Bimenga ya Kukumisa Yina Kepesaka Yehowa Kyese

“Beno . . . kudipesa beno mosi na Nzambi bonso makabu ya menga, makabu ya kufwa ve kansi ya moyo, [ya santu, ya kepesaka, NW] yandi kiese.”​—ROMA 12:1.

1. Inki Biblia ketuba sambu na yina metala valere ya ntangu fyoti ya bimenga yina bo vandaka kupesa na nsi ya Nsiku ya Moize?

“BANSIKU ya Bayuda me fwanana mbotembote ve na mambu ya kieleka; kansi yo kele kaka bonso kifwanisu ya mambote ke kwisa na ntwala. Bantu yina ke kwisaka penepene na Nzambi, Bansiku lenda kumisa bo bantu ya mbote ve.” (Baebreo 10:1) Na kisika yai, na nsa mosi ya mfunu, ntumwa Polo kendima nde bimenga yonso yina bo vandaka kupesa na nsi ya Nsiku ya Moize vandaka ve ti valere ya kimakulu sambu na kugulusa bantu.​—Kolosai 2:16, 17.

2. Sambu na nki yo kele dyambu ya mpamba ve na kusosa kubakisa mambu ya fyotifyoti yina kele na Biblia ya ketala makabu ti bimenga yina kele na Nsiku?

² Keti yo kezo tuba nde mambu yonso yina bo metuba na mikanda tanu yina Moize kusonikaka sambu na yina metala makabu ti bimenga kele na mfunu ve sambu na Bakristu bubu yai? Ntama mingi ve, mvula mosi ti ndambu melunga ntangu yai, bantu yina kusonikisaka na Nzo-Nkanda ya Kisalu ya Teokrasi na mabundu ya Bambangi ya Yehowa na inza ya mvimba kutangaka mikanda tanu ya ntete ya Biblia. Mingi na kati na bo kusalaka ngolo mpenza sambu na kutanga mpi kubakisa mambu yonso ya fyotifyoti. Keti bikesa ya bo salaka vandaka ya mpamba? Yo levanda mpidina ve ata fyoti, sambu “mambu yonso ya bo sonikaka na Mukanda ya Nzambi, bo sonikaka yo sambu na kulonga beto na mpila nde beto kukanga ntima, beto kuvanda na kikesa na kuvingila mambu yina ya Nzambi silaka beto.” (Roma 15:4) Kansi, ngyufula kele nde, inki ‘malongi’ mpi “kikesa” beto lenda baka na kati ya mambu yonso ya ketala makabu ti bimenga yina kele na Nsiku?

Sambu na kulonga beto mpi kupesa beto kikesa

3. Inki kima beto kele na yo mpenza mfunu?

³ Ata bo kelomba beto ve na kupesa makabu ya menga mutindu Nsiku ketuba, beto kele kaka na mfunu ya kuzaba mambu yina bimenga yina kusalaka ata na kiteso ya fyoti na bantu ya Izraele, mingimingi, sambu na kulolula masumu na beto mpi sambu Nzambi kundima beto. Ata beto kepesaka dyaka ve makabu mutindu bo vandaka kusala, nki mutindu beto lenda baka mambote yina? Na nima ya kutubila mambu yina makabu ya bambisi zolaka kulungisa ve, Polo ketuba nde: “Ntangu Kristo vandaka ke zola kwisa awa na nsi-ntoto, yandi tubaka na Nzambi nde: ‘Nge . . . zolaka ve makabu ya menga ya mbisi to makabu ya bima ya bilanga, kansi nge salaka nitu na mono sambu na makabu. Makabu ya mbisi yina ya bo ke yokaka na zulu ya mesa-kimenga to makabu yina ya bo ke pesaka sambu na kukatula masumu, yo ke pesaka nge kiese ve. Ebuna mono tubaka: “O Nzambi, mono yandi yai me kwisa sambu na kusala mambu yina ya nge me zola, mutindu bo sonikaka na mikanda ya Bansiku sambu na mono.”’”​—Baebreo 10:5-7.

