Mambu Tatu Sambu na Kutomisa Mutindu na Nge ya Kulonga
1. Sambu na nki beto fwete sosa kutomisa mutindu na beto ya kulonga?
1 Bambangi yonso kele balongi. Yo vanda ntangu beto kekutana ti bantu sambu na mbala ya ntete, kevutukila bo sambu na kulanda mpusa yina bo monisaka, to kelonguka Biblia ti bo, beto kelongaka nsangu. Kansi mambu yina beto kelongaka kele ve ya mpamba-mpamba. Beto ketendulaka pwelele “masonama ya santu,” yina lenda kumisa bantu “mayele sambu na kubaka luguluku.” (2 Tim. 3:15, NW) Beto kele ti dibaku mosi ya kitoko mpenza! Beto tadila mambu tatu sambu na kutomisa mutindu na beto ya kulonga.
2. Inki mutindu beto lenda longa na mutindu ya pete?
2 Longa na Mutindu ya Pete: Kana beto mezaba disolo mosi mbote-mbote, yo lenda vanda mpasi na kubakisa nde disolo yango lenda vanda pete ve sambu na muntu yina mezaba yo ve. Yo yina, ntangu nge kelonguka Biblia ti muntu, yo kele mfunu ve na kuyika mambu mingi ya kukonda mfunu. Kansi, tubila mambu ya mfunu. Kana muntu ketuba mambu mingi yo ketendula kaka ve nde yandi mezaba kulonga. (Bing. 10:19) Mbala mingi, yo kevandaka mbote kibeni na kutanga kaka baverse ya mfunu. Na nima ya kutanga verse mosi, benda dikebi na kitini ya verse yina kewakana ti disolo yina beno ketubila. Disolo na Zulu ya Ngumba, yina kele na Matayo kapu 5 tii na 7, kele ti bakyeleka ya mudindu; ata mpidina Yezu kulongaka na mutindu ya pete mpi kutubaka bangogo fyoti yina yandi ponaka mbote.
3. Inki kele mfunu ya bambandu, mpi mbala mingi bambandu ya nki mutindu kevandaka ya mbote?
3 Sadila Bambandu: Bambandu kepusaka na kuyindula, kubasisa mawi, mpi yo kesadisaka na kuyibuka. Sambu na kupesa bambandu ya mbote, yo kelomba kaka ve nde nge vanda muntu yina ketaka to kesonikaka masolo. Mbala mingi Yezu vandaka kusadila bambandu ya nkufi mpi ya kukonda mpasi. (Mat. 7:3-5; 18:2-4) Bafoto yina kevandaka na kati ya mukanda lenda vanda mpi mfunu mingi. Kudibongisa mbote-mbote na ntwala, lenda sadisa nge na kusadila bambandu ya mbote.
4. Inki mutindu beto lenda yula bangyufula na mutindu ya mbote?
4 Kuyula Bangyufula: Bangyufula tasadisaka longoki na nge na kuyindula. Yo yina, na nima ya kuyula ngyufula bikila longoki ntangu ya kupesa mvutu. Kana nge nwanina kupesa mvutu nge mosi, nge tazaba mpenza ve mambu yina longoki kebakisa. Kana yandi mepesa mvutu ya mbi, yo lenda vanda mbote mingi na kuyula bangyufula yankaka ya ngika sambu na kusadisa yandi na kuzaba mvutu ya mbote, olie ya kusongisa yandi. (Mat. 17:24-27) Ya kyeleka, ata muntu mosi ve na kati na beto kele longi ya kukuka. Yo yina, Biblia kesyamisa beto na kukeba na malongi na beto. Kusala mpidina tanatila beto mambote ya kimakulu, yika mpi bantu yina kewidikilaka beto.—1 Tim. 4:16.