Bademo Ke Fwaka Bantu
Satana ti bademo ke vandaka bantu ya nku mpi ya mbi. Na ntangu ya ntama, Satana fwaka bitwisi ya Yobi mpi bansadi ya Yobi yina kangamaka ti yandi. Na nima, yandi fwaka bana kumi ya Yobi. Yandi sadilaka “mupepe mosi ya ngolo” mpi yo bwisaka nzo yina bo vandaka na kati. Na nima, Satana basisaka Yobi “bivimbu ya mpasi kibeni katuka na makulu tii na ntu.”—Yobi 1:7-19; 2:7.
Na bilumbu ya Yezu, bademo kumisaka bantu ya nkaka bababa mpi bifwa-meso. (Matayo 9:32, 33; 12:22) Bo niokulaka bakala mosi mpi bo salaka nde yandi kudilwadisa bamputa ti matadi. (Marko 5:5) Bo niokulaka mpi leke mosi ya bakala mpi bo vandaka kupusa yandi na kuboka, na kudilosa na ntoto. Bo vandaka kubwisa yandi na ntoto mpi na ‘kunikisa yandi ngolo kibeni.’—Luka 9:42.
Na ntangu ya ntama, bademo kumisaka bantu bambefo mpi bo bwisaka bantu ya nkaka maladi ya ndeke
Bubu yai mpi, Satana ti bademo ke vandaka kaka makasi. Ya kieleka, bo ke landa kusala mambu ya mbi banda bo me kulaka bo na zulu. Barapore ya bo ke pesa na ntoto ya mvimba ke monisa nde bo kele bantu ya nku. Bo ke niokula bantu ti maladi. Bo ke pesa bantu ya nkaka mpasi na mpimpa, bo ke sala nde bantu yango kulala ve mpongi to ke sala nde bo lala bandosi ya mbi. Bo ke sala nde bo bebisa bantu ya nkaka na mambu ya me tala kuvukisa nitu. Bo ke pusaka mpi bantu ya nkaka na kubela maladi ya kilau, na kufwa bantu mpi na kudifwa.
Bubu yai, bademo ke pusaka mpi bantu ya nkaka na kukuma nku; bo ke yangisaka bankaka na mpimpa, mpi bo ke salaka nde bantu kulala bandosi ya mbi
Lintina kele nkento mosi ya ke zingaka na Suriname. Yandi ke tuba nde demo mosi to mpeve mosi ya mbi fwaka bantu 16 ya dibuta na bo. Yo niokulaka yandi mosi mpi na nitu mpi na mabanza bamvula 18. Mutindu yandi me zaba mambu yina bampeve ya mbi ke salaka, yandi ke tuba nde bademo “ke sepelaka mingi kuniokula bantu ya ntu ngolo yina me bwa na maboko na bo tii kuna bo ta fwa bo.”
Kansi Yehowa kele ti ngolo ya kutanina bansadi na yandi sambu Satana kunwanisa bo ve.—Bingana 18:10.