4. Inki mutindu Polo kemonisa mutindu Yezu Kristu kulungisaka Nkunga 40:6-8?

⁴ Ntangu yandi kevutukila mambu yina kele na Nkunga 40:6-8, Polo ketuba nde Yezu kwisaka ve sambu na kulanda na kupesa “makabu ya menga ya mbisi to makabu ya bima ya bilanga,” “Makabu ya mbisi yina ya bo ke yokaka na zulu ya mesa-kimenga to makabu yina ya bo ke pesaka sambu na kukatula masumu,” Nzambi vandaka kundima dyaka ve makabu yai yonso na ntangu Polo vandaka kusonika mambu yai. Kansi, Yezu kwisaka ti nitu yina Tata na yandi ya zulu kuyidikaka, nitu yina kelungana na mambu yonso ti yina Nzambi kuyidikaka ntangu Yandi salaka Adami. (Kuyantika 2:7; Luka 1:35; 1 Korinto 15:22, 45) Sambu Yezu vandaka Mwana ya kukuka ya Nzambi, yandi lungisaka mukumba ya “nkuna” ya nkento, mutindu Biblia tubaka na Kuyantika 3:15. Yandi zolaka kusala mambu yina yo kelomba sambu na ‘kudyata Satana na ntu,’ ata yandi mosi Yezu bo ‘tatikaka yandi na kisingini.’ Ebuna, Yezu kumaka nzila yina Yehowa kupesaka sambu na kugulusa bantu, nzila yina bantu ya lukwikilu vandaka kukinga banda na ntangu ya Abele.

5, 6. Inki nzila ya kuluta nene Bakristu kele na yo sambu na kukwenda penepene na Nzambi?

⁵ Ntangu yandi ketubila kisalu ya nene yina Yezu kusalaka, Polo ketuba nde: “Kristo vandaka na masumu ve, kansi Nzambi pesaka yandi kilo ya masumu na beto, yandi tangaka yandi ndonga mosi ti bantu ya masumu na kisika na beto​—yai yonso sambu Nzambi kundima beto na kimvuka ti Kristo.” (2 Korinto 5:21) Bangogo “pesaka yandi kilo ya masumu” bo lenda balula yo mpi nde ‘ya bo mepesa bonso makabu sambu na masumu.’ Ntumwa Yoane ketuba nde: “Yandi muntu me fwaka sambu na kukatula masumu na beto. Yo kele sambu na masumu na beto kaka ve, kansi sambu na masumu ya bantu yonso.” (1 Yoane 2:2) Yo yina, ata bantu ya Izraele kuvandaka ti kima yina vandaka kusadisa bo sambu na ntangu fyoti na kukwenda penepene na Nzambi na nsadisa ya bimenga na bo, Bakristu kele ti kima ya kuluta nene yina kesadisaka bo na kukwenda na Nzambi, disongidila kimenga ya Yezu Kristu. (Yoane 14:6; 1 Piere 3:18) Kana beto tula lukwikilu na kimenga ya nkudulu yina Nzambi kupesaka mpi kana beto lemfukila Yandi, Nzambi lenda lolula mpi masumu na beto. Ebuna, Nzambi tandima beto mpi yandi tasakumuna beto. (Yoane 3:17, 18) Keti mambu yai fwete pesa beto ve kikesa? Ebuna, nki mutindu beto lenda monisa nde beto kele na lukwikilu na kimenga ya nkudulu?

