Kitini 2
Nsi-Ntoto ya Kukonda Bampasi
1, 2. Inki dibanza ya kuswaswana bamingi ke na yau?
KANSI, na ntoto ya mvimba, bamilio ya bantu ke na mabanza ya kuswaswana kibeni. Bo ke mona nde bilumbu ke kwisa ta vanda kitoko sambu na bantu. Bo ke tuba nde kubika fyoti, ntoto ta kuma kisika mosi ya kukonda mambi mpi bampasi. Bo ke ndima nde kubika fyoti Nzambi ta katula mambu ya mbi mpi ta tula nsi-ntoto ya mpa. Bo ke tuba nkutu mpi nde Nzambi ke tula dezia fondasio ya nsi-ntoto yango ya mpa!
2 Bantu yango ke ndima nde na nsi-ntoto yina ya mpa, bitumba ta vanda ve, mambu ya nku ta vanda ve, kufwa bantu ta vanda ve, kukonda lunungu mpi kinsukami ta vanda mpii ve. Yo ta vanda nsi-ntoto mosi ya kukonda maladi, kukonda mpasi, kukonda mansanga to kudila, mpi kukonda lufwa. Na ntangu yina, bantu ta kuma na kikalulu ya kukuka mpi bo ta zinga mvula na mvula na kyese na kati ya paladisu na ntoto. Kyese ta vanda ya mingi, sambu bafwa ta futumuka mpi ta zwa dibaku ya kuzinga mvula na mvula!
3, 4. Sambu na inki bantu yai kendima ngolo kibeni dibanza na bau yina?
3 Keti dibanza yai sambu na bilumbu ke kwisa kele kaka bonso ndosi? Ve, yo ke dyambu ya kyeleka. Yo me simbama ngolo kibeni na lukwikilu yina ke monisa nde Nzambi ta vutula paladisu na ntoto. (Baebreo 11:1) Sambu na inki bantu yai ke na kivuvu ya ngolo mpidyai? Sambu lusilu yai mekatuka na nkwa-ngolo Ngangi ya nza.
4 Na yina me tala balusilu ya Nzambi, Biblia ke tuba nde: “Ata diambu mosi ve na kati ya balusilu ya mbote yina Yehowa Nzambi na beno pesaka beno kondaka kulungana.” “Nzambi kele ve muntu ya mpamba yina ke tubaka luvunu . . . Kana yandi tuba diambu mosi, keti yandi ta sala yo ve? Kana yandi tuba, keti yandi ta lungisa yo ve?” “Yehowa ya makesa me zenga kieleka nde: ‘Mutindu mono kanaka, yo ta salama mutindu yina, Kaka mutindu mono bakaka lukanu, yo ta lungana mpi mutindu yina.’ ”—Yozue 23:14; Kutanga 23:19; Yezaya 14:24.
5. Inki bangyufula ya kelomba mvutu?
5 Yo yina, kana lukanu ya Nzambi vandaka ya kukumisa ntoto paladisu ya kukonda bampasi, sambu na nki yandi me pesaka nzila na mambi? Sambu na nki yandi vingilaka bamvula mafunda sambanu, tii bubu yai, sambu na kuyidika mambu yina bebaka? Keti bamvu-nkama yai ya bampasi ke monisa nde ya kyeleka Nzambi ke kudibanza ve na beto, to mpi nde yandi kele ve?