Kapu 110

Yandi Memanisa Kisalu na Tempelo

YEZU kemonana mbala ya nsuka na tempelo. Ya kyeleka, yandi kesukisa kisalu na yandi na meso ya bantu yonso na zulu ya ntoto katula mambu yina metala kusambisama ti kugondama na yandi, yina tasalama na nima ya bilumbu tatu. Ntangu yai yandi kelanda na kunganina balongi ya Bansiku ti Bafarize.

Yandi metuba dyaka mbala tatu nde: “Mawa na beno, balongi ya Bansiku ti Bafarize!” Ntete, yandi kutubilaka bau nde bau kele na mpasi sambu bau vandaka kugedisa kaka “makopa ti malonga na nganda, kansi na kati [bau] me fulusaka yo na bima ya [bau] ke bakaka na kingolo-ngolo ti na nzala na [bau] ya kubaka bima sambu na [bau] mosi kukonda kuyindula bantu ya nkaka.” Ebuna yandi kesyamisa bau nde: “Sukula ntete bima yina kele na kati ya dikopa, ebuna na nganda mpi yo ta vanda na mvindu ve.”

Na nima yandi melosila balongi ya Bansiku ti Bafarize mpasi sambu na kupola ya mabanza na bau ya bau kesosa kubumba na vumi ya nganda. Yandi ketuba nde: “Beno me fwanana na maziamu yina ya bo me pakulaka lupemba; na nganda yo ke monikaka ya kitoko, kansi na kati yo me fulukaka na mikwa ya bantu yina me fwaka ti na bima mingi ya kupola.”

Na nsuka, luvunu na bau memonana na luzolo na bau ya kutunga bamazyamu sambu na bambikudi mpi na kupakula yau lupemba sambu na kubenda dikebi na bisalu na bau mosi ya bumbote. Kansi, mutindu Yezu kesonga, bau “kele bana ya bantu yina fwaka baprofete!” Ya kyeleka, konso muntu yina kemeka na kutungulula luvunu na bau kele na kigonsa!

Na kulandaka, Yezu ketuba na ngolo yonso bangogo ya kuzenga nkanu. Yandi ketuba nde: “Banyoka, bana ya biwuta, inki mutindu beno tatina mfundusu ya Gehenna?” (NW) Gehenna kele muwanda ya bau vandaka kusadila sambu na kulosa mvindu ya bantu yonso na Yeruzalemi. Na yau, Yezu ketuba nde na kulandaka nkadilu na bau ya mambi, balongi ya Bansiku ti Bafarize tafwa kimakulu.

Sambu na yina metala bantu yina ya yandi tindaka bonso bantumwa na yandi, Yezu ketuba nde: “Beno ta fwa bantu ya nkaka na kati na bo, beno ta tula bankaka na zulu ya [nti, NW]; beno ta bula bankaka fimbu na banzo na beno ya bisambu, beno ta kwendaka [kunyokula] bo na babwala yonso. Mpidina, ndola yina ya bantu yina lungaka kubaka sambu bo fwaka bantu ya salaka mbi ve, ndola yina ta kwisa kubwila beno. Beno ta baka ndola yina sambu na kufwa ya beno fwaka bantu yonso, katuka ntangu ya beno fwaka Abele yina salaka mbi ve, tii na ntangu ya beno fwaka Zakaria mwana ya Barakia [ya bau kebingaka Yoyada na mukanda ya zole ya Bansangu] yina ya beno fwaka na kati ya kisika ya nsiku ti mesa-kimenga . . . Mono ke tubila beno mambu ya kieleka: Ndola yina ta kwisa kubwila bantu ya ntangu yai sambu na mambu yina yonso.”

Sambu Zakaria kunganinaka bamfumu ya Izraele, “[bau sadilaka yandi mfundu, NW] ebuna ntotila pesaka bo nzila na kulosa yandi matadi na kati ya lupangu ya nzo [ya Yehowa, NW].” Kansi, mutindu Yezu kutubaka na ntwala, Izraele tafuta menga ya lunungu yonso yina kutyamukaka. Bau tafuta yau na nima ya bamvula 37, na mvu 70 T.B., ntangu basoda ya Roma tafwa Yeruzalemi mpi Bayuda kuluta fuku mosi.

Mutindu Yezu ketadila mvwandilu yai ya kepesa boma, Yezu mewa mawa ya mingi. Yandi metuba dyaka nde: “Yeruzalemi, Yeruzalemi! . . . Mbala mingi mono zolaka kutula bantu na nge kisika mosi mutindu nsusu ke kutikisaka bana na yandi na nsi ya mapapu na yandi, kansi beno zolaka ve! Ntangu yai, bwala na beno tabika yo mosi kaka.”

Na nima Yezu meyika nde: “Katuka ntangu yai, beno ta mona mono diaka ve, tii na kilumbu yina ya beno ta tuba nde: ‘Mfumu Nzambi kusakumuna muntu yina ke kwisa na zina na yandi!’ ” Kilumbu yango tavanda na ntangu ya kumonana ya Kristu, ntangu yandi takota na kati ya Kimfumu na yandi ya zulu mpi ntangu bantu tamona yandi ti meso ya lukwikilu.

Ntangu yai, Yezu mekwenda na kisika yina yandi lenda kumona kesi ya makabu ya tempelo mpi bantu kele na kutula mbongo na kati. Bamvwama metula bibende mingi ya mbongo. Kansi, na nima nkento ya mufwidi mosi ya nsukami mekwisa mpi metula bibende zole ya mbalu ya fyoti kibeni.

Na kubingaka balongoki na yandi, Yezu ketuba nde: “Mono ke tubila beno mambu ya kieleka: Makabu ya mufwidi yai ya nsukami me tula na kesi me luta makabu yina ya bantu yonso me tula muna.” Bau fwete kudiyufula inki mutindu yau lenda kuvanda mpila yina. Ebuna Yezu ketendula nde: “Bo yonso ke na mbongo na bo mingi, yo yina bo me mona mpasi ve ya kupesa makabu, kansi nkento yai, na kinsukami na yandi, yandi me pesa mbongo yonso ya yandi vandaka na yo sambu na kuzinga.” Na nima ya kutuba mambu yai, Yezu mekatuka na tempelo sambu na mbala ya nsuka.

Na kuyitukaka sambu na bunene ti kitoko ya tempelo, balongoki metuba nde: “Longi, tala matadi yai ya kitoko, ti mutindu ya bo tungaka nzo yai!” Ya kyeleka matadi yango kele kiteso ya bametere kuluta 11 na nda, bametere kuluta 5 na nene mpi bametere 3 na ntandu!

Yezu kevutula nde: “Nge ke mona nzo yai ya nene? Ata ditadi mosi ve ta bika awa na zulu ya ditadi ya nkaka. Matadi yai yonso ta bwa kaka.”

Na nima ya kutuba mambu yai, Yezu ti balongoki na yandi mesabuka na Muwanda ya Kidron mpi bau memata na Ngumba ya Baolive. Sambu bau lenda kutala mbote tempelo yina ya kitoko na nsi. Matayo 23:25–24:3; Marko 12:41–13:3; Luka 21:​1-6; 2 Bansangu 24:​20-22.

▪ Inki Yezu mesala na ntangu yandi mekwenda na tempelo na mbala ya nsuka?

▪ Inki mutindu luvunu ya balongi ya Bansiku ti Bafarize metungululama?

▪ “Mfundusu ya Gehenna” ketendula inki?

▪ Sambu na inki Yezu ketuba nde mufwidi mepesa makabu kuluta bamvwama?