Lukumu ya Bantu​—Nswa ya bo Kezitisaka Ve mbala Mingi

“Konso dyambu ya bo vandaka kusala na kati ya kan vandaka sambu na kukatula bantu lukumu.”​—MAGDALENA KUSSEROW REUTER YINA KUGULUKAKA NA KAN YA KONSATRASIO.

MPASI ya ngolo yina bantu ya Nazi vandaka kumonisa bantu na kan ya konsatrasio na ntangu ya Mvita ya Zole ya Inza ya Mvimba kuvandaka ve luyantiku to nsuka na yina metala kukatula bantu yankaka lukumu. Kana beto tadila luzingu ya bantu ya ntangu ya ntama ti ya ntangu na beto, yo kele pwelele nde: “Banda ntama, bo kekatulaka bantu yankaka lukumu.”

Kansi, kukonda kuzitisa lukumu ya bantu mesuka kaka ve na mambu ya nku yina kesalamaka na luzingu ya bantu. Mbala mingi kukonda kuzitisa lukumu ya bantu kesalamaka na mutindu ya kubumbana. Beto baka mbandu ya bana yina ya bo kesekaka sambu bo kele na kifu na nitu, to munzenza yina bo kesekaka sambu yandi kekukaka ve kuyikana ti bikalulu ya “bankwa-bwala.” To mpi muntu yankaka yina bo kemonisaka mpasi sambu na mpusu ya nitu to sambu na nsi na yandi. Bantu yina kesalaka mambu yango lenda mona yo bonso nsaka, kansi bayina bo kesekaka kewaka mpasi ti nsoni mpenza mpi bo kemonaka yo ve bonso nsaka.​—Bingana 26:18, 19.

Kupesa Muntu Lukumu Kele Inki?

Diksionere mosi ketendula nde ‘lukumu kele kikalulu ya kuzitisa muntu, kukumisa yandi, to kubaka yandi na valere.’ Yo yina, lukumu ya muntu kevukisaka mutindu yandi kekuditadilaka mpi mutindu bantu yankaka ketadilalaka yandi. Ata mambu mingi kevandaka na bupusi na luzingu na beto, kansi mutindu bantu yankaka ketadilaka beto kevandaka na bupusi ya ngolo na mpila beto kepesaka valere na luzingu na beto ya konso kilumbu.

Konso nsi kevandaka ti bansukami, bantu ya kukonda ngolo mpi ya kukonda lutaninu. Ata mpidina, kuvanda na kimvuka ya bantu yai ketendula ve nde valere na bo mekita. Kima kekatulaka bo lukumu kele mutindu bantu yankaka ketadilaka bo. Dyambu ya mawa kele nde mbala mingi bantu ya bo kekatulaka lukumu kevandaka bantu ya luzingu ya mpasi. Sambu na kutubila bampasi yina bo kemonisaka minunu, bansukami to bantu yina ke na kifu na nitu mpi bantu ya maladi ya kilau, bo kesadilaka mbala mingi bangogo yai “bantu ya kukonda mfunu,” to “bantu ya mpamba”!

Sambu na nki bantu kekatulaka bantu yankaka lukumu? Keti kilumbu kele ya bantu tapesaka bantu yonso lukumu? Disolo ya kelanda tapesa bamvutu ya mbote yina kekatuka na Biblia yina kele Ndinga ya Nzambi.