DILONGI 18

Longa na Mutindu Yina Bantu Ta Bakisa

1 Bakorinto 9:19-23

NA BUNKUFI: Pesa bawi mpusa ya kuyindula, sadisa bo na kubakisa nde bo me longuka dilongi ya mfunu.

Yibuka mambu yina bawi ke zabaka. Na kisika ya kuvutukila kaka mambu yina bawi ke zabaka, sadisa bo na kutula dikebi na mambu ya nkaka yina bo ke tudilaka ve dikebi.

Ntangu nge ke longa, luta nswalu na mambu ya bo me zaba kansi lutisa ntangu mingi na kutubila bangindu ya mpa.
Sala bansosa mpi yindula mingi. Kana mpila kele, sadila bansangu yina bantu mingi me zaba ve to mambu ya me katuka kusalama sambu na kutendula bangindu ya mfunu. Yindula mingi mambu yina nge ta longa mpi sosa kuwakana yina kele na kati ya malongi yango ti bambandu yina nge ke zola kusadila.

Ntangu nge ke yidika disolo, yedisa diaka bangindu na nge, mu mbandu kudiyula bangiufula bonso ‘Inki, sambu na nki, nki ntangu, nki kisika, nani, mpi inki mutindu.’ Ntangu nge ke longa sadila mwa bangiufula ya mutindu yai mpi pesa bamvutu, yo ta tomisa malongi na nge.
Monisa mfunu ya malongi na nge. Sadisa bawi na kubakisa mutindu baverse ya Biblia lenda sadisa bo. Tubila kibeni mambu yina bo ke kutana ti yo, bikalulu mpi mambu ya mfunu yina bo fwete sala.