Landa Kristu na Kumonisaka Lukumu

1. Inki mutindu ntu-dyambu ya lukutakanu ya distrike ya mvula yai kewakana ti kumonisa lukumu?

¹ Biblia kemonisa Yehowa, Mfumu ya luyalanganu, bonso muntu ya melwata lukumu bonso lele. (Nk. 104:⁠1) Ntangu yonso Yezu vandaka kutuba mpi kusala mambu sambu na kupesa lukumu na Tata na yandi ti na bangidika na yandi. (Yoa. 17:⁠4) Na Lukutakanu na beto ya Distrike “Landa Kristu!” yina kekwisa, konso muntu na kati na beto tavanda ti mabaku ya kulanda mbandu ya Yezu mpi ya kupesa Yehowa lukumu.

2. Inki mutindu kudibongisa sambu na kuvukana na konso kitini ya lukutakanu kepesaka Yehowa lukumu?

² Lukumu na Mambu ya Lusambu: Beto lenda pesa Yehowa lukumu kana beto yidika mambu na mpila nde beto vukana na feti ya kimpeve yina yandi meyidikila beto. Keti nge mesolula dezia ti mfumu na nge ya kisalu mpi meyidika mambu na mpila nde nge vukana na bilumbu yonso tatu ya Lukutakanu ya Distrike, yika mpi na Kitanu? Keti nge mekudibongisa na kukuma na ntangu ya mbote na kisika ya lukutakanu mpi kuvukana na nkunga ti kisambu ya ntete? Keti nge meyidika madya yina nge ti bampangi na nge tadya na ntangu ya kupema? Na luyantiku ya konso kitini, kana ntwadisi kulomba beto na kubaka bisika na ntwala nde miziki kuyantika, beto fwete zenga masolo nswalu mpi kuvanda na ntwala nde programe kuyantika.

3. Inki mutindu kutula dikebi ya ngolo na programe kepesaka lukumu na lusambu na beto?

³ Kutula dikebi ya ngolo na programe kepesaka mpi Tata na beto ya zulu lukumu. Na nima ya kutala mutindu lukutakanu mosi ya distrike kusalamaka, nsoniki mosi kusonikaka nde bantu yina ketalaka fwete yituka mingi “na bikalulu ya mbote ya bantu yina kuvandaka na lukutakanu, mutindu bo vandaka kulanda na pima mpi na luzitu mambu ya bo vandaka kulonga sambu na kumonisa nde bo kesepelaka na mambu ya kimpeve.” Yandi tubilaka mpi “bana mingi yina kuvandaka pana . . . , bo yonso vandaka kusala kikesa na kumonisa bikalulu ya mbote to nkutu kulanda baverse na ba Biblia na bo.” Na ntangu programe kesalama, yo kele ve ntangu ya kusolula mpamba-mpamba, ya kutinda bansangu na telefone, ya kudya, to ya kutambula-tambula. Baleke fwete vanda kisika mosi ti bibuti na bo sambu bibuti kusadisa bo na kubaka mambote ya programe. (Kul. 31:12; Bing. 29:15) Kusala mutindu yina kemonisa nde beto kezitisa bantu yankaka mpi kele na ntonda na madya ya kimpeve yina bo kepesaka beto.

4. Sambu na nki beto fwete lwata na mutindu mosi ya lukumu ntangu beto kele na lukutakanu ya distrike?

⁴ Kulwata ya Lukumu: Bantu mingi kumonisaka ntonda na bangibusa ya bo pesaka beto na diskure “Monisa Luzitu Ntangu Yonso” ya beto landaka na lukutakanu ya distrike ya mvula meluta. Diskure yango kutubilaka mingi nde bansadi ya Nzambi fwete sala kikesa sambu na kumonisa luzitu na mutindu na bo ya kulwata mpi ya kudiyidika. Na mvula yai mpi beto fwete tula dikebi na dyambu yai. Mutindu na beto ya kulwata kemonisaka mawi ya beto kevandaka na yo sambu na Yehowa mpi sambu na dibaku ya kuvanda Bambangi na yandi. Ntangu yonso beto fwete lwata na mutindu mosi ya kesonga nde beto ‘kezitisaka Nzambi.’​—⁠1 Tim. 2:​9, 10.

