Manaka ya Lukutakanu ya Sipesiali ya Kilumbu Mosi Yina Kekwisa

Ntu-dyambu ya lukutakanu ya sipesiali ya kilumbu mosi ya mvu ya kisalu 2008 kele “Beto Kele Ntoto ya Tuma​—⁠Yehowa Kele Muwumbi na Beto.” Yo mekatuka na Yezaya 64:⁠7. Bandongisila ya Biblia ya bo mepesa na nzila ya programe yai tasadisa beto na kubaka na valere mpi na kubakisa mbote mayele, lunungu, ngolo, mpi zola ya Yehowa, Muwumbi ya Nene.

Diskure ya nkengi ya nzyunga ya kele na ntu-dyambu, “Beto Sala Bonso Banzungu ya Lukumu na Kisalu ya Kusamuna,” tamonisa mutindu bantu mingi kibeni ke na kubaka balusakumunu ya kuzaba kyeleka mpi ya kuzabisa yo na bantu yankaka. Diskure ya kele na ntu-dyambu “Kuyindulula Tatanina Nge” tamonisa mutindu kuyindulula minsiku ya lunungu ya Yehowa ketaninaka beto. Mutubi ya nzenza tasala badiskure yai: “ ‘Kulanda Ve Bikalulu ya Bantu ya Ntangu Yai’ ” mpi “Bika Muwumbi ya Nene Kuwumba Nge.” Bibuti ti baleke tabaka kikesa na masolo, “Baleke Yina Yehowa Kesadila” mpi “Mukumba ya Mfunu ya Bibuti na Kisalu ya Kuwumba.” Na nsadisa ya bansonga mpi bainterview, beto tavanda na kyese ya kuwa mpi kumona mambu yina bampangi ya babakala ti ya bankento ke na kusala na kisalu ya kusamuna. Bantu yina kezola kumonisa kudipesa na bo na Nzambi na mbotika ya masa fwete zabisa nkengi-ntwadisi kukonda kusukinina. Kuvila ve na kunata kopi na nge ya Nzozulu ya Nkengi ya beno talonguka na mposo ya lukutakanu ya sipesiali ya kilumbu mosi.

Muwumbi ya Nene kelungisaka konso dyambu ya yandi kekanaka. Kansi, konso muntu na kati na beto fwete pona kana yandi tandima to tabuya nde Nzambi kuwumba yandi. Bantu yina kendimaka na mayele yonso minsiku ya Yehowa mpi bansoba yina yandi kezolaka nde beto sala, lenda vanda bonso kitini ya ntoto ya tuma na maboko ya muwumbi, ebuna Yehowa lenda wumba bo, kutomisa bo, mpi kukumisa bo banzungu ya mfunu. Kana beto sala kumosi ti Yehowa, beto takumisa kimfumu na yandi mpi beto tabaka balusakumunu mingi.