Sadila Mbote Bima ya Kemonika na Meso

SAMBU na nki nge fwete sadila bima ya kemonika na meso na ntangu nge kelonga? Sambu kusala mutindu yina lenda sadisa bantu na kubakisa mbote malongi na nge. Yehowa Nzambi ti Yezu Kristu kusadilaka bima yina vandaka kumonika na meso sambu na kulonga, beto mpi lenda landa mbandu na bo. Ntangu nge kevukisa bima ya kemonika na meso ti mambu yina nge ketuba, bantu talanda yo na makutu mpi na meso. Yo lenda sadisa nge na kusimba dikebi ya bawi mpi na kumonisa pwelele ngindu ya nge ketubila. Inki mutindu nge lenda sadila bima ya kemonika na meso ntangu nge kelonga nsangu ya mbote? Inki mutindu nge lenda zikisa kana nge kesadila yo mbote?

Mutindu Balongi ya Kuluta Nene Kusadilaka Bima ya Kemonika na Meso. Yehowa kusadilaka bima ya kemonikaka yina bantu lenda yibuka kukonda mpasi sambu na kulonga malongi ya mfunu. Kilumbu mosi na mpimpa, yandi basisaka Abrahami na nganda mpi yandi tubaka nde: “Tala na zulu nge tanga bambwetete. Keti nge ta kuka kutanga yo? Dikanda na nge ta vanda bantu mingi-mingi bonso bambwetete yai.” (Kuy. 15:5) Ata na mabanza ya bantu mambu yina Nzambi silaka Abrahami kuvandaka mpasi na kulungana, yo simbaka mpenza ntima na yandi mpi yandi kwikilaka na Yehowa. Kilumbu yankaka, Yehowa kutindaka Yeremia na nzo ya muntu mosi yina vandaka kusala banzungu ya ntoto mpi Yandi lombaka Yeremia na kukota na nzo ya kisalu ya muntu yango sambu yandi kutala mutindu muntu yina vandaka kubalula ntoto. Yai kele kibeni dilongi mosi ya kuvila ve ya metala kiyeka yina Ngangi kele na yo na zulu ya bantu! (Yer. 18:1-6) Mpi nki mutindu Yonasi zolaka kuvila dilongi ya kuwila bantu mawa yina Yehowa kulongaka yandi na nsadisa ya kamwa-nti? (Yon. 4:6-11) Bantangu yankaka, Yehowa kutubilaka nkutu baprofete na yandi na kusala bansonga ya bansangu ya bambikudulu yina bo vandaka kuzabisa, na kusadilaka bima yina mefwana sambu bantu kumona na meso na bo mambu yina Yehowa zolaka kulonga bo. (1 Bant. 11:29-32; Yer. 27:1-8; Ezek. 4:1-17) Nkutu, bima yankaka yina kuvandaka na tabernakle ti na tempelo kele bifwani ya bima yina kesadisa beto na kubakisa mambu yina kele na zulu. (Baeb. 9:9, 23, 24) Nzambi kusadilaka mpi bambonameso mingi sambu na kulonga bansangu ya mfunu.​—Ezek. 1:4-28; 8:2-18; Bis. 10:9-16; 16:9, 10; Kus. 1:1.

Inki mutindu Yezu kusadilaka bima ya kemonikaka na meso? Ntangu Bafarize ti balongoki ya Erode kutudilaka Yezu mutambu sambu bo kanga yandi na kutuba na yandi, Yezu kulombaka denali mosi mpi yandi bendaka dikebi na bo na kifwanisu ya Kaisali yina vandaka na mbongo ya kibende yango. Na nima, yandi tendulaka nde bo fwete pesa bima ya Kaisali na Kaisali kansi ya Nzambi na Nzambi. (Mat. 22:19-21) Sambu na kulonga dilongi ya kukumisa Nzambi ti bima na beto yonso, Yezu kusongaka balongoki na yandi mufwidi mosi ya nsukami yina kupesaka makabu ya bibende zole ya mbongo yina yandi vandaka na yo sambu na kuzingila. (Luka 21:1-4) Kilumbu yankaka, yandi sadilaka mwana mosi ya fyoti sambu na kupesa dilongi ya kudikulumusa mpi ya kukonda kusosa lukumu. (Mat. 18:2-6) Yandi mosi mpi kumonisaka ntendula ya kudikulumusa na ntangu yandi yobisaka makulu ya balongoki na yandi.​—Yoa. 13:14.

