Inki Mutindu Bo Tawa?
1. Sambu na nki kisalu ya kusamuna lenda vanda mpasi, mpi sambu na nki beto kekwaminaka?
1 Sambu kilumbu ya Yehowa kefinama nswalu, yo kele mpenza mfunu na kusadisa bantu mingi kibeni kukonda kusukinina na kubaka nzayilu ya sikisiki ya Nzambi mpi ya lukanu na yandi sambu na bantu. (Yoa. 17:3; 2 Pie. 3:9, 10) Bantangu yankaka yo lenda vanda mpasi, sambu bantu mingi ketulaka ve dikebi to lenda seka beto sambu na kisalu na beto ya kusamuna. (2 Pie. 3:3, 4) Ata mpidina, beto kele ti bikuma mingi ya kukwikila nde teritware na beto kele kaka ti bantu yina tandima nsangu ya mbote kana bo wa yo. Inki mutindu bantu yango tawa kana muntu kulonga bo ve?—Roma 10:14, 15.
2. Inki mutindu mbandu ya ntumwa Polo kepesa beto kikesa?
2 Mutindu ya Kununga Kutelamina: Sambu bantu mingi kele kaka ti luzolo ya kuwa nsangu ya Kimfumu, beto fwete lemba ve. Filipi kuvandaka bwala ya ntete ya Eropa yina kuwaka ntumwa Polo kelonga nsangu ya mbote. Ntangu bo kusilaka yandi ti Silasi makambu, bo bulaka bo fimbu mpi kutulaka bo na boloko. (Bis. 16:16-24) Kansi, mambu yai ya mpasi kupusaka ve Polo na kuwa boma mpi na kuyambula kusamuna. Ntangu yandi kwendaka na Tesalonika, bwala ya zole na nzyetolo na yandi ya zole ya kimisionere, ‘Nzambi pesaka yandi kikesa.’ (1 Bate. 2:2) Keti mbandu ya Polo kemonisa ve bikuma yina fwete pusa beto na ‘kulemba ve’?—Bag. 6:9.
3. Inki lenda pusa bantu yankaka na kusoba mabanza na bo ata bo vandaka kutula ntete ve dikebi?
3 Bantu mingi yina vandaka kubuya kuwa nsangu na beto bamvula meluta, mesobaka mabanza na bo. Bampasi ya mbongo, maladi, lufwa ya muntu mosi na dibuta, to bansangu ya mambu ya mbi yina kesalama na nsi-ntoto lenda sala nde bantu kusoba mabanza. (1 Kor. 7:31) Bantu yankaka yina bibuti na bo vandaka kutelamina mekumaka bambuta mpi kele ti luzolo ya kuwa. Kana beto kelanda na kusamuna, beto kepesa bantu yango dibaku ya ‘kusamba Mfumu Nzambi’ na ntwala nde yo kuma nsukinina.—Roma 10:13.
4. Inki kepusaka beto na kulanda “kaka” na kusamuna?
4 Landa “Kaka”: Zola na beto sambu na Nzambi mpi bankaka tapusa beto na kulanda “kaka” kusala kisalu ya kusamuna mpi ya kukumisa bantu balongoki, kaka mutindu bantumwa kusalaka na mvu-nkama ya ntete. (Bis. 5:42) Bubu yai, bantu mingi “ke mona mpasi ti kudila sambu na mambu yonso ya nsoni” yina kesalama ntangu yai. (Ezek. 9:4) Ntangu bo kewaka nsangu ya mbote, bo kebakaka kivuvu mpi kikesa mpenza! Ata bantu mingi kebuya kuwa, Masonuku kepesa beto kivuvu nde Yehowa kesepelaka mpenza na bikesa na beto.—Baeb. 13:15, 16.