Kulonguka Biblia ya Beto Mosi mpi ya Dibuta Kele Mfunu Mingi!
1. Nto-Kimvuka kekudibanza mingi sambu na beto na nki dyambu na ntangu yai, mpi sambu na inki?
1 Bonso na mvu-nkama ya ntete, Nto-Kimvuka kekudibanzaka mingi sambu na mambote ya bantu ya Yehowa. (Bis. 15:6, 28) Mutindu mpasi ya nene kefinama, yo kele mfunu mingi nde konso nsamuni ya Kimfumu kuvanda ti bangwisana ya ngolo ti Yehowa. Inki mutindu nge tasadila ntangu yina beto vandaka kulutisa ntete na Kulonguka ya Mukanda ya Dibundu? Bo kesyamisa beto yonso na kusadila ntangu yai sambu na lusambu ya dibuta. Kusadila ntangu yai na mayele tasadisa beto na kutimuna na mudindu Ndinga ya kupemama ya Nzambi mpi kubaka masa na yo ya kepesaka luzingu.—Nk. 1:1-3; Roma 11:33, 34.
2. Inki mutindu beto lenda yidika lusambu na beto ya nkokila ya dibuta?
2 Nkokila ya Lusambu ya Dibuta: Beto kesyamisa bamfumu ya mabuta na kulungisa mukumba na bo na ntwala ya Yehowa ya kutwadisa kulonguka ya Biblia ya mbote na dibuta mpi na kusala yo mbala na mbala. (Kul. 6:6, 7) Bampangi ya babakala ti ya bankento ya mekwelaka ntete ve yina kele ve ti mikumba ya dibuta tasadila ntangu yai sambu na kulonguka na bo mosi ya Biblia mpi kusala bansosa. Yo kele mfunu nde beto yonso kusumba “ntangu” sambu na kulonguka mpi kuyindulula na mpila nde beto vanda ti kimpeve ya ngolo ya beto kele na yo mfunu na ‘bilumbu yai ya mbi.’—Ef. 5:15, 16.
3, 4. Inki bangindu bo mepesa na yina metala malongi ya beto lenda sadila, mpi ti nki lukanu na mabanza?
3 Mambu ya Kulonguka: Index des publications Watch Tower to CD-ROM Watchtower Library lenda sadisa nge na kuzwa malongi yina tasadisa dibuta na nge na kusepela ti kulonguka na beno ya Biblia. Mabuta lenda tadila masolo ya Nzozulu ya Nkengi, bonso masolo yai ya kebasikaka mbala na mbala “Kinsweki ya Kyese ya Dibuta,” “Beno Longa Bana na Beno,” mpi “Sambu na Baleke na Beto.” Dyaka, Réveillez-vous ! kele ti masolo ya kulandana “Les jeunes s’interrogent” mpi masolo ya mbote ya ketubilaka bima ya kitoko ya kele na lugangu.
4 Kana beno ketanga ve Biblia ntinu-ntinu, bantu yonso ya dibuta takanga na mabanza bansiku ya Nzambi mpi tasadila yo na luzingu na bo. (Baeb. 4:12) Bilumbu yankaka, beno lenda tala mpi kutubila video mosi na kati ya bavideo yina organizasio mebasisaka. Beno kele ti mabaku mingi ya kupona beno mosi mambu ya kulonguka mpi mutindu ya kulonguka yo. Sambu na nki ve kuyula bantu ya dibuta masolo yina bo tasepela na kulonguka?
5 Sambu na Nki Yo Kele Mfunu Ntangu Yai: Kukumisa kimpeve na beto ngolo tasadisa beto na ‘kuvanda na kikesa, mpi na kutala nki mutindu Nzambi kegulusa beto.’ (Kub. 14:13) Bibuti kele na mfunu ya lutwadisu ya Nzambi sambu na kusansa bana na bo “na kati ya bantu ya luvunu ti ya mbi ya ntangu yai.” (Filp. 2:15) Bana kele na mfunu ya lusadisu sambu na kunwana ti bupusi ya kubeba ya bikalulu ya mbote na banzo-nkanda bubu yai. (Bing. 22:3, 6) Bankwelani fwete kumisa ngolo ‘bansinga na bo tatu’ ti Yehowa. (Lo. 4:12) Yo yina, bika beto sadila na mayele yonso ntangu yina mebikala sambu na kutunga ‘lukwikilu na beto ya kuluta santu’!—Yude 20, NW.
5. Sambu na nki kulonguka Biblia ya beto mosi mpi ya dibuta kele mfunu mingi na luzingu na beto bubu yai?