Mitindu ya Kusadila Bima Yina Kemonika na Meso. Beto lenda solula ve ti bantu na nzila ya bambonameso mutindu Yehowa vandaka kusala yo. Kansi, mikanda ya Bambangi ya Yehowa kevandaka ti bafoto mingi yina kepusaka bantu na kuyindula. Sadila yo sambu na kusadisa bantu yina kesepela na kyeleka na kumona Paladisu ya ntoto yina Ndinga ya Nzambi mesilaka. Kana nge kelonguka Biblia ti muntu, nge lenda benda dikebi na yandi na foto mosi yina kewakana ti mambu yina beno kelonguka mpi lomba yandi na kutendula mambu ya yandi kemona. Simba nde ntangu Yehowa kupesaka bambonameso na profete Amosi, Yandi yulaka yandi nde: “Amosi, nki nge ke mona?” (Am. 7:7, 8; 8:1, 2) Nge lenda yula bangyufula ya mutindu mosi ntangu nge ketwadisa dikebi ya bantu na bafoto yina bo metulaka sambu beto sadila yo bonso bima ya kemonika na meso sambu na kulonga.

Kana nge sadila bakalkile to kikokila mosi yina kesonga ntangu mpi ndonga ya mambu ya mfunu mutindu yo salamaka, yo tasadisa bantu na kubakisa mbotembote bambikudulu bonso “bantangu nsambwadi” ya Daniele 4:16 (NW) mpi “bamposo makumi nsambwadi” ya Daniele 9:24 (NW). Bima ya mutindu yai ya kemonikaka na meso kele mingi na mikanda ya beto kelongukilaka Biblia.

Na kulonguka na beno ya Biblia na dibuta, beno lenda sadila foto mosi sambu na kutendula na mutindu mosi ya pete bima bonso tabernakle, tempelo ya Yeruzalemi, mpi tempelo yina Ezekiele kumonaka na mbonameso. Nge lenda mona bafoto yango na Étude perspicace des Écritures, na appendice ya Traduction du monde nouveau​—avec notes et références, mpi na banimero mingi ya Nzozulu ya Nkengi.

Ntangu nge ketanga Biblia ti dibuta na nge, sadila mbote bakarte. Sala bikokila yina kesonga nzyetolo ya Abrahami banda na Ure tii na Arani mpi nzila ya yandi landaka sambu na kukulumuka na Betele. Beno tala nzila yina bantu ya Izraele kulandaka ntangu dikanda yonso kukatukaka na Ezipte sambu na kukwenda na Ntoto ya Lusilu. Beno sosa kitini ya ntoto yina bo pesaka na konso dikanda ya Izraele bonso dikabu. Beno tadila bunene ya ntoto ya Salomo. Beno tadila nzila ya nda yina Elia kulandaka tii na ntoto ya zelo na zelo na zulu ya bwala Beresheba, ntangu yandi katukaka na bwala Yizrele sambu na kutina ntangu Yezabele sosaka kufwa yandi. (1 Bant. 18:46–19:4) Beno tala bambanza ti babwala yina Yezu kulongaka. Beno landa banzyetolo ya Polo, mutindu mukanda ya Bisalu ketubila yo.