⁶ Na nima ya kutendula nde Bakristu kele ti kikuma ya nene ya kukwenda penepene na Nzambi, ntumwa Polo ketuba mambu ya beto ketanga na Baebreo 10:22-25. Yandi kepesa mitindu tatu yina beto lenda sadila sambu na kumonisa lukwikilu mpi ntonda na beto sambu na mambu ya zola yina Nzambi kusalaka. Ata ndongisila ya Polo kutubilaka ntetentete bantu yina kele “na nswa ya kukota na kisika ya [santu]”​—disongidila, Bakristu ya kupakulama yina kele na kivuvu ya kukwenda na zulu​—ntembe kele ve nde bantu yonso kele na mfunu ya kutula dikebi na bangogo ya kupemama ya Polo, kana bo kezola kubaka mambote ya kimenga ya Yezu yina kekatulaka masumu.​—Baebreo 10:19.

Beno pesa bimenga ya bunkete mpi ya kukonda kifu

7. (a) Inki mutindu Baebreo 10:22 kemonisa mambu yina bo vandaka kusala na kupesa kimenga? (b) Yo vandaka kulomba kusala nki sambu Nzambi kundima kimenga?

⁷ Ntetentete, Polo kesyamisa Bakristu nde: “Beto kwenda penepene na Nzambi ti ntima mosi ya kieleka, ti lukwikilu ya ngolo, ti ntima mosi ya mpembe, ti nitu yina me yobila masa ya mpembe.” (Baebreo 10:22) Bangogo ya bo mesadila awa kemonisa pwelele mambu yina bo vandaka kusala na kupesa kimenga na nsi ya Nsiku. Yo kele mpenza mpidina mpamba ve, sambu Nzambi kundima kimenga mosi, yo vandaka kulomba kupesa yo ti ntima ya mbote mpi yo fwete vanda kima mosi ya bunkete mpi ya kukonda kifu. Mbisi ya kupesa kimenga vandaka mbisi yina mekatuka na kibuka mosi, disongidila bambisi yina kele bunkete, mpi yina “ya mbote,” ya kukonda kifu. Kana kimenga yango kele ndeke, yo fwete vanda mayembe to bana ya pizio. Kana muntu mezitisa mambu yina yonso, yo “[vandaka kulomba nde Nzambi] kundima na kuwila yandi mawa sambu na masumu na yandi.” (Levi 1:2-4, 10, 14; 22:19-25) Makabu ya bima ya bilanga vandaka ve na levire, ya kele kidimbu ya kubeba; yo vandaka mpi ve ti bwiki, ziku bo kezo tubila masa ya sukadi ya bambuma, yina kevandaka na ngolo ya kupodisa yo. Kana bo mepesa kimenga, yo vanda ya mbisi to ya bima ya bilanga, na zulu ya mesa-kimenga, bo vandaka kuyika mungwa, sambu yo kebumbaka bima mbote.​—Levi 2:11-13.

8. (a) Inki yo vandaka kulomba sambu na muntu yina kepesa makabu? (b) Inki mutindu beto lenda zaba kana Yehowa kendimaka lusambu na beto?

⁸ Inki beto lenda tuba sambu na muntu yina kepesa makabu? Nsiku kutubaka nde konso muntu yina kekwisa na ntwala ya Yehowa fwete vanda bunkete mpi kukonda kifu. Konso muntu yina mekuma mvindu sambu na konso nki kikuma yina vandaka kupesa ntete makabu sambu na masumu to sambu na masumu ya yandi mesala na kidiba na mpila nde yandi vanda dyaka bunkete na meso ya Yehowa sambu Yandi ndima makabu na yandi ya kuyoka to ya kinduku. (Levi 5:1-6, 15, 17) Na yo, keti beto kebakisa mfunu ya kuvanda bunkete ntangu yonso na ntwala ya Yehowa? Kana beto kezola nde Nzambi kundima lusambu na beto, beto fwete sukininaka ve na kusungika mambu yonso ya mbi ya beto mesala yina mefwa Nsiku ya Nzambi. Beto fwete sadila nswalu mwaye yina Nzambi mepesaka sambu na lusadisu: “bambuta ya dibundu” mpi “muntu [yina] me fwaka sambu na kukatula masumu na beto,” Yezu Kristu.​—Yakobo 5:14; 1 Yoane 2:1, 2.