5. Inki mutindu beto lenda lwata na lukumu na ntangu ya kubaka mupepe na mbanza yina lukutakanu ya distrike kesalama?

⁵ Keti beto fwete lwata na mutindu ya lukumu kaka na ntangu programe kesalama? Beto vila ve nde bantu mingi tamona beto ti bamakaro na beto na mbanza yina lukutakanu kesalama. Beto fwete lwata na mutindu yina kesala nde beto swaswana ti bantu yonso. Yo yina, ata na ntangu ya kubaka mupepe, mu mbandu ntangu beto kekwenda kusosa kima ya kudya na nima ya programe, beto fwete lwata na mutindu yina mefwana na baministre ya mekwisa na mbanza ti lukanu ya kuvukana na lukutakanu ya Bukristu mpi beto fwete lwata ve bilele bonso ba jeans, batriko ya nkufi to yina ke ti bisono. Kana beto lwata bilele ya bunkete mpi ya mbote, kansi ya ntalu mingi ve, beto tamonisa lukumu. Ebuna yo tata mpenza kimbangi ya mbote kibeni na bantu ya mbanza yina! Yehowa kesepelaka ntangu beto kelwataka bonso baministre.

6. Inki bambuma ya mbote beto lenda baka kana beto kemonisa lukumu?

⁶ Bambuma ya Mbote: Kumonisa lukumu na balukutakanu na beto ya distrike kepesaka beto mabaku ya kuta kimbangi ya dibaku ya mbote mpi yo kesadisaka bantu yina kemonaka beto na kuvanda ti mabanza ya mbote sambu na beto. Na nsuka ya lukutakanu mosi ya distrike, mfumu mosi ya leta kutubaka nde: “Beto memonaka ntete ve bantu ya kele ti bikalulu ya mbote ya mutindu yai. Beno kele mutindu yina Nzambi kezolaka nde beto vanda.” Kumonisa lukumu kesongaka nde beto kele ti luzitu mpi beto kezolanaka mpi kepesaka Yehowa lukumu. (1 Pie. 2:12) Yo kemonisaka nde beto ketinaka Nzambi boma mpi yo kemonisaka ntonda na beto na dibaku ya beto kele ti yo ya kulongama na Tata na beto. (Baeb. 12:28) Bika beto sala kikesa sambu na kumonisa lukumu ntangu beto kekinga Lukutakanu na beto ya Distrike “Landa Kristu!”

[Lupangu ya kele na lutiti 5]

Bangibusa ya Lukutakanu ya Distrike

◼ Bangunga: Bilumbu yonso tatu manaka tayantikaka na 9:20. Bakyelo takangukaka na 8:00. Na ntangu miziki ya Kimfumu tayantika kubula, beto yonso fwete vanda na bisika na beto na ntangu yina na mpila nde lukutakanu kuyantika na mutindu mosi ya kepesa lukumu. Manaka tasuka na 17:05 na Kitanu ti na Mposo, mpi na 16:10 na Lumingu.

◼ Kubumba Bisika: Nge lenda bumba bisika ya kuvanda kaka sambu na bantu yina kekwisa kumosi ti nge na vwatire to bantu yina nge kezingaka ti bo nzo mosi.

◼ Madya ya Midi: Bo kelomba beto na kunata madya ya kukonda kilo kansi ya mefwana na kudisa nitu, mu mbandu: mampa, bambuma (mankondo), nguba, mikati to bagato. Beto fwete tula bima bonso masa, kafe to te na kima mosi yina kepasukaka ve sambu na kubuya ba aksida. Ata muntu mosi ve kele ti nswa ya kunata malafu na lukutakanu ya distrike. Kana beto nata madya na beto ti bima yina beto lenda nwa, beto tavanda ve na mfunu ya kusumba yo na bateki. (Beno simba nde: bateki kele ve ti nswa ya kukota na kisika ya lukutakanu na konso ntangu yina.​—⁠Yoa. 2:​13-17.) Bantu yina tasadila bambabula sambu na kulamba na kisika lukutakanu tasalama fwete lomba ntete nswa na bampangi yina kele na mukumba ya kutala kisika ya lukutakanu ya distrike sambu bo songa bo kisika ya bo lenda sadila yo. Beno fwete keba sambu na kubasisa ve ba aksida.​—⁠Luka 10:​38-42.

