Bitumba na Israël mpi na Bansi ya Kele Pene-Pene ti Yo—Inki Biblia Ke Tuba?

Na nsi-ntoto ya mvimba bantu ke wa boma sambu na bitumba yina États-Unis mpi Israël ke nwana ti insi Iran. Keti mambu ta beba diaka ngolo mpi bitumba yai ta kota mpi na bansi mingi ya nkaka? Keti bamfumu ya ntoto lenda sala nde bitumba kusalama diaka ve mpi nde ntoto ya mvimba kukuma na ngemba?

Bantu yina me tangaka dezia mambu yina Biblia me tubaka na ntwala mpi ya ke salama bubu lenda kudiyula kana bitumba yina ke salama na Israël mpi na bansi yina kele pene-pene kele luyantiku ya bitumba ya Armagedoni yina Biblia me tubilaka dezia na mukanda ya Kusonga.

Inki Biblia ke tuba?

Keti bamfumu ya ntoto ta manisa bitumba ya ke salama na Israël mpi na bansi ya pene-pene?

Biblia ke tuba nde: “Beno tula ve ntima na bamfumu to na mwana ya muntu, yina lenda gulusa ve.”—Nkunga 146:3.

Beto me zaba ve kana bamfumu ya ntoto ta kuka kutula ngemba na kitini yina ya ntoto. Kansi Biblia ke tubaka pwelele nde ata mfumu mosi ve ya politiki, ata guvernema mosi ve mpi ata kimvuka mosi ve ya bantu lenda manisa bitumba mpi kutula ngemba na ntoto. Nzambi mpamba muntu kele ti ngolo ya ‘kumanisa bitumba na ntoto ya mvimba.’—Nkunga 46:9.

• Sambu na kuzaba mambu mingi, tanga zulunalu Nzozulu ya Nkengi ya kele ti ntu-diambu “Bitumba Ta Mana—Inki Mutindu?”

Keti bitumba yina ke salama na Israël mpi na bansi ya pene-pene ke lungisa mambu yina Biblia me tubaka dezia?

Biblia ke tuba nde: “Beno ta wa makelele ya bitumba mpi bansangu ya bitumba. . . . Insi mosi ta nwanisa insi ya nkaka mpi kimfumu mosi ta nwanisa kimfumu ya nkaka.”—Matayo 24:6, 7.

Bitumba yina ke salama na Israël mpi na bansi ya kele pene-pene ti yo kele na kati ya mambu yina ke monisa kibeni nde beto ke zinga na nsuka ya nsi-ntoto yai, mpi Biblia ke bingaka nsuka yango ya nsi ntoto nde “bilumbu ya nsuka.” (Matayo 24:3; 2 Timoteo 3:1) Bitumba ya beto ke mona bubu ke monisa nde ntama mingi ve Nzambi ta manisa bitumba kima yai ya ke natila bantu bampasi na ntoto.

• Sambu na kuzaba mambu mingi, tanga disolo “Inki Kele Kidimbu ya ‘Bilumbu ya Nsuka’ to ‘Ntangu ya Nsuka’?”

Keti Armagedoni Ta Yantika na Israël?

Biblia ke tuba nde: “Bo vukisaka bo na kisika yina bo ke bingaka na Kiebreo nde Armagedoni.”—Kusonga 16:16.

Armagedoni kele ve bitumba yina me yantika kusalama na Israël mpi na bansi ya pene-pene mpi yina bamfumu ya ntoto ke nwana. Kansi yo kele bitumba yina ta salama na ntoto ya mvimba. Yo ta vanda bitumba yina bamfumu ya ntoto ta nwana ti Nzambi.

• Sambu na kuzaba mambu mingi, tanga disolo “Bitumba ya Armagedoni Kele Nki?”

Inki lenda sadisa beto na kudiyangisa ve ntangu mambu mingi ya mpasi ke salama?

Biblia ke tuba nde: “Beno kudiyangisa ve sambu na konso kima yina, kansi na mambu yonso na nzila ya kisambu mpi ntangu beno ke bondila ti kupesa matondo, beno zabisa Nzambi mambu ya beno ke lomba.”—Bafilipi 4:6.

Yehowaa Nzambi ke zola nde beto sambila yandi. Nzambi ke tudilaka beto dikebi, yo yina yandi ta wa bisambu na beto mpi yandi ta sadisa beto na kudiyangisa ve. (1 Piere 5:7) Sambu na kumonisa nde yandi ke tudilaka beto dikebi, yandi ke tendudilaka beto sambu na nki bitumba ke salama mpi yandi ke songaka beto mutindu yo ta mana. Yandi ke songaka beto mpi inki yandi ta sala sambu na kumanisa bampasi ya beto ke mona.—Kusonga 21:3, 4.

• Sambu na kuzaba mambu mingi na yina me tala mutindu Nzambi ke sadisaka beto, tanga disolo “Keti Mono Lenda Zwa na Biblia Bangindu Yina Lenda Pesa Mono Kikesa?.”