Keti Yo Kele ti Bansiku Yina Bambangi ya Yehowa Ke Landaka na Yina Me Tala Kutalana Sambu na Makwela?

Beto Bambangi ya Yehowa, beto ke ndimaka nde bandongisila mpi bansiku ya kele na Biblia, lenda sadisa beto na kubaka balukanu yina ta sepedisa Nzambi mpi ta natila beto mambote. (Yezaya 48:17, 18) Beto ve bantu me basisaka bandongisila mpi bansiku yina, kansi beto ke zitisaka yo na luzingu na beto. Beto tadila mwa bandongisila mpi bansiku ya me tala kutalana sambu na makwela.a

• Makwela fwete wumela dibela. (Matayo 19:6) Mutindu Bambangi ya Yehowa ke monaka nde kana bantu me sala bangwisana ya zola yo fwete nata bo na kukwelana, beto ke bakaka yo ve na nsaka.

• Bantu ya fwete talana sambu na makwela kele kaka bayina me fwana na kukwelana. Bantu yango fwete “lutisa nsungi ya kileke,” to ntangu yina mpusa ya kuvukisa nitu ke vandaka ngolo.​—1 Bakorinto 7:36.

• Bantu yina ke talana sambu na makwela kele ti nswa ya kukwelana. Na meso ya Nzambi, bantu yina me fwaka makwela na leta lenda kwela ve sambu kikuma kaka mosi yina nsiku ya Nzambi ke pesaka nswa na kufwa makwela kele pite.​—Matayo 19:9.

• Biblia ke songaka Bakristu yina ke zola kukwela nde bo fwete kwela kaka Mukristu yina kele bonso bo. (1 Bakorinto 7:39) Bambangi ya Yehowa ke monaka nde nsiku yango ke lombaka kukwela kaka Mbangi ya Yehowa yina me bakaka mbotika, mpi ke sadilaka malongi yango, kansi ve muntu yina ke sepelaka ti malongi na beto. (2 Bakorinto 6:14) Banda ntama, Nzambi ke lombaka bantu yina ke sambilaka yandi na kukwela kaka bantu yina ke sambilaka yandi mpi. (Kuyantika 24:3; Malaki 2:11) Nsiku yai kele mfunu tii bubu, mutindu bansosa ya bilumbu na beto me monisa yo.b

• Bana fwete lemfukila bibuti na bo. (Bingana 1:8; Bakolosai 3:20) Sambu na bana yina kele na nzo ya bibuti, kulemfuka ke tendula mpi kundima balukanu yina bibuti me bakaka na yina me tala kutalana ti muntu sambu na makwela. Bibuti lenda zenga bamvula yina mwana fwete vanda ti yo sambu na kuyantika kutalana ti muntu ya nkaka sambu na makwela mpi mambu ya nkaka yina bo ta bikila yandi nzila ya kusala.

• Na kulanda bandongisila yina kele na Biblia, Bambangi ya Yehowa bo mosi ke ponaka kana yo ke lomba nde, bo talana ti muntu sambu na makwela mpi nani bo ta talana ti yandi. Mambu yai ke wakana ti dibanza yai ya Biblia: “Konso muntu ta nata kilo na yandi mosi.” (Bagalatia 6:5) Ata mpidina, kana bo ke zola kutalana ti muntu sambu na makwela, Bambangi mingi ya Yehowa ke sosaka bandongisila na Bambangi ya nkaka ya Yehowa yina kele ya kuyela na kimpeve mpi ya ke zolaka mambote na bo.​—Bingana 1:5.

• Mambu mingi yina bantu ke salaka ntangu bo ke talana sambu na makwela ke vandaka masumu ya nene. Mu mbandu Biblia ke pesa beto nsiku nde, beto fwete tina pite. Yo kele kaka ve kulala ti muntu; yo ke tadila mpi mambu yonso ya mvindu yina bantu zole ya me kwelanaka ve lenda sala mu mbandu, kusimba-simba kitini ya nitu ya kuvukisila nitu ya nkento to ya bakala, kufeta yo to kuvukisa nitu na nzila ya kunenina. (1 Bakorinto 6:9-11) Kusala mambu yina ke tedimisaka nzala ya kuvukisa nitu na muntu yina kele ve nkwelanani na nge, ata beno me vukisa ve nitu, kele “mambu ya mvindu” mpi yo ke sepedisaka ve Nzambi. (Bagalatia 5:19-21) Biblia ke buyisaka mpi masolo yina bantu ke tubaka “mambu ya nsoni.”​—Bakolosai 3:8.

• Ntima to kimuntu na beto ya kati kele luvunu. (Yeremia 17:9) Yo lenda pusa muntu na kusala mambu yina yandi me zaba nde yo kele mbi. Sambu ntima kukusa bo ve, bantu zole yina ke talana fwete buya kuvanda kisika yina bo kele kaka bo zole sambu bo bwa ve. Bo lenda mona nde yo ta vanda mbote nde, bo kutanaka kisika mosi ti banduku ya mbote to mpi bo vanda kisika mosi ti muntu mosi ya lenda sadisa bo sambu bo bwa ve. (Bingana 28:26) Mukristu yina me kwelaka ve mpi ya ke sosa muntu ya kukwelana ti yandi ke zabaka nde, kuzola muntu na nzila ya Internet ke vandaka ti bigonsa, mingi-mingi kigonsa ya kuzolana ti muntu yina nge me zaba ve mbote.​—Nkunga 26:4.