9. Inki luswaswanu ya nene vandaka na kati ya makabu yina bo vandaka kupesa na Yehowa ti yina bo vandaka kupesa na banzambi ya luvunu?

⁹ Ya kyeleka, dikebi ya mingi ya bo vandaka kulomba na bantu ya Izraele ya kubikala ya kukonda mvindu, vandaka kima ya nene yina vandaka kuswaswanisa makabu ya bo vandaka kupesa na Yehowa ti yina makanda yina vandaka kuzinga penepene ti bo vandaka kupesa na banzambi ya luvunu. Mukanda mosi ya bantu kesadilaka mingi kesala bakomantere yai sambu na yina metala dyambu yai ya keswaswanisa makabu yina bo vandaka kupesa na Nsiku ya Moize: “Beto kemona nde yo vandaka kubuyisa mpenza mambu bonso kutuba mambu yina tasalama na ntwala, kubwa mpeve, kudizenga binama ya nitu, to kindumba na banzo-nzambi, mambu ya metala mawi mpi kyese ya kusala mansoni; bo vandaka kupesa ve bimenga ya bantu; bo vandaka kupesa mpi ve bimenga sambu na bafwa.” Mambu yai yonso kebenda dikebi na beto na kima mosi: Yehowa kele santu, mpi yandi kendimaka ve masumu mpi kekondaka ve kupesa ndola sambu na konso mambu yina ya mbi. (Habakuki 1:13) Lusambu ti bimenga yina bo kepesa yandi fwete vanda ya bunkete mpi ya kukonda kifu na nitu, na mabanza, mpi na kimpeve.​—Levi 19:2; 1 Piere 1:14-16.

10. Na kuwakana ti ndongisila ya Polo yina kele na Roma 12:1, 2, inki mutindu beto fwete kuditala mbotembote beto mosi?

¹⁰ Mutindu beto memona mambu yai yonso, beto fwete kuditala mbotembote na mambu yonso ya luzingu na beto, sambu na kuzikisa kana Yehowa kendima kisalu na beto. Beto fwete meka ve na kuyindula nde kana beto kekwenda na balukutakanu ya Bukristu mbala na mbala mpi na kisalu ya kulonga, nde mambu ya beto kesala na kinsweki kele kima ve. Beto fwete yindula mpi ve nde sambu beto kesalaka bisalu ya Bukristu, mfunu ya kuzitisa bansiku ya Nzambi kele ve na mambu yankaka ya luzingu na beto. (Roma 2:21, 22) Beto lenda kinga ve na kubaka lusakumunu ya Nzambi mpi nde yandi ndima beto kana beto kebika nde kima mosi ya mvindu to ya kele na kifu na meso na yandi kubebisa mabanza to bisalu na beto. Kuvila ve mambu yina Polo kutubaka: “Bampangi na mono, Nzambi ke wilaka beto mawa; yo yina mono ke lomba beno na kudipesa beno mosi na Nzambi bonso makabu ya menga, makabu ya kufwa ve kansi ya moyo, sambu na kusadila yandi ti kupesa yandi kiese. Yina kele bisambu ya kieleka ya beno fweti sambaka yandi. Beno landa bikalulu ya bantu ya ntangu yai ve, kansi beno pesa Nzambi nzila na kubalula mabanza na beno sambu beno kukuma mutindu ya nkaka mpenza. Ebuna beno ta zaba mambu yai ya Nzambi ke zolaka: mambu yina kele ya mbote, mambu yina ke pesaka yandi kiese, mambu yina ke na kifu ve.”​—Roma 12:1, 2.

Beno pesa bimenga ya kukumisa na ntima ya mvimba

11. “Mambu yina beto ketaka kimbangi na ntwala ya bantu yonso” yina bo ketubila na Baebreo 10:23, ketendula dyaka nki?

