Kimvuka mpi kisalu na ntoto ya mvimba

Ikele na mambu mingi ya kekuvukanisa beto sambu na yina ketadila lutwadisu ya kisalu ya kupesa kimbangi na ba nsi kuluta 212. Lutwadisu ya nene kesalamaka tuka Collège central, ya ke na ntu-mbanza ya ntoto ya mvimba na Brooklyn (New York). Collège central ketindaka konso mvu na ba “zones” 15, to kuluta, ya mekabulama na ntoto ya mvimba sambu na kusolula na bamonisi to na bareprezanta ya bafilyali ya konso zone. Bafilyali ke na bakomité ya mesalama na bantu tatu to nsambwadi, na kati na bau konso muntu ke na mukumba ya kukengidila mpi ya kudyatisa bisalu na nsi yina mepesama na bau. Bafilyali mingi ke na binyeminu, kati na yau yankaka ke na bamasini ya kuluta ntinu ya kebingama rotatives. Nsi (to teritwar) yina mepesama na konso filyali mekabwana na badistrike, badistrike mekabwana na banzyunga to na ba circonscriptions. Konso nzyunga ke na mabundu kiteso ya makumi zole. Nkengi ya distrike ketalaka mbala na mbala konso nzyunga ya distrike yina yandi kesadila. Balukutakanu kesalamaka mbala zole na mvu sambu na konso nzyunga. Sambu na nkengi ya nzyunga, kisalu nandi ke ya kutala konso dibundu ya nzyunga nandi (mbala mingi yau kesalamaka mbala zole na mvu). Yandi kesadisaka ba Témoins na kutomisa mpi na kusala kisalu ya kusamuna na teritwar yina mepesama na dibundu na bau.

Dibundu ya konso bwala ti Salle du Royaume na yau ke sika ya kemwangisa nsangu ya mbote na nzyunga to na mbanza yina bau kezinga. Teritwar yina pesamaka na konso dibundu mekabulama na bateritwar ya fyotifyoti. Yau kepesamaka na konso Témoin, sambu na kusadila yau mpi bau kesalaka bikesa na kukutana ti bantu yonso yina ke na teritwar na bau. Konso dibundu, yina ntalu ya bantu mesobana (ba Témoins kiteso ya 200), ke na bankuluntu sambu na kudyatisa bisalu ya mpila na mpila. Na kingenga, konso nsamuni ya nsangu ya mbote ke muntu ya kuluta mfunu na kati ya kimvuka ya ba Témoins de Jéhovah. Ba Témoins yonso, ata yau vanda inki sika bau kesala (na ntu-mbanza ya ntoto ya mvimba, to na bafiliyali to na mabundu), kepesaka ntangu na bau na kisalu ya kusamuna. Bau kekudipesa kisalu na zola yonso sambu na kukwenda kusolula na bankweno na bau mambu ya Kimfumu ya Nzambi.

Barapor yonso ya kisalu ya kusamuna kekumaka na ntu-mbanza ya ntoto ya mvimba, kuna bau kevukisaka yau sika mosi mpi kebasisaka yau na Annuaire. Konso mvu bau kebasisaka mpi barapor yango na nimero ya La Tour de Garde ya le 1 janvier. Kati na mikanda yai zole kebasikaka masolo ketadila mambu yina kumilaka ba Témoins de Jéhovah na kutadila mbutu yina bau bakaka na mvula ya mvimba na kisalu ya kupesa kimbangi sambu na Jéhovah mpi Kimfumu nandi ya mesiya. Na Annuaire 1990, ba Témoins mpi bantu yina kuyangalalaka na nsangu ya Bible bayina kukwisaka na Lusungiminu vandaka na ntalu ya 9 950 058, lubambuku ya lufwa ya Yezu, yina salamaka na 1989. Ba Témoins de Jéhovah lutisaka na kisalu ya kusamuna nsangu ya mbote bangunga kuluta 895 229 424 mpi ntalu ya bantu yampa yina kubakaka mbotika vandaka 301 518. Sambu na yina ketadila mikanda yina bau pesaka, yau kabulamaka na bankama ya bamiliyo.