Yezu Futumukaka ti Nitu ya Kimpeve to Nitu ya Kinsuni?

Mvutu ya Biblia

Biblia ke tuba sambu na Yezu nde: “Bo fwaka yandi na kinsuni, kansi Nzambi futumunaka yandi na mpeve.”—1 Piere 3:18; Bisalu 13:34; 1 Bakorinto 15:45; 2 Bakorinto 5:16.

Mambu yina Yezu tubaka yandi mosi monisaka nde yandi ta futumuka ve ti nitu ya kinsuni mpi menga. Yandi tubaka nde yandi ta pesa ‘nsuni na yandi sambu na luzingu ya nsi-ntoto,’ sambu na kugulusa bantu. (Yoane 6:51; Matayo 20:28) Kana Yezu vutukilaka nitu na yandi ya kinsuni ntangu yandi futumukaka, kimenga yina yandi pesaka zolaka ve kuvanda mfunu. Kansi mambu salamaka ve mutindu yina, sambu Biblia ke tuba nde yandi pesaka nitu na yandi mpi menga na yandi “mbala mosi mpamba.”—Baebreo 9:11, 12.

Kana Yezu futumukaka ti nitu ya kimpeve, ebuna nki mutindu balongoki na yandi monaka yandi?

• Bigangwa ya kimpeve lenda baka nitu ya kinsuni. Mu mbandu, bawanzio salaka yo na ntangu ya ntama, nkutu bo diaka kisika mosi ti bantu mpi bo nwaka ti bo. (Kuyantika 18:1-8; 19:1-3) Ata bo salaka mpidina, bo vandaka kaka bigangwa ya kimpeve mpi bo lendaka kuyambula ntoto sambu na kuvutuka na zulu.—Bazuzi 13:15-21.

• Na nima ya lufutumuku ya Yezu, yandi bakaka mpi nitu ya kinsuni sambu na ntangu fioti, kaka mutindu bawanzio me salaka yo na ntwala. Kansi mutindu yandi vandaka kigangwa ya kimpeve, yandi lendaka kubasikila bantu mpi kuvila mbala mosi. (Luka 24:31; Yoane 20:19, 26) Nitu ya kinsuni yina yandi vandaka kubaka sambu na kubasikila bantu vandaka ve ya mutindu mosi. Yo yina, ata banduku na yandi vandaka kuzaba yandi kaka na mambu yina yandi vandaka kutuba mpi kusala.—Luka 24:30, 31, 35; Yoane 20:14-16; 21:6, 7.

• Ntangu Yezu basikilaka ntumwa Toma, yandi lwataka nitu yina vandaka ti bidimbu ya bamputa. Yandi salaka buna sambu na kupusa Toma na kundima, sambu Toma vandaka kundima ve nde Yezu me futumuka.—Yoane 20:24-29.