¹¹ Ntangu yandi sonikilaka bantu ya Ebreo, Polo kubendaka dyaka dikebi na bo na kima mosi ya mfunu ya lusambu ya kyeleka: “Beto simba ngolo kimbangi ya kivuvu na beto na ntwala ya bantu yonso kukonda kutekita, muntu yina kusilaka yo kele muntu ya kwikama.” (Baebreo 10:23, NW) ‘Kimbangi na ntwala ya bantu yonso’ ketendula mpi “kutuba,” ebuna Polo ketubila dyaka ‘makabu ya kukumisa.’ (Baebreo 13:15) Dyambu yai keyibusa beto makabu ya bantu bonso Abele, Noa, mpi Abrahami kupesaka.

12, 13. Inki kima muntu ya Izraele vandaka kundima na ntangu yandi kepesa makabu ya kuyoka, mpi nki beto fwete sala sambu na kumonisa mpi mpeve ya mutindu mosi?

¹² Ntangu muntu ya Izraele vandaka kupesa makabu ya kuyoka, yandi vandaka kusala yo “na luzolo na yandi mosi na ntwala ya Yehowa.” (Levi 1:3, NW) Na nsadisa ya makabu yina, muntu ya Izraele vandaka kusonga bantu na luzolo yonso, to kundima, balusakumunu mingi mpi zola yina Yehowa kele na yo na bantu na yandi. Yibuka nde kima ya vandaka kuswaswanisa makabu ya kuyoka vandaka nde bo vandaka kuzikisa yo yonso na zulu ya mesa-kimenga, yo vandaka kidimbu ya kwikama ya ngolo mpi ya kudipesa na yandi ya mvimba. Mutindu mosi mpi, beto kemonisaka lukwikilu na beto na kimenga ya nkudulu mpi ntonda na beto sambu na kima yina Nzambi kupesaka ntangu beto kepesaka ‘makabu ya kukumisa zina ya Nzambi na munoko na beto’ na luzolo yonso mpi na ntima ya mvimba.

¹³ Ata Bakristu kepesaka ve makabu ya bambisi to ya bima ya bilanga, bo kele na kisalu ya kuta kimbangi na nsangu ya mbote ya Kimfumu mpi ya kukumisa bantu balongoki ya Yezu Kristu. (Matayo 24:14; 28:19, 20) Keti nge kesadilaka ba okazio yonso yina nge kekutanaka na yo sambu na kuzabisa na bantu yonso nsangu ya mbote ya Kimfumu ya Nzambi na mpila nde bantu mingi lenda zaba mambu ya mbote yina Nzambi keyidika sambu na bantu ya bulemfu? Keti nge kelutisaka ntangu ti ngolo na nge na luzolo yonso na kulonga bantu yina kesepilaka mpi kusadisa bo na kukuma balongoki ya Yezu Kristu? Kisalu ya beto kesalaka na kikesa yonso, kepesaka Nzambi kyese bonso nsudi ya kitoko ya makabu ya kuyoka.​—1 Korinto 15:58.

Vanda na kyese sambu na kinduku ti Nzambi mpi ti bantu

14. Inki mutindu mambu yina Polo ketuba na Baebreo 10:24, 25, kewakana ti mambu yina makabu ya kinduku vandaka kusala?

¹⁴ Nsukansuka, Polo kebenda dikebi na kinduku yina beto kele na yo ti bampangi na beto Bakristu ntangu beto kesamba Nzambi. “Beto banzila bantu ya nkaka na kati na beto na kupesa bo kikesa ya kuzola bampangi ya nkaka kuluta diaka mbote ti kusadila bo mambu ya mbote. Konso ntangu beto fweti kutana kaka na [lukutakanu]; beto vanda ve bonso bantu ya nkaka ke kwendaka diaka ve na [lukutakanu]. Kansi beto fweti pesa kikesa na bampangi ya nkaka na kati na beto, sambu beno ke mona nde kilumbu yina ya Kristo ta sambisa bantu yo yai mpi kele na nzila.” (Baebreo 10:24, 25) Bangogo yai yonso: ‘kupesa bo kikesa ya kuzola bampangi ya nkaka ti kusadila bo mambu ya mbote,’ ‘kukwenda na lukutakanu,’ mpi ‘kupesa kikesa na bampangi ya nkaka na kati na beto’ keyibusa beto mambu yina makabu ya kinduku vandaka kusala na bantu ya Nzambi na Izraele.

