Ngidika ya Bo Mebaka Sambu na Baministre ya Bakristu

1. Inki ngidika ya mpa kuyantikaka na mvu 1938, mpi sambu na nki kikuma?

¹ Na mvu 1938, organizasio ya Yehowa kuyantikaka ngidika mosi ya mpa. Bo bingaka bibuka ya mabundu na kukwenda na balukutakanu ya zone, yina beto kebingaka ntangu yai balukutakanu ya nzyunga. Sambu na nki kikuma? Nimero ya Yanuari 1939 ya Muzabisi (bubu yai Kisalu na Beto ya Kimfumu) kupesaka mvutu yai: “Balukutakanu yai ya nene kele na kati ya Organizasio ya Teokrasi ya Yehowa sambu na kutwadisa kisalu ya Kimfumu na yandi. Malongi ya bo kepesaka kuna kele mfunu sambu na konso muntu sambu yandi sala mbote-mbote kisalu ya bo mepesaka beto.” Kana beto tadila kuyela ya ntalu ya bansamuni ya Kimfumu yina vandaka kaka 58 000 na mvu 1938 mpi kukumaka kuluta 7 000 000 na mvu 2009 yo kele pwelele nde balukutakanu ya nzyunga, kele na kulungisa lukanu na yo ya kusadisa baministre na ‘kusala kisalu ya bo mepesaka bo’!

2. Inki mambu bo tatubila na lukutakanu na beto ya nzyunga sambu na mvula ya kisalu ya mpa?

² Ntu-Dyambu Sambu na Mvula ya Kekwisa: Beto kevingila ti mpusa ya ngolo manaka yina tayantika na Septembri mpi kikesa yina yo tapesa beto. Ntu-dyambu na yo kele ‘Beno Kele Bantu ya Nsi-Ntoto Ve’ ya mekatuka na Yoane 15:19. Inki kele mwa badiskure yina tanatila mpenza baministre ya Bakristu mambote? Na Mposo beto talanda diskure “Mutindu Kisalu ya Ntangu Yonso Ketaninaka Beto” Beto tasepela mpi na diskure ya bitini tatu ya kele na ntu-dyambu “Beno Bebisama Ve na . . .” “Mbisi ya Makasi,” “Nkento ya Nene ya Ndumba,” mpi “Bakomersa-Ntambudi.” Na Lumingu beto tawidikila diskure ya bitini iya ya kele na ntu-dyambu “Zola Yehowa, Kansi Nsi-Ntoto Ve.” Badiskure yankaka ya beto talanda kele “Beno Landa na Kuzinga Bonso ‘Banzenza mpi Bantu Yina Kezingaka Ntangu Fyoti,’” mpi “Beno Vanda Kikesa! Beno Lenda Nunga Nsi-Ntoto.”

3. Inki mambote beto lenda baka kana beto kwenda na lukutakanu ya nzyunga?

³ Ntama mingi ve na nima ya kukwenda na lukutakanu mosi ya nzyunga, mpangi-nkento mosi yina melembaka na kisalu ya kusamuna kusonikaka nde manaka kupusaka yandi na kutadila dyaka luzingu na yandi mpi na kuvanda ti lukanu ya “kudipesa na kisalu ya kusamuna mpi na kuyambula kupesa bikuma!” Ntembe kele ve nde manaka ya lukutakanu ya nzyunga sambu na mvula ya kisalu ya mpa tasadisa beto yonso na kuzola Yehowa na kisika ya kuzola nsi-ntoto. (1 Yoa. 2:15-17) Sala yonso sambu na kuvukana mpi na kutula dikebi na mpila nde nge baka mpenza mambote na ngidika yai ya zola ya bo mebaka sambu na baministre ya Bakristu!