MAYELE YA NTAMA KANSI MFUNU BUBU YAI
Lolula na Ntima ya Mvimba
MUNSIKU YA BIBLIA: “Beno landa . . . na kulolulana na ntima ya mvimba ata kana muntu mosi kele na makambu ti muntu ya nkaka. Kaka mutindu Yehowa lolulaka beno na ntima ya mvimba, beno fwete sala mpi mutindu mosi.”—Bakolosai 3:13.
Yo ke tendula nki? Biblia ke fwanisa disumu ti mfuka, mpi kulolula ti kuyambudila muntu mfuka. (Luka 11:4) Mukanda mosi ke tuba nde na Masonuku, ngogo ya Kigreki ya bo ke balulaka na “kulolula” ke tendula “kubikila muntu mfuka mpi kulomba yo diaka ve.” Yo yina, kana beto ke lolula muntu ya me sala beto mbi, beto fwete vingila ve nde muntu yango kusadila beto kima mosi. Kana beto me monisa luzolo ya kulolula muntu, yo ke tendula ve nde beto me ndima kikalulu na yandi ya mbi to beto me mona mpamba mpasi yina yandi me pesa beto. Kansi, beto ke bakaka lukanu ya kubumba ve makasi na ntima ata beto kele ti bikuma ya mbote ya “kubokuta.”
Keti yo kele mfunu bubu yai? Sambu beto kele bantu ya kukonda kukuka, beto yonso ke sumukaka. (Baroma 3:23) Yo yina, beto fwete lolula bankaka sambu na kilumbu ya nkaka, beto ta vanda na mfunu nde bantu ya nkaka kulolula beto. Diaka, ntangu beto ke lolulaka bantu ya nkaka, beto ke bakaka mambote. Inki mutindu?
Kana beto ke bumbila bantu makasi na ntima mpi ke buya na kulolula bo, beto ke kudisala mbi. Mawi ya mutindu yai lenda manisa beto kiese mpi kukumisa luzingu na beto nkufi. Diaka, yo lenda tula mavimpi na beto na kigonsa. Rapore ya Doktere Yoichi Chida mpi ya profesere Andrew Steptoe, muntu ya ke longukaka bikalulu ya bantu, yina basikaka na zulunalu mosi (Journal of the American College of Cardiology) ke tuba nde: “Bansosa ya bo me sala ntama mingi ve ke monisa nde kana muntu ke wa makasi ti kikenene, yandi lenda bela maladi ya ntima.”
Kansi, beto tadila mambote ya kulolula bantu. Ntangu beto ke lolulaka bantu ya nkaka, beto ke taninaka bumosi, ngemba mpi bangwisana na beto ti bo. Diaka, beto ke landaka mbandu ya Nzambi yina ke lolulaka bansumuki na ntima ya mvimba. Yandi ke zolaka nde beto sala mpi mutindu mosi.—Marko 11:25; Baefezo 4:32; 5:1.