15. Inki kuwakana ya beto kemona na kati ya makabu ya kinduku ti balukutakanu ya Bukristu?

¹⁵ Mbala mingi bangogo “makabu ya kinduku” bo kebalulaka yo nde “makabu ya ngemba.” Ngogo ya Kiebreo yina bo mebalula awa nde “ngemba” kele na bumbidi, ziku yo kezola kutendula nde kuvukana na kupesa makabu ya mutindu yina kenataka muntu na kuvanda na ngemba ti Nzambi mpi ti bampangi Bakristu. Sambu na yina metala makabu ya kinduku, muntu mosi ya mayele ketuba nde: “Ya kyeleka, yo vandaka nsungi mosi ya kinduku ya mbote ti Nzambi ya Kuwakana ti bantu, ebuna Yandi vandaka kukulumuka sambu na kukuma Nzenza ya Izraele na ntangu ya makabu ya madya, ata Yandi vandaka ntangu yonso Muntu ya vandaka kuyamba bo.” Mambu yai keyibusa beto lusilu ya Yezu: “Sambu, na konso kisika yina ya bantu zole to tatu me kutakana na zina na mono, mono mpi kele pana ti bo.” (Matayo 18:20) Konso ntangu ya beto kekwendaka na lukutakanu mosi ya Bukristu, beto kebakaka mambote ya kuvukana na bampangi yina kepesaka beto kikesa, malongi yina kesyamisaka beto, mpi ti ngindu nde Mfumu na beto Yezu Kristu kele kisika mosi ti beto. Mambu yai kekumisaka lukutakanu ya Bukristu kima mosi ya kyese mpenza, mpi okazio ya kekumisaka lukwikilu na beto ngolo.

16. Kana beto yindula makabu ya kinduku, nki kima kekumisaka mpenza balukutakanu ya Bukristu kima ya kyese?

¹⁶ Na makabu ya kinduku, mafuta yonso, disongidila, mafuta yina vandaka kukangama na misopo, ti ba-foie, ti mafuta na yo, ti misuni ya mukongo, ti mukila ya dimeme yina kevandaka mafuta-mafuta, bo vandaka kupesa yo na Yehowa, mpi bo vandaka kuyoka mafuta yo na zulu ya mesa-kimenga sambu yo basisa midinga. (Levi 3:3-16) Bo vandaka kubaka mafuta bonso kitini ya mbisi ya kuluta vitamine mpi ya kuluta mbote. Kupesa yo makabu na zulu ya mesa-kimenga vandaka kidimbu ya vandaka kusonga nde bo mepesa bima ya kuluta kitoko na Yehowa. Kima ya kekumisaka balukutakanu ya Bukristu kima ya kyese mpenza kele nde beto kebakaka ve kaka malongi, kansi beto kekembilaka mpi Yehowa. Beto kesalaka mambu yai na ntangu beto kepesaka bamvutu na mpeve ya kukonda lulendo, kansi na kikesa, na kuyimba na ntima yonso, na kuwidikila na dikebi yonso, mpi na kusala bakomantere kana mpila memonana. Muyimbi-bankunga kutubaka na ndinga ya ngolo nde: “Aleluya! Beno kumisa Mfumu Nzambi! Beno yimbila Mfumu Nzambi nkunga ya mpa! Beno kumisa yandi ntangu beno bantu na yandi ke kutanaka!”​—Nkunga 149:1.