Kusadila bima ya kemonika na meso kele dyaka mfunu ntangu nge kezola nde balongoki ya Biblia kuzaba mbote mutindu dibundu ketambulaka. Nge lenda monisa longoki na nge programe mosi ya lukutakanu ya nene mpi ya distrike mpi kutendudila yandi mutindu ya malongi yina beto kebakaka na balukutakanu yai. Bantu mingi meyitukaka na ntangu bo kwendaka kutala Nzo ya Kimfumu to biro ya filiale mosi ya Bambangi ya Yehowa. Yo lenda vanda mutindu mosi ya mbote ya kukatula bangindu ya mbi yina bantu kevandaka na yo sambu na kisalu na beto mpi lukanu na yo. Kana nge ketambusa muntu na Nzo ya Kimfumu, songa yandi mutindu yo meswaswana ti bisika yankaka ya bantu kekwendaka kusambila. Monisa yandi nde yo kele kisika mosi ya kukonda mindondo ya bo metungaka sambu na kulongukila. Songa yandi bima yina beto kesadilaka na kisalu ya kusamuna, mu mbandu bisika yina beto ketulaka mikanda ya bo kekabilaka beto, bakarte ya teritware, mpi bakesi ya makabu (yina kele ya kuswaswana ti malonga ya kulombila makabu).

Na bisika yina bakaseti video yina Nto-Kimvuka mebasisaka kele, sadila yo sambu na kusyamisa bantu na kutula ntima na Biblia, na kusadisa balongoki na kuzaba mbote kisalu yina Bambangi ya Yehowa kesalaka, mpi na kusyamisa bantu yina ketala yo na kuzitisa minsiku ya Biblia na luzingu na bo.

Kusadila Bima ya Kemonikaka na Meso Sambu na Kulonga Bibuka ya Nene. Bima yina kemonikaka na meso lenda vanda bisadilu ya mbote sambu na kulonga bibuka ya nene kana beto mebongisa mpi kusadila yo mbote. Kimvuka ya mpika ya kwikama mpi ya mayele kepesaka beto bisadilu ya mutindu yai na mitindu mingi.

Mbala mingi, masolo ya Kulonguka ya Nzozulu ya Nkengi kevandaka ti bafoto mpi bakarte yina ntwadisi lenda sadila sambu na kunyata bangindu ya mfunu. Yo kele mpi mutindu mosi sambu na mikanda yina beto kesadilaka na Kulonguka ya Mukanda ya Dibundu.

Bapula yankaka ya badiskure ya bantu yonso kelombaka kusadila bima yina kemonikaka na meso sambu na kumonisa bangindu yankaka. Kansi, mbala mingi yo kebutaka mbuma ya mbote kana mutubi kebenda dikebi na mambu yina kele na Biblia, yina bawi mingi tavanda ti yo na maboko. Ntangu yankaka, kana nge mona nde nge kele na mfunu ya kusadila kifwanisu to kutanga bangindu ya mfunu na bunkufi sambu na kutendula ngindu to bangindu ya mfunu ya disolo mosi, zikisa na ntwala nde ata bawi yina tavanda na baban ya nsuka tamona (to tatanga) yo pwelele. Nge fwete sadila bametode yai ti dikebi yonso.

Ntangu beto kesadilaka bima ya kemonika na meso na badevware to na kulonga, lukanu na beto kele ve ya kusekisa bantu. Ntangu beto kesadila kima mosi ya kemonika na meso yo fwete vanda ve kima mosi ya mpamba-mpamba, mpi yo fwete sadisa na kunyata ngindu yina kelomba nde beto nyata yo mpenza. Bisadilu ya mutindu yai kelungisaka lukanu mosi ya mfunu kana yo kesadisa nge na kumonisa mambu ya nge ketuba pwelele, na mpila nde bantu kubakisa yo kukonda mpasi, to ntangu yo kepesaka banzikisa ya ngolo na kyeleka ya mambu yina beto ketuba. Kana beto sadila yo mbote, kima ya mbote ya kemonika na meso lenda simba kibeni ntima ya bantu na mpila nde bo tayibukaka kima yango ti ngindu ya dilongi yango bamvula mingi.

Makutu mpi meso kevandaka mfunu kibeni sambu na kulonguka. Yibuka mutindu Yehowa ti Yezu kusadilaka bima yai zole, mpi sala ngolo na kulanda mbandu na bo ntangu nge kesala kikesa na kusimba ntima ya bantu yankaka.