Manaka ya Lukutakanu ya Nzyunga Yina Kekwisa

Keti mpila kele ya kubikala kaka ngolo na ntwala ya bantu yina kemengaka lusambu ya kyeleka? Keti mpila kele ya kubedisa bupusi yina kesosa kuvutula beto na nsi-ntoto yai ya mbi? Manaka ya lukutakanu ya nzyunga ya mvu ya kisalu 2009 tapesa bamvutu na bangyufula yai ya mfunu. Ntu-dyambu na yo kele “Landa na ‘Kusala Mambu ya Mbote Sambu na Kubedisa Mambu ya Mbi.’ ” (Roma 12:21) Beto tadila mambu yina kevingila beto.

Nkengi ya distrike tasala badiskure “Beto Kebakaka Ngolo ya Kusala Mambu ya Mbote Sambu na Kubedisa Mambu ya Mbi,” “Keba na Kuditudila Ntima Mingi Kuluta!,” “Kubika Fyoti Mambi Yonso Kumana!,” mpi “Beto Kumisa Lukwikilu na Beto Ngolo Sambu na Kununga Nsi-Ntoto.” Nkengi ya nzyunga tasala badiskure, “Yai Ntangu ya Kubikala Meso ya Kukangula!,” ya mekatuka na Roma 13:​11-13, mpi “Kukonda Ve Kikesa na Ntangu ya Mpasi,” ya mekatuka na Bingana 24:10. Yandi tasala dyaka diskure “Beto Tadila Bampusa ya Nzyunga.” Diskure “Keti Nge Lenda Sala Kisalu ya Kimupasudi-Nzila Sambu na ‘Kusadisa Bantu ya Nkaka’?” tavanda kitini yankaka yina tasyamisa mpenza. Diskure ya ntete ya bitini mingi kele na ntu-dyambu “Beto Nunga Mayele ya Mbi ya Satana.” Yo tasadisa beto na kuzaba mpi kubuya mayele ya mbi ya kubumbana ya Dyabulu na mambu ya metala teknolozi, bansaka ya kulutisa ntangu, mpi kulonguka. Diskure ya bitini mingi “Baka Ngolo ya Kunwana na Kilumbu Yai ya Mbi” tamonisa beto mutindu ya kusadila mbotembote bandongisila yina kele na Efezo 6:​10-18.

Kele ti kuwakana ya ngolo na kati ya kubedisa Satana, kisina ya mambi, mpi kisalu ya kusamuna nsangu ya Kimfumu. (Kus. 12:17) Mpila ya kuyituka kele ve na kumona nde Satana kenwanisa Bambangi ya Yehowa ntangu yonso! (Yez. 43:​10, 12) Kansi, Dyabulu tanunga ve ata fyoti sambu lukanu na beto kele ya kulanda kusala “mambu ya mbote sambu na kubedisa mambu ya mbi.” Baka bangidika ya sikisiki sambu na kubaka mpenza mambote na bitini yonso iya ya lukutakanu yai ya nzyunga.