Kapu 76

Yezu Kedya ti Mufarize

NA NIMA ya Yezu mepesa mvutu na bambeni yina vandaka kubefula nto ya ngolo na yandi ya yandi kubeludilaka muntu yina kuvandaka kutuba ve, Mufarize mosi mebingisa yandi sambu na kudya. Na ntwala bau kudya, Bafarize mekota na nsiku ya bambuta ya kuyobisa maboko na bau tii na kinkoso. Bau kesalaka yau na ntwala mpi na nima ya madya ata nkutu sambu na kudya madya ya nkaka. Ata nkutu nsiku ya bambuta kefwaka ve nsiku ya Nzambi ya kusonama, yau kelutisa ndilu na mambu yina ya Nzambi kelombaka sambu na yina metala ngedila ya mambu.

Ntangu Yezu melemfukila ve nsiku ya bambuta, muntu ya kubingisaka yandi keyituka. Ata nkutu yandi metuba ve, Yezu mebakisa kuyituka na yandi mpi metuba nde: “Beno Bafarize, beno tala mutindu beno kele: beno ke sukulaka makopa ti malonga na nganda kaka. Kansi na kati ya ntima na beno beno me fulukaka na mabanza ya kubaka bima ya bantu ya nkaka na kingolo-ngolo, ntima na beno kele mpi ntima mosi ya nku. Beno bazoba yai! Keti Nzambi yina salaka nganda, yandi salaka mpi kati ve?”

Mpila yina, Yezu kutungululaka luvunu ya Bafarize yina keyobisaka maboko na bau na kikalulu ya nsiku ya bambuta kansi keyobisaka ve bantima na bau sambu na kukatula mambi. Yandi kepesa ndongisila nde: “Beno pesa bima yina kele na kati na beno bonso matabisi ya nkenda, mpi, tala! bima yonso takuma ya kugedila sambu na beno.” (NW) Kupesa na bau fwete kupusama na ntima ya zola, na mpusa ya kuyitukisa bantu ya nkaka ve ti lunungu na bau ya luvunu.

Yezu kelanda nde: “Kansi mawa na beno Bafarize! Matiti yina ke pesaka ntomo na madia, bonso mente ti rue ti matiti ya mutindu na mutindu, beno ke kabisaka yo na ndambu kumi ebuna ndambu mosi beno ke pesaka Nzambi makabu, kansi beno ke zolaka kusala bantu mambu ya mbote ve, beno ke zolaka Nzambi ve. Mambu ya beno zolaka kusala yo yina ti mambu yina ya nkaka mpi.” Nsiku ya Nzambi kupesaka na bantu ya Izraele kelombaka nde bau kupesa dikumi to kitini mosi na kati ya bitini kumi, ya mbutu ya bilanga. Mente ti rue kele bimenina to matiti ya bau kesadilaka sambu na kutula nsunga na madya. Bafarize kepesa dikumi mbotembote ata nkutu ya bimenina ya kukonda mfunu, kansi Yezu mebedisa bau na mpila bau kesadila ve malombu ya kuluta mfunu sambu na kumonisa zola, bumbote, mpi kuvanda na bukatikati.

Na kubedisaka bau dyaka, Yezu ketuba nde: “Mawa na beno Bafarize! Beno ke zolaka bakiti ya ntete na banzo ya bisambu. Beno ke zolaka nde bantu kupesa beno mbote na bazandu. Mawa na beno! Sambu beno kele bonso maziamu [ya mbambukilu, NW] yina ke monikaka ve, ti ya bantu ke niataka kukonda kuzaba nde awa ke na maziamu.” Kukonda kugedila na bau kemonanaka ve na meso. Dibundu ya Bafarize kemonisaka kitoko na nganda kansi na kati yau kele ya kupola! Yau kele ya kutungama na luvunu.

Ntangu bau mewa lubedisu ya mutindu yina, muntu mosi ya Bansiku, mosi na kati ya bantu yina mekudipesaka mingi na Nsiku ya Nzambi, mebokuta nde: “Longi, kana nge ke tuba mpidina, si nge ke vwenza beto mpi!”

Yezu memonisa nde bantu ya bansiku yai ya ngikana mpi kele na nto ya makambu, na kutubaka nde: “Mawa na beno mpi [bantu ya mekudipesaka na, NW] Bansiku! Sambu beno ke pesaka bantu kilo mingi, kansi beno mosi ke simbaka yo ve, ata na musapi mosi. Mawa na beno! Beno ke tungaka maziamu ya kitoko sambu na baprofete yina ya bankaka na beno fwaka.”

Bakilo ya Yezu ketubila kele bansiku ya bambuta, kansi bantu ya Bansiku yai kezola ve kukatula na yau ata ndambu sambu na kulembika bantu. Yezu kesonga nde bau kendimaka nkutu kugondama ya bambikudi mpi yandi kekebisa nde: “Katuka [na lugangu ya inza, NW] katuka ntangu ya bo fwaka Abele tii na ntangu bo fwaka Zakaria . . . na kati ya mesa-kimenga ti [inzo, NW]. E, mono ke tubila beno nde bantu ya ntangu yai [bau talomba bau menga, NW] sambu na bantu yina ya bankaka na bo fwaka.”

Ee, inza ya bantu ya kusumbama kuyantikaka ti lubutuku ya bana ya Adami ti Eva; mpila yina, Abele kuzingaka na “lugangu ya inza.” (NW) Na nima ya kugondama ya nku ya Zakaria, insi ya Yuda kubungukaka na mvita ya bantu ya Siria. Kansi Yezu ketubila na ntwala mbungulu ya kuluta nene ya mbandu ya ntangu na yandi sambu na mambi na yau ya kuluta mingi. Mbungulu yai kusalamaka kiteso ya bamvula 38 na nima, na mvu 70 T.B.

Na kulandaka lubedisu na yandi, Yezu ketuba nde: “Mawa na beno [bantu ya Bansiku, NW]! Sambu beno me katulaka fungula ya [nzayilu, NW]. Beno mosi me kotaka ve, ebuna beno me kangaka nzila na bantu ya nkaka yina zolaka kukota!” Mukumba ya ntete ya bantu ya Bansiku kele ya kutendula Ndinga ya Nzambi na bantu, na kukondaka kukanga ntendula na yau. Kansi bau kesalaka yau ve mpi nkutu bau keyimina bantu dibaku ya kubakisa.

Bafarize ti bantu ya Bansiku mewila Yezu makasi sambu yandi ketungulula bau. Ntangu yandi kekatuka na nzo, bau meyantika na kutelamanina yandi ngolo kibeni mpi na kuyangisaka yandi ti bangyufula. Bau kesosa na kunata yandi na kutuba kima mosi yina ya bau lenda kukangila yandi. Luka 11:​37-54; Kulonga 14:22; Mishe 6:8; 2 Bansangu 24:​20-25.

▪ Sambu na inki Yezu mebedisa Bafarize ti bantu ya Bansiku na yina metala Nsiku?

▪ Inki bakilo bantu ya Bansiku ketulaka na zulu ya bantu?

▪ “Lugangu ya inza” kubandaka inki ntangu?