Kampanye ya Kuluta Nene ya Kisalu ya Kusamuna ya Mesalamaka Ntete Ve na Nsi-Ntoto!

Kubanda bamvula kuluta 100 ntangu yai, Bambangi ya Yehowa meyilamaka sambu na kusala kisalu ya kusamuna nsangu ya mbote. (1 Kor. 9:23) Na kampanye yai ya kuluta nene ya kisalu ya kusamuna ya mesalamaka ntete ve, beto kezabisaka nsangu yai na bandinga mingi kibeni, mpi na bansi kuluta 230. (Mat. 24:14) Kansi, sambu na nki kisalu yai kele mfunu? Mpi nki mutindu yo ke na kusalama na ntoto ya mvimba?

Video Les Témoins de Jéhovah : Organisés pour prêcher la bonne nouvelle kepesa bamvutu na bangyufula yina mpi kesonga mambu mingi ya metala kisalu na beto ya kesalama na ntoto ya mvimba. Na ntangu nge ketala yo, tadila bangyufula yai: (1) Inki mutindu kisalu na beto kesalamaka mpi ketwadisamaka? (2) Inki mutindu Departema ya Kusonika mpi badepartema ya Ketalaka Kisalu ya Kubalula Mikanda, ya Kutula Bifwanisu na Mikanda, mpi ya Ketalaka Bima ya Kuwidikila ti ya Kutala, kesadisaka na kuzabisa nsangu ya mbote? (3) Sambu na nki beto kenyemaka mpi kekabulaka mikanda mingi? (Yoa. 17:⁠3) (4) Beto kenyemaka mikanda ikwa na mvula mosi? (5) Mikanda na beto ya ketendulaka Biblia kelungisa nki lukanu? (Baeb. 4:12) (6) Inki bo ke na kusala sambu bantu yina kewaka ve mpi kemonaka ve kuzwa malongi ya kimpeve? (7) Mbongo yina beto kesadilaka kisalu na beto kekatukaka na wapi? (8) Inki mambote beto kebakaka na Biro ya Ketalaka Mambu ya Kuwakana ti Minganga, Biro ya Ketalaka Kisalu ya Kusamuna, mpi Biro ya Ketalaka Balukutakanu ya Distrike? (9) Sambu nge kele Mbangi ya Yehowa, inki mutindu video yai meyedisa ntonda na nge sambu na (a) bikesa yina organizasio ya Yehowa ke na kusala sambu na kusamuna nsangu ya mbote? (b) mabuta ya Betele kuluta 100 yina kele na ntoto ya mvimba? (c) formasio yina bankengi mpi bamisionere kebakaka? (d) mfunu ya kutadila verse mosi ya Biblia konso kilumbu mpi ya kudibongisa konso mposo sambu na balukutakanu ya dibundu? (e) mambote ya beto kebakaka na kukwenda na balukutakanu ya Bukristu? (f) mambu yina Paladisu tasala na ntoto? (Yez. 11:⁠9) (g) kusala kisalu ya kukatula bambuma yina kelanda na kusalama?​—⁠Yoa. 4:⁠35.

Inki mambu ya mbote nge monaka ntangu nge songisaka video yai na bantu ya dibuta na nge, bantu ya nge mezaba, bantu yina nge kevutukilaka, mpi balongoki ya Biblia? Sambu na nki ve kusongisa video yai na bantu yankaka mpi kuzabisa bo nsangu ya mbote?​—⁠Mat. 28:​19, 20.