Keti Muntu Lenda Yambula Kuvanda Mbangi ya Yehowa?

Ee. Muntu lenda katuka na dibundu na beto na mitindu zole:

• Kana yandi mosi me lomba. Muntu lenda tuba to yandi lenda sonika mukanda sambu na kumonisa nde, yandi ke zola diaka ve kuvanda Mbangi ya Yehowa.

• Na mambu ya yandi me sala. Muntu lenda sala kima mosi ya lenda sala nde yandi vanda diaka ve na dibundu na beto. (1 Piere 5:9) Mu mbandu, yandi lenda kwenda kuvukana na dibundu ya nkaka mpi kumonisa nde, yandi ke zola kubikala na dibundu yina.—1 Yoane 2:19.

Kana muntu ke kwenda diaka ve kulonga bantu to yandi me yambula kuvukana ti beno na balukutakanu na beno, beno ke tadilaka yandi bonso nde yandi me katuka na dibundu na beno?

Ve, beto ke tadilaka yandi ve mpidina. Kudikatula na dibundu to kuyambula dibundu kele ve kiteso mosi ti kulemba na kimpeve. Mbala mingi, bantu yina ke lembaka nitu to ke yambulaka kusala mambu yina dibundu na beto ke lombaka, bo ke yambulaka ve kundima na bo kansi bo ke kutanaka ti bampasi yina ke salaka nde bo lemba na kimpeve. Na kisika ya kukula bantu ya mutindu yina, beto ke salaka yonso sambu na kupesa bo kikesa mpi kusadisa bo. (1 Batesalonika 5:14; Yude 22) Kana muntu kele ti mfunu ya lusadisu, bampangi yina ke twadisaka dibundu ke salaka yonso sambu na kusadisa yandi na kimpeve.—Bagalatia 6:1; 1 Piere 5:1-3.

Ata mpidina, bampangi yina ke twadisaka mambu na dibundu ke kangaka ve bantu na kingolo-ngolo to ke dindamanaka ve nde bantu kulanda kaka kuvanda Bambangi ya Yehowa. Na mambu ya lusambu, konso muntu ke bakaka lukanu na yandi mosi. (Yozue 24:15) Beto ke ndimaka nde, bantu yina ke sambilaka Nzambi fwete sambila yandi na luzolo na bo mosi, bo fwete sambila yandi na ntima ya mvimba.—Nkunga 110:3; Matayo 22:37.