Balusakumunu ya nene yina Yehowa tapesa kekinga beto

17, 18. (a) Inki makabu ya nene kibeni Salomo kupesaka ntangu bo kangulaka tempelo mbala ya ntete na Yeruzalemi? (b) Inki balusakumunu bantu kubakaka na feti ya kukangula tempelo sambu na mbala ya ntete?

¹⁷ Na ntangu bo kangulaka tempelo sambu na mbala ya ntete na Yeruzalemi, na ngonda ya nsambwadi ya mvu 1026 ya N.T.B., Ntotila Salomo kupesaka “makabu ya nene kibeni na Yehowa.” (NW) Makabu yango kuvandaka “makabu ya kuyoka ya mvimba, makabu ya bima ya bilanga ti mafuta ya bambisi yina bo pesaka makabu ya kinduku.” Katula makabu ya bima ya bilanga yina bo pesaka, kilumbu yango yina bo tambikaka bangombe 22 000 ti mameme 120 000.​—1 Bantotila 8:62-65.

¹⁸ Keti nge lenda yindula fyoti badepanse yina yo lombaka na kusala ti kisalu yina feti ya nene ya mutindu yai kulombaka? Kansi, balusakumunu yina bantu ya Izraele kubakaka kulutaka badepanse yina bo salaka. Na nsuka ya feti, Salomo “vutulaka bantu na babwala na bo. Bo yonso kumisaka yandi, ebuna bo vutukaka ti kiese mingi sambu na mambote yonso ya Mfumu Nzambi salaka muntu na yandi Davidi ti bantu na yandi Israele.” (1 Bantotila 8:66) Ya kyeleka, mutindu Salomo kutubaka yo, “lusakumunu ya Yehowa​—yo yina kima kekumisaka muntu mvwama, mpi yandi keyikaka ve mpasi na zulu na yo.”​—Bingana 10:22, NW.

19. Inki beto fwete sala sambu na kubaka balusakumunu ya nene yina Yehowa kepesa banda ntangu yai mpi kimakulu?

¹⁹ Beto kezinga na ntangu yina “mambu ya kieleka” meyinga “kifwanisu ya mambote [yina] ke kwisa na ntwala.” (Baebreo 10:1) Yezu Kristu, na kisalu na yandi ya Nganga-Nzambi ya Nene, mekota dezia na zulu kibeni mpi mepesa valere ya menga na yandi mosi sambu na kulolula masumu ya bantu yina ketulaka lukwikilu na kimenga na yandi. (Baebreo 9:10, 11, 24-26) Na nsadisa ya kimenga yina ya nene mpi kana beto kepesa makabu na beto yina kele ya bunkete mpi ya kukonda kifu sambu na kukumisa Nzambi na ntima ya mvimba, beto mpi tavanda kaka na “kiese mingi,” ntangu beto kekinga balusakumunu ya nene yina Yehowa tapesa.​—Malashi 3:10.

Inki Mutindu Nge Tavutula?

• Inki malongi mpi kikesa beto lenda baka na mambu yina bo ketuba na Nsiku sambu na yina metala bimenga ti makabu?

• Inki kima ya ntete yo kelombaka sambu nde Nzambi kundima makabu, mpi nki yo ketendula sambu na beto?

• Inki kima beto lenda pesa ya kefwanana na makabu ya kuyoka ya luzolo?

• Na nki mambu beto lenda fwanisa balukutakanu ya Bukristu ti makabu ya kinduku?

[Kifwanisu ya kele na lutiti 14]

Sambu Yehowa kundima kisalu na beto, beto fwete buya mvindu ya mitindu yonso

[Kifwanisu ya kele na lutiti 15]

Beto kendimaka na ntwala ya bantu yonso nde Yehowa kele Nzambi ya mbote ntangu beto kesalaka kisalu ya kulonga

[Kifwanisu ya kele na lutiti 16]

Yehowa kupesaka kimenga ya nkudulu ya Yezu sambu na kugulusa bantu