuyindulula: Keti nge ke tulaka kaka mabanza na mambu ya mbi ya me kuminaka nge na luzingu mpi kuvila mambu ya mbote?
Tudila bantu ya nkaka dikebi. Kana nge ke landa kudiyangisa, yo lenda pusa nge na kudivandila. Kansi na kisika ya kusala mpidina, yindula mambu yina nge lenda sala sambu na kusadisa bantu ya nkaka.
Ndongisila ya Biblia: “Beno sosa kaka ve mambote na beno mosi, kansi mpi mambote ya bantu ya nkaka.”—Bafilipi 2:4.
“Kusala mambu sambu na bantu ya nkaka ke pesaka mono kiese. Mono ke salaka mambu yina ta sepedisa bo mpi kaka na ntangu yina mosi, mono ke vandaka diaka ve ti basusi mingi. Yo yina, mono ke vandaka diaka ve ti ntangu ya kuyindula mambu ya ke yangisa mono.”—Maria.
Mambu ya kuyindulula: Na kati ya bantu yina nge me zaba, nani lenda vanda ti mfunu ya lusadisu? Inki nge lenda sala sambu na kusadisa yandi?
Tanina sante na nge. Salaka ngalasisi mpi pemaka mingi. Diaka madia ya kele ti bavitamine. Kana nge ke tanina sante na nge, nge ta kuma kutadila mambu na mutindu ya nkaka mpi nge ta kudiyangisaka ve mingi.
Ndongisila ya Biblia: “Ngalasisi ya nitu kele mfunu.”—1 Timoteo 4:8.
“Mono ti mwana na mono, beto lenda sala ve ngalasisi na nganda mutindu beto ke zolaka. Yo yina, beto ke salaka ngalasisi na nzo mbala na mbala. Yo ke salaka nde beto vanda na kiese mpi beto ke kudiwaka mbote.”—Catherine.
Mambu ya kuyindulula: Keti yo kele mfunu nde nge diaka bima ya kele ti bavitamine mpi nge salaka ngalasisi mingi sambu nge vanda ti sante ya mbote?
Katula kusadila bandongisila yai ya mfunu, bantu mingi me bakaka mambote ntangu bo longukaka mambu yina Nzambi me tubaka nde yandi ta sala sambu luzingu kuvanda mbote na bilumbu ke kwisa. Mambu yango kele na Biblia mpi beto lenda tudila yo ntima. Tala disolo “Inki Mambu Kimfumu ya Nzambi Ta Sala?”