◼ Makabu: Mbongo kebasikaka mingi sambu na kuyidika lukutakanu ya distrike. Beto lenda tula makabu ya luzolo ya mbote na Nzo ya Kimfumu na beto to na lukutakanu ya distrike sambu na kumonisa ntonda na beto na kisalu yina kesalama na ntoto ya mvimba.

◼ Ba Aksida mpi Maladi ya Kintulumukina: Bampangi yina kesalaka na departema ya ketalaka maladi ya kintulumukina kubokutaka nde bampangi mingi kebingaka bo sambu na mambu ya fyoti kibeni. Kana maladi kukanga muntu na kintulumukina na kisika ya lukutakanu ya distrike, beto kelomba beno na kusolula ti mpangi mosi ya kisalu ya kuyamba bantu, ebuna yandi tasukinina ve na kuzabisa departema ya Lusadisu ya Ntete na mpila nde bampangi yina kele na lukutakanu mpi ya mezaba kisalu yango mbote kutala nene ya maladi yango mpi kupesa lusadisu na bo.

◼ Kubaka Ndinga: Beno fwete kangisa ve konso masini yina ya kubakila ndinga na kura to na bansinga ya mikro ya kisika ya lukutakanu kansi beno lenda baka ndinga na mutindu yina tavalangasa ve bantu yankaka.

◼ Kubaka Bafoto: Kana beno kebaka bafoto na ntangu programe kesalama, beto kelomba beno na kusadila ve flashe.

◼ Batelefone: Beno fwete tula yo na mpila nde yo bebisa ve dikebi ya bawi.

◼ Bunkete: Beto memonaka nde mbala mingi, bantu yina kesumbaka madya na bateki kelosaka bapapie to basashe ya bo kekangilaka bo bima yango na ntoto. Yo kesalaka nde kibansala kufuluka ti bapapie, basashe, babusho ya milangi mpi buna na buna. Kana muntu mebaka lukanu ya kusumba kima mosi na bantu yina ketekaka (mu mbandu: bazoka, babisikwiti, bagato, bitini ya bambisi to konso kima yankaka), pana yandi kele ti mukumba ya kulosa papie to sashe yina bo kangilaka yo na kati ya bitunga ya bima ya mvindu kansi na ntoto ve. Kana beto memona nde muntu mosi melosa papie to sashe na ntoto, beto fwete lokuta yo mpi kulosa yo na bitunga ya bima ya mvindu. Bampangi, beto kelomba beno na kusala mpenza kikesa sambu kibansala ya kisika ya beto kesadila lukutakanu na beto ti nzyunga na yo kubikala bunkete. Konso muntu yina kele na lukutakanu fwete tadila dyambu ya bunkete na ntima mosi. Kana konso muntu kusala dikabu na yandi, na nsuka ya kilumbu, kisika ya lukutakanu tabikala bunkete. Beto kezola kumonisa bikalulu ya Nzambi yina beto kesambilaka sambu yandi kele santu.​—⁠1 Pie. 1:​15, 16; Kub. 19:10; Kul. 23:⁠14.

◼ Na Bisika na Beto ya Kulala: (1) Kana bo mepesa beto kisika ya kulala, beto fwete lutisa ve ntalu ya bantu yina munkwa nzo mepesila nswa. (2) Kana nge tazola ve kuvanda na nzo yina bo mepesa nge, beto kelomba nge na kutuba yo kukonda kusukinina. (3) Na ntwala ya kulamba, lomba ntete nswa na munkwa nzo to na bampangi yina kele na mukumba ya kutadila bisika ya kulala na Nzo ya Kimfumu na mpila nde bo baka konso ngidika yina kele mfunu. (4) Kusadila ve na mutindu ya mbi konso ngidika yina bampangi mebaka sambu na banzenza. Beto fwete sadilaka bukatikati. (5) Bunkete kekwendaka kumosi ti kikalulu ya kukangama na Nzambi. Kisika na beno ya kulala fwete vanda ntangu yonso bunkete mpi na ndonga. Dyambu yai ketadila mpi Nzo ya Kimfumu, yina beno lenda sadila bonso kisika ya kulala sambu na bampangi yina kekatukaka na mabundu ya ntama. (6) Monisa mbuma ya mpeve na mutindu na nge ya kuzinga ti bankaka, yo vanda ti munkwa nzo to ti bampangi Bakristu yankaka yina lenda vanda nzo mosi to kisika mosi ti nge.​—⁠Gal. 5:​22, 23, NW.