Mutindu ya Kulonga Mwana na Nge

Ntangu Yehowa salaka dibuta, yandi pesaka bibuti mukumba ya kusansa bana. (Bakolosai 3:20) Bibuti kele ti mukumba ya kulonga bana na bo sambu bo zola Yehowa mpi bo kuma bambuta ya mayele. (2 Timoteo 1:5; 3:15) Beno fwete zaba mpi mambu yina kele na bantima ya bana na beno. Mbandu na beno kele mfunu mingi. Beno lenda longa bana na beno Ndinga ya Yehowa mbote kana beno mosi ke kotisa yo ntete na bantima na beno.—Nkunga 40:9.

1 SALA NDE BANA NA BENO KUSOLULA TI BENO KUKONDA MPASI

MAMBU YINA BIBLIA KE TUBAKA: “Konso muntu fwete wa nswalu, kunwanina ve na kutuba.” (Yakobo 1:19) Beno ke zolaka nde bana na beno kusolula ti beno kukonda mpasi. Bana fwete zaba nde beno kele ya kuyilama sambu na kuwidikila bo ntangu bo ke zola kusolula ti beno. Beno sala na mpila nde bana na beno kuzabisa beno mambu na bo kukonda mpasi. (Yakobo 3:18) Kana bo ke mona nde beno kele makambu ngolo mpi ke sambisa bo, bo ta zabisa beno ve mambu na bo pwelele. Beno vanda ntima-nda ti bana na beno mpi beno monisa bo mbala na mbala nde beno ke zolaka bo.—Matayo 3:17; 1 Bakorinto 8:1.

MAMBU YA NGE LENDA SALA:

• Beno pesa bana na beno nzila ya kusolula ti beno

• Beno solula ti bana na beno mbala na mbala kansi beno solula ve ti bo kaka ntangu bo me kutana ti makambu

2 SOSA KUBAKISA KIBENI MAMBU YINA BANA NA BENO KE TUBA

MAMBU YINA BIBLIA KE TUBAKA: “Muntu yina ke monisa mayele na diambu mosi ta nunga.” (Bingana 16:20, NW) Bantangu ya nkaka, beno tula ve dikebi na bangogo ya bana na beno ke sadila kansi beno sosa kubakisa mawi na bo ya kieleka. Mbala mingi, bana ke lutisaka ndilu to ke tubaka ve mambu yina bo ke sosa mpenza kutuba. Biblia ke tuba nde: “Wa ntete na ntwala ya kupesa mvutu, kana ve yo kele buzoba.” (Bingana 18:13) Kuwa ve makasi nswalu.—Bingana 19:11.

• Beno vanda ve ti kikalulu ya kuzenga bana na beno ndinga mpi beno kumisa ve mambu ya bo ke zabisa beno nene

• Beno yibuka mutindu beno vandaka kudiwa ntangu beno vandaka ti bamvula na bo mpi mambu yina beno vandaka kumona mfunu

3 BENO SALA MAMBU NA BUMOSI

MAMBU YINA BIBLIA KE TUBAKA: “Mwana na mono, wa disipline ya tata na nge, mpi kuyambula ve malongi ya mama na nge.” (Bingana 1:8, NW) Yehowa me pesaka tata ti mama kiyeka na zulu ya bana. Beno fwete longa bana na beno sambu bo zitisa mpi bo lemfukila beno. (Baefezo 6:1-3) Bana lenda bakisa kana bibuti na bo kele ve “kibeni na mabanza mosi.” (1 Bakorinto 1:10) Kana beno ke wakana ve, beno monisa yo ve na meso ya bana kana ve bo ta zitisa beno diaka ve.

MAMBU YA NGE LENDA SALA:

• Beno solula mpi beno wakana mutindu beno ta pesa bana na beno disipline

• Kana mabanza na beno me swaswana na mutindu beno ta longa bana na beno, beno tadila diaka mabanza na beno

4 BAKA BANGIDIKA

MAMBU YINA BIBLIA KE TUBAKA: “Longa mwana-bakala na nzila yina yandi fwete kwenda.” (Bingana 22:6, NW) Beno fwete sala ngolo sambu bana na beno kubaka malongi ya mbote. Beno fwete sala manaka ya kulonga bana na beno, yo fwete tadila mpi kupesa bo disipline. (Nkunga 127:4; Bingana 29:17) Disipline ke tadila kaka ve kupesa bana ndola, kansi yo ke lomba mpi kusadisa bo na kubakisa bikuma yina beno ke tudila bo bansiku. (Bingana 28:7) Diaka, beno longa bo na kuzola Ndinga ya Yehowa mpi kubakisa minsiku na yo. (Nkunga 1:2) Yo ta sadisa bo na kuvanda ti kansansa ya mbote.—Baebreo 5:14.

MAMBU YA NGE LENDA SALA:

• Zikisa nde bana na beno ke mona Nzambi Muntu ya kieleka yina bo lenda tudila ntima

• Sadisa bo na kuzaba mpi kubuya bigonsa yina lenda bebisa bikalulu ya mbote, mu mbandu bigonsa yina kele na Internet. Longa bo mutindu ya kubuya bantu yina ke kusaka bana sambu na kusala ti bo mansoni