Organizasio ti kisalu na bo na Inza ya mvimba

MAMBU kele mingi ya bo kesadilaka sambu na kutwadisa kisalu ya kuta kimbangi na bansi kuluta 230 yina bo kesalaka kisalu yango. Lutwadisu ya mambu yonso kekatukaka na Nto-Kimvuka yina kevandaka na ntu-mbanza na Brooklyn, na New York. Nto-Kimvuka ketindaka ba mimonisi konso mvula na bansi ya kuswaswana ya inza ya mvimba sambu na kusolula ti mimonisi ya bafiliale ya bansi yina. Na babiro ya filiale, kevandaka ti Bakomite ya Filiale yina kevandaka ti bantu tatu to nsambwadi ya ketalaka kisalu na bansi yina kevandaka na kiyeka na bo. Bafiliale mingi kele ti banzo ya bo kenyeminaka mikanda, bankaka kevandaka ti bamashini ya kenyemaka mikanda na vitesi mosi ya kuluta ngolo. Nsi to teritware yina konso filiale ketalaka kele ya kukabula na badistrike, ye badistrike mekabwanaka na banzyunga. Konso nzyunga kele na mabundu kiteso ya 20. Nkengi ya distrike kekwendaka kutala banzyunga yina kele na distrike na yandi. Balukutakanu zole kesalamaka konso mvula na konso nzyunga. Nkengi ya nzyunga mpi kevandaka, yandi ketalaka konso dibundu ya nzyunga na yandi mbala zole na mvula mosi, sambu na kusadisa Bambangi na kubongisa mpi na kusala kisalu ya kusamuna na teritware yina bo mepesaka dibundu yango.

Dibundu yina kele na konso bwala ti Nzo ya Kimfumu na yo kele santre ya kesalaka kisalu ya kusamuna nsangu ya mbote na kisika yina nge kezingaka. Bateritware yina bo mepesaka na konso dibundu bo mekabisaka yo na bateritware ya fyoti-fyoti. Bo kepesaka bateritware yango na konso Mbangi yina kezola kusala ngolo sambu na kutala mpi kusolula ti bantu na konso nzo yina kele na teritware yango. Konso dibundu, yina kevandaka ti Bambangi banda ntalu ya fyoti tii kiteso ya 200, kevandaka ti bankuluntu yina kevandaka ti mukumba ya kulungisa bisalu ya mutindu na mutindu. Konso nsamuni ya nsangu ya mbote kevandaka na mfunu na kati ya organizasio ya Bambangi ya Yehowa. Konso Mbangi, ata yandi kesalaka na ntu-mbanza, na bafiliale, to na mabundu, kesalaka kisalu yai ya bilanga ya kutubila bantu yankaka mambu yina metala Kimfumu ya Nzambi.

Nsukansuka, barapore ya kisalu yai yonso ya bo kesalaka bo ketindaka yo na ntu-mbanza, kisika bo kevukisaka yo sambu na kubasisa mukanda Annuaire yina ketubilaka mambu ya kulutaka na mvula ya mvimba. Bo kebasisaka dyaka rapore ya mvula ya mvimba na lupangu mosi ya kebasikaka na Nzozulu ya Nkengi ya Yanuari 1. Mikanda yai yonso zole kepesaka barapore ya konso mvula ya bisalu yina kusalamaka sambu na kuta kimbangi ya Yehowa mpi ya Kimfumu na yandi yina kele na kiyeka ya Kristu Yezu. Na bamvula yai mekatuka kuluta, Bambangi ti bantu yina kesepelaka na kyeleka kiteso ya 14 000 000 vandaka kusungimina konso mvula Lusungiminu ya lufwa ya Yezu. Konso mvula, Bambangi ya Yehowa kesalaka bangunga kuluta 1 000 000 000 na kisalu ya kusamuna nsangu ya mbote, mpi bantu ya mpa kuluta 300 000 kebakaka mbotika. Kimvuka ya bakopi ya mikanda ya bo kekabulaka kekumaka bankama ya bamilio.