Manaka ya Lukutakanu ya Sipesiali ya Kilumbu Mosi Yina Kekwisa
Ntu-dyambu ya lukutakanu ya sipesiali ya kilumbu mosi ya mvu ya kisalu 2009 kele “Landa na Kukeba Kisalu ya Ministre . . . , na Mpila nde Nge Lungisa Yo.” Yo mekatuka na Kolosai 4:17 (NW). Beto Bakristu, beto ketulaka dikebi mingi na ndongisila yai. Lukanu na beto kele ya kulungisa kisalu na beto ti kwikama yonso, mutindu Yezu kusalaka. (Yoa. 17:14) Ntumwa Polo mpi kubikilaka beto mbandu mosi ya mbote na dyambu yai. Yandi vandaka ti lukanu ya kumanisa kisalu na yandi.—Bis. 20:24.
Diskure ya nkengi ya nzyunga tamonisa mutindu bansamuni mingi kenunga bampasi yina bo kekutana na yo na kisalu na bo. Na nima, disolo “Yedisa Bima ya Nge Kunaka” tamonisa nki mutindu beto lenda sadisa mpenza bantu yina kele ya kuyilama na “kuvanda na moyo ya mvula na mvula.” (Bis. 13:48) Na disolo na yandi ya ntete, “Mutindu Beto Kesongaka nde Beto Kele Baministre,” mutubi ya nzenza tatendula verse mosi-mosi ya 2 Korinto 6:1-10. Na nima ya midi, yandi tasala diskure ya kele na ntu-dyambu: “Baka Kisalu na Nge ya Ministre na Valere.” Ntembe kele ve nde nge tabaka kikesa na masolo, “Baleke mpi Bambuta Kesepilaka ti Kisalu ya Ministre” mpi “Baleke Yina Kelungisaka Kisalu ya Ministre.” Bantu yina kezola kumonisa kudipesa na bo na mbotika ya masa na lukutakanu ya sipesiali ya kilumbu mosi to ya nzyunga fwete zabisa nkengi-ntwadisi kukonda kusukinina. Kutadila Nzozulu ya Nkengi kele kitini mosi ya mfunu ya balukutakanu na beto yonso ya nene mpi ya distrike. Nata kopi na nge ya Nzozulu ya Nkengi ya beno talonguka na mposo ya lukutakanu ya sipesiali ya kilumbu mosi.
Ntangu beto kekeba na mpila nde beto lungisa kisalu na beto ya ministre, beto kesala yonso sambu na kuzikisa nde mambu mpi bisalu yankaka kebaka beto ve ntangu ya kusala kisalu yina Yehowa mepesaka beto. Kikesa yina Masonuku kepesaka na nzila ya manaka yai ya lukutakanu ya sipesiali ya kilumbu mosi fwete sadisa beto yonso na kubakisa mambu yina beto fwete sala sambu na kulanda kutula dikebi na mambu ya mbote mpi kutadila kisalu na beto ti ngindu ya kulungisa yo mbotembote.