Longa na Mutindu ya Pete
1. Inki kele dyambu mosi ya mfunu ya kesadisaka na kulonga na mutindu ya pwelele mpi ya mbote?
1 Kutuba na mutindu ya pete kele mfunu sambu na kulonga mbote. Kutadila mutindu Yezu, Longi ya Nene, kulongaka lenda sadisa beto na kutomisa ‘mayele na beto ya kulongila.’—2 Tim. 4:2, NW; Yoa. 13:13.
2. Yo kelombaka nki sambu na kulonga na mutindu ya pete, mpi kulonga ya mutindu yina kevandaka ti nki bupusi?
2 Kutuba na Mutindu ya Pete: Disolo na Zulu ya Ngumba kele ti mwa bakyeleka ya mfunu mingi yina ata muntu mosi yankaka ve metubaka dezia, mpi yo kele ti bangogo ya pete. (Mat., bakapu 5-7) Kibuka ya bantu yina kuwidikilaka Yezu “vandaka kuyituka ngolo mutindu yandi vandaka kulonga.” Malongi ya Yezu kusimbaka mpenza ntima ya bapolisi yina bo tindaka sambu na kukanga yandi, yo yina bo tubaka nde: “Ata mbala mosi ve muntu me tubaka mambu mutindu muntu yai ke tuba.” (Mat. 7:28, 29; Yoa. 7:46) Beto kele ve ti mfunu ya kusadila bangogo, bansa to bambandu ya mpasi-mpasi sambu kyeleka kusimba mpenza ntima ya bantu. Beto lenda tendula kyeleka pwelele na kusadilaka bangogo yina bantu mezaba.
3. Sambu na nki bantu yankaka kemekaka kulonga bawi na bo mambu mingi kuluta, mpi nki mutindu beto lenda buya dyambu yai?
3 Tadila Kiteso ya Mambu Yina Nge Fwete Longa: Yezu vandaka kutadila bawi na yandi sambu na kuzaba kiteso ya malongi yina yandi fwete longa bo na ntangu mosi buna. (Yoa. 16:12) Beto fwete bakisa bampusa ya bantu yina beto kesolula ti bo mpi kuwakanisa disolo na beto ti bampusa na bo, mingimingi ntangu beto keta kimbangi na bantu ya dibuta, na bantu ya mpa, to na bana. Beto fwete keba nde beto longa bo ve mambu mingi kuluta ata ntangu yo lenda monana nde bo kewidikila beto ti dikebi. Bantu ya ntima-masonga talanda na kubaka nzayilu ya Nzambi ya kyeleka, Yehowa.—Yoa. 17:3; 1 Kor. 3:6.
4. Sambu na nki yo kele mfunu na kutula dikebi na mambu ya mfunu na kisika ya kutula dikebi na mambu ya fyoti-fyoti?
4 Tula Dikebi na Mambu ya Mfunu: Yezu kukumisaka ve malongi na yandi mpasi na kuyikaka mambu mingi ya fyoti-fyoti. Ntangu yandi tubaka nde: “Bantu yonso yina me fwaka [ya] kele na maziamu, . . . ta basika na maziamu na bo,” yo vandaka ve ntangu nde yandi longa mambu mingi na yina metala bivuvu zole ya bantu yina tafutumuka. (Yoa. 5:28, 29) Ntangu beto kelonguka Biblia ti bantu, beto fwete tula dikebi na mambu ya mfunu mpi kubuya kikalulu ya kukotisa kukonda mfunu masolo yankaka ya ketadila ve mambu ya beto kelonguka.
5. Inki lusakumunu beto lenda baka kana beto kelonga na mutindu ya pete?
5 Beto ketonda mpenza Yehowa na mpila yandi melongaka beto na mutindu ya pete mambu yonso ya beto kezolaka kuzaba! (Mat. 11:25) Bika konso muntu na kati na beto kusala kikesa sambu na kulonga na mutindu ya pete mpi kubaka kyese ya kisalu yina kebutaka mbuma.