Inki Ntangu Kuvutukila Bantu Yina Kumonisaka Mpusa?
1. Kukumisa bantu balongoki kelombaka inki?
1 Kukumisa bantu balongoki kelombaka kuvutukila konso muntu yina kumonisaka luzolo ya kuzaba bangidika ya Kimfumu ya Yehowa. (Mat. 28:19, 20) Ntangu ya kuluta mbote ya kusala mvutukila ya mpa ketadilaka mbala mingi manaka na beto mpi ya muntu yina kumonisaka mpusa. Sambu na nki beto fwete vutukila yandi kukonda kusukinina na nima ya viziti ya ntete?
2, 3. Sambu na nki beto fwete sala yonso sambu na kuvutukila bantu kukonda kusukinina?
2 Sambu na Nki Kuvutuka Kukonda Kusukinina? Kubika fyoti, kisalu ya kusamuna “nsangu yai ya mbote ya Kimfumu” takuma na nsuka, mpi nsuka ya ngidika yai ya bima mekuma penepene. (Mat. 24:14; 1 Pie. 4:7) Yo yina, sambu bantu yina kumonisaka mpusa kele ntete na “kilumbu” ya luguluku, beto fwete zitisa ndongisila ya ‘kutula ngolo na kulonga nsangu ya Nzambi,’ yina kelombaka mpi kuvutukila bantu kukonda kusukinina sambu na kuyedisa mpusa yina bo monisaka.—2 Kor. 6:1, 2; 2 Tim. 4:2.
3 Satana kele ti mpusa ya ngolo ya kukatula konso nkeni ya Kimfumu yina beto lenda kuna na ntima ya muntu yina kumonisaka mpusa. (Mar. 4:14, 15) Mbala mingi, bantu ya dibuta, banduku ya kisalu, mpi bantu yankaka kesekaka bantu yina kemonisaka mpusa. Kuvutukila bo kukonda kusukinina tasadisa beto na kutunga na zulu ya masolo yina beto solulaka dezia ti bo na ntwala nde bantu yankaka kununga na kufwa mpusa yina bo monisaka.
4. Ntangu beto mekutana ti muntu na mbala ya ntete, nki mutindu beto lenda tula fondasio ya mvutukila ya mpa?
4 Beto Pesana Dilaka: Yo kele mbote mingi na kubaka bangidika ya kuvutukila muntu yango na ntwala nde beno kabwana. Yula ngyufula mosi yina nge tapesa mvutu na ntangu nge tavutukila yandi. Kubaka banoti ya mbote ya mambu ya beno solulaka mpi ya kilumbu ti ntangu yina nge tavutukila yandi kele mfunu. Kana manaka na nge kepesa nge nzila, nge lenda lomba na kuvutukila yandi na kilumbu ya kelanda to kukonda kusukinina. Kana mbala ya ntete ya beno mekutana kele na wikendi mpi muntu yina kumonisaka mpusa kesalaka mposo ya mvimba, ziku yandi tandