Bangyufula Ya Batangi

Na Filipi 2:​9, Polo kutubaka sambu na Yezu nde: “Nzambi tombulaka yandi na kati ya zulu mpenza, ebuna yandi pesaka yandi zina mosi ya kuluta bazina yonso na mfunu.” Inki kele zina yango yai ya mpa? Ebuna kana Yezu kele na nsi ya Yehowa, inki mutindu zina ya Yezu kele ya kuluta bazina yonso na mfunu?

Na Filipi 2:​8, 9 beto ketanga nde: “Yandi [Yezu] kudikulumusaka mpenza, yandi mpi lemfukaka na Nzambi tii kuna ya yandi fwaka na [nti ya mpasi, NW]. Yo yina, Nzambi tombulaka yandi na kati ya zulu mpenza, ebuna yandi pesaka yandi zina mosi ya kuluta bazina yonso na mfunu.”

Mukapu yai ketendula ve nde sambu kaka Yehowa mpamba muntu kele ti zina mosi ya kele na zulu ya bazina ya nkaka yonso, Yezu fwete kuvanda muntu mosi ti Yehowa. Mutindu mambu ya kele na kapu 2 ya Filipi kesonga yau, Yezu kuzwaka zina na yandi ya kuzanguka na nima ya lufutumuku na yandi. Na ntwala ya ntangu yina, yandi vandaka na zina yina ve. Kansi, Yehowa kevandaka kaka ya kuluta kuzanguka, ye pozisio na yandi mesobaka ntete ve. Sambu Yezu kuzwaka zina ya kuluta zina ya yandi vandaka na yau na ntwala ya kisalu na yandi na zulu ya ntoto, dyambu yina kemonisa mbote nde yandi kele muntu mosi ve ti Yehowa. Ntangu Polo kutubaka nde Yezu kuzwaka zina yina kele ya kuluta bazina yonso na mfunu, yandi vandaka kumonisa nde ntangu yai Yezu kele na zina ya kuluta bigangwa yonso ya Nzambi.

Zina ya kuzanguka ya Yezu kele nani? Yezaya 9:5 kesadisa beto na kupesa mvutu. Na kubikulaka kukwisa ya Mesya, Yezu, mvese yina ketuba nde: “Yandi yina muntu ta yalaka beto. Bo ta bingaka yandi Konseye ya Mayele, Nzambi ya Ngolo, Tata ya Mvula na Mvula, Mfumu ya Ngemba.” Awa, “zina” ya Yezu kewakana ti pozisio na yandi ya zulu mpi kiyeka na yandi, yina kemonisa mutindu ya beto fwete kubakisa “zina yina kele ya kuluta bazina yonso na mfunu” yina metubama na Filipi 2:⁠9. Mabolongo yonso fwete kufukama na ntwala ya Yezu na kundimaka pozisio na yandi ya kiyeka ya kuzanguka yina Yehowa kupesaka yandi​—⁠pozisio ya kiyeka ya kuluta yina yandi mepesaka ntete ve na kigangwa ya nkaka. Ngogo “nkaka” ya kele na Traduction du monde nouveau kemonikaka ve mbala mosi na mukapu yango na Kigreki, kansi yau metulama sambu na sansa ya mvese kemonisa. “Zina” ya Yezu kele ve na zulu ya zina na yandi mosi, kansi na zulu ya bazina ya bingangwa ya nkaka yonso.

Kyese ya inki mutindu beto kele na yau na kufukama na mabolongo na beto kumosi ti bawanzyo mpi bantu ya kwikama yonso sambu na kundima zina ya Yezu! Beto kesalaka yau na kulemfukaka na Yezu sambu na pozisio na yandi ya kuzanguka mpi ya kuluta ngolo ya Yehowa kupesaka yandi​—⁠“sambu na kupesa Tata Nzambi lukumu.”​—⁠Filipi 2:11; Matayo 28:⁠18.