Baka Mambote ya Kimenga ya Yezu
Konso mvula, Bambangi ya Yehowa mpi bamilio ya bantu ya nkaka yina bo ke bingisaka na ntoto ya mvimba ke vukanaka sambu na Kuyibuka lufwa ya Yezu kaka mutindu yandi pesaka nsiku. (Luka 22:19) Nkinsi yai ke sadisaka beto na kuzaba mbote-mbote mfunu ya kima yina Yezu salaka ntangu yandi pesaka luzingu na yandi sambu na bantu. Yo ke sadisaka beto mpi na kuzaba inki kimenga yina yandi pesaka ke tendula sambu na beto bubu mpi na bilumbu ke kwisa.—Yoane 3:16.
Yo vanda nge kwendaka na Nkinsi yango ya mvula yai to ve, inki mutindu nge lenda bakila lufwa ya Yezu mambote? Yezu longaka nde beto fwete sala mambu yai zole ya mfunu:
1. Kulonguka na kuzaba Nzambi mpi Yezu. Yezu sambaka Tata na yandi ya kele na zulu mpi tubaka nde: “Luzingu ya mvula na mvula ke tendula nde, bo zaba nge, Nzambi mosi kaka ya kieleka, mpi muntu yina nge tindaka, Yezu Kristu.”—Yoane 17:3.
2. Kusadila mambu ya nge ke longuka. Yezu bendaka dikebi na beto mpi monisaka nde beto fwete sadila malongi na yandi na luzingu na beto. Mu mbandu, na nsuka ya Disolo yina me zabanaka mingi ya yandi salaka na zulu ya Ngumba, yandi sikisika konso muntu yina “ke wa bangogo na [yandi] mpi ke sadila yo.” (Luka 6:46-48) Kiteso mosi, yandi tubaka kilumbu ya nkaka nde: “Kana beno me zaba mambu yai, beno ta vanda na kiese kana beno ke sala yo.”—Yoane 13:17.
Nge ta sepela kuzaba mambu mingi na yina me tala Nzambi mpi Yezu? Nge kele na mfunu ya bandongisila na yina me tala mutindu nge lenda sadila mambu ya nge ke longuka? Yai kele mwa mambu yina lenda sadisa nge.
Kulonguka Biblia
Beto ke longukaka Biblia ya ofele ti bantu. Yo me sadisaka bantu mingi na kulonguka mbote-mbote Biblia mpi na kusadila mambu ya bo ke longuka.
Tala lutiti Kulonguka Biblia ti Mbangi Mosi ya Yehowa sambu na kuzaba mambu mingi na yina me tala kulonguka yango.
Tala video Mutindu Kulonguka ya Biblia Ta Salamaka sambu na kuzaba mutindu Bambangi ya Yehowa ke longukaka Biblia ti bantu.
Balukutakanu ya Bambangi ya Yehowa
Beto Bambangi ya Yehowa, beto ke vukanaka mbala zole konso mposo na bisika na beto ya lusambu ya beto ke bingaka Nzo ya Kimfumu. Na balukutakanu yango, beto ke tubilaka Biblia mpi mutindu beto lenda sadila malongi na yo na luzingu na beto.
Bantu yonso lenda kwisa na balukutakanu yango; yo ke lombaka kaka ve nde nge vanda Mbangi ya Yehowa. Na kutadila mutindu mambu ke salamaka kisika nge kele, nge lenda pona kukwenda na balukutakanu yango kimuntu-kimuntu to kulanda yo na nzila ya video.
Tala video Inki Ke Salamaka na Nzo ya Kimfumu? sambu na kuzaba na ntwala mambu yina nge ta mona na balukutakanu yai.
Sambu na kuzwa kisika mosi ya pene-pene, tala lutiti Balukutakanu ya Dibundu ya Bambangi ya Yehowa.
Masolo mpi bavideo ya kele na Internet
Masolo mpi bavideo mingi ya kele na site Internet na beto lenda sadisa na nge na kuzaba mambu mingi na yina me tala malongi ya Yezu mpi mfunu ya lufwa na yandi.
Mu mbandu, sambu na kuzaba inki mutindu lufwa ya muntu mosi lenda natila bamilio ya bantu mambote, tanga disolo “Yezu Ke Gulusaka—Inki Mutindu?” mpi disolo “Sambu na Nki Yezu Monaka Mpasi mpi Fwaka?” to tala video Sambu na Nki Yezu Fwaka?