Keti Kilumbu Kele Terorizme Ta Mana?

Kana bateroriste me fwa bantu, nge lenda kudiyula nde: ‘Keti Nzambi ke kipaka beto? Sambu na nki mambu ya mutindu yai ke salamaka? Keti kilumbu kele terorizmea ta mana? Inki mutindu mono lenda zinga ti boma?’ Biblia ke pesa bamvutu ya mbote na bangiufula yai.

Inki mutindu Nzambi ke tadilaka terorizme?

Nzambi ke mengaka mubulu mpi terorizme. (Nkunga 11:5; Bingana 6:16, 17) Yezu, yina kele mumonisi ya Nzambi, nganinaka balongoki na yandi ntangu bo salaka mambu ya mubulu. (Matayo 26:50-52) Ata bantu ya nkaka ke tubaka nde bo ke salaka mambu ya mubulu na zina ya Nzambi, yandi ve muntu ke pesaka bo nzila ya kusala mambu yina. Na kutuba ya kieleka, yandi ke waka nkutu ve ata bisambu na bo.—Yezaya 1:15.

Nzambi ke tulaka dikebi na bantu yonso yina ke monaka mpasi, ata bantu yina ke monaka mpasi sambu na mambu ya bateroriste. (Nkunga 31:7; 1 Piere 5:7) Biblia ke tuba mpi nde Nzambi ta sukisa mubulu.—Yezaya 60:18.

Kisina ya terorizme

Biblia ke tubila kisina ya terorizme. Yo ke tuba nde: “Muntu me yalaka muntu sambu na kupesa yandi mpasi.” (Longi 8:9) Na disolo ya luzingu ya bantu, bamfumu me sadilaka terorizme sambu na kupesa bantu mpasi. Sambu bo ke monisaka bo mpasi, bantu ya nkaka me sadilaka terorizme sambu na kudinwanina.—Longi 7:7.

Nsuka ya terorizme

Nzambi ke sila nde yandi ta manisa boma ti mubulu mpi ta tula ngemba na ntoto. (Yezaya 32:18; Mika 4:3, 4) Yandi ta:

Katula kisina ya terorizme. Nzambi ta katula luyalu ya bantu mpi ta yingisa yo na kimfumu na yandi yina ta yala ntoto ya mvimba. Mfumu ya kimfumu yina kele Yezu Kristu; yandi ta sadila bantu yonso mambu mutindu mosi, mpi yandi ta katula bampasi mpi mubulu. (Nkunga 72:2, 14) Na ntangu yina, ata muntu mosi ve ta sadilaka terorizme. Bantu “ta wa kiese mingi kibeni na ngemba ya mingi.”—Nkunga 37:10, 11.
Katula bampasi yina terorizme me basisaka. Nzambi ta belula bantu na bampasi yina terorizme me natilaka bo, yo vanda bampasi na nitu to na mabanza. (Yezaya 65:17; Kusonga 21:3, 4) Yandi ke sila nde yandi ta futumuna nkutu bantu ya me fwaka, yandi ta vutula bo na luzingu na nsi-ntoto ya ngemba.—Yoane 5:28, 29.

Biblia ke pesa beto bikuma ya mbote ya kundima nde Nzambi ta yidika mambu ntama mingi ve. Kansi nge lenda kudiyula nde: ‘Sambu na nki Nzambi me manisaka ntete ve terorizme?’ Sambu na kubaka mvutu, tala disolo Sambu na Nki Nzambi Me Pesaka Nzila na Bampasi?

a Mbala mingi, ngogo, “terorizme” ke tadilaka kusadila mubulu, mingi-mingi na basivile, sambu na kupesa bo boma mpi kulungisa lukanu mosi ya politiki, ya mambu ya lusambu to ya luzingu. Kansi, beto lenda buya kundima kana bo tuba nde diambu mosi buna kele terorizme to ve.

Biblia ke sadisaka bantu na kunwana ti bampasi

Bandongisila zole yai ya Biblia lenda sadisa nge.

Samba Nzambi.—Bafilipi 4:6, 7.
Tula dikebi na nsangu ya ke pesa kivuvu yina kele na Biblia.—Baebreo 6:19.

Sambu na kubaka bandongisila mingi ya me katuka na Biblia, tala disolo «Comment ne pas vous laisser submerger par l’inquiétude.»

Bambangi ya Yehowa yina me kangaka ntima na terorizme me zwaka lusadisu na bampangi na bo Bakristu. Beto tadila bambandu zole:

Natalya ti mwana na yandi ya bakala Aslan yina kele ti bamvula uvwa, vandaka na ekole na Beslan, na Russie, ntangu bateroriste yina vandaka ti minduki kotaka kuna mpi kangaka bantu kuluta 1 000. Yo kele mawa sambu, bantu mingi fwaka, mpi mingi na bo vandaka bana. Ata Natalya ti Aslan fwaka ve, bo kumaka kuniokwama na mabanza sambu na yo. Tala mambu yina me sadisaka bo na kubeluka.
Pablo na Sophie, fwisaka mwana na bo ya bakala ntangu bo bwisaka ba Tours jumelles na New York. Tala video yai sambu na kumona mambu yina sadisaka bo mpi bantu ya nkaka yina mambu ya bateroriste me natilaka bampasi.