Samuna Kukonda Kulemba

¹ Bantangu yankaka, beto lenda yindula nde beto kesalaka teritware na beto mbala na mbala, kansi bantu mingi ve kendimaka nsangu na beto. Ata mpidina, beto kele ti bikuma ya mbote ya kulanda na kusamuna.​—⁠Mt 28:​19, 20.

² Bonso Kimbangi: Yezu kutubaka nde kisalu ya kusamuna Kimfumu tavanda kitini mosi ya kidimbu ya kele ti mambu mingi yina tamonisa “nsuka” ya ngidika ya bima mpi nde yo tasalama bonso kimbangi “na makanda yonso.” (Mt 24:​3, 14) Ntangu bantu kemonaka beto na kisalu ya kusamuna nsangu ya mbote ya Kimfumu, yo kevandaka kimbangi mosi ya ngolo. Na nima ya viziti na beto, bantu yankaka lenda tubila viziti na beto na nsungi ya bangunga to bilumbu mingi, ata kana bo ndimaka ve nsangu na beto. Kana beto kebakisa bikuma yina kepusaka beto na kusala kisalu ya kusamuna, yo tasadisa beto na kukwamina. Ntangu beto kepesaka maboko na kulungana ya bambikudulu ya Biblia, ketaka kimbangi, mpi kezabisaka nsangu ya lukebisu, beto kesepedisaka Yehowa.​—⁠2 Tes. 1:​6-9.

³ Kukwamina Kele Mfunu: Sambu bantu kele ti bansaka mingi mpenza ya kulutisila ntangu mpi mambu mingi ya kebakaka bo ntangu, yo kelombaka nde beto kwamina sambu na kuyedisa mpusa na bo. Bambangi vandaka kwenda kutala nkento mosi konso mposo. Kansi, na nima ya mvula mosi yandi ndimaka nde bo kota na nzo na yandi sambu na kulonguka Biblia. Yandi sepelaka mingi mpenza na mambu yina yandi waka, ebuna yandi ndimaka na kulonguka Biblia, kuyantikaka kukwenda na balukutakanu, mpi ntama mingi ve yandi monisaka mpusa ya kubaka mbotika.

⁴ Mambu ya nsi-ntoto ke na kusoba nswalu, ebuna bantu mpi ke na kusoba. Bamingi yina vandaka kundima beto ve, lenda monisa ntangu yai mpusa ya kuwa nsangu ya kivuvu ya beto kenataka yina kepesaka kikesa. Ata kana muntu mosi mendima nsangu ya Kimfumu, kukwamina na beto tabuta mbuma.

⁵ Na nsi-ntoto ya mvimba, bantu mingi kelanda na “[ku]mona mpasi ti kudila sambu na mambu yonso ya nsoni yina ke luta.” (Ezek. 9:⁠4) Bambuma yina beto kebaka na kisalu na beto ya kusamuna kemonisa nde bantu ya luzolo ya mbote kendimaka nsangu ya Kimfumu. (Yez. 2:​2, 3) Yo yina, bika beto landa na kusamuna kukonda kulemba na kukwaminaka na luzolo yonso na kunata “nsangu ya mbote” ya kima mosi ya kuluta mbote.​—⁠Yez. 52:7; Bis. 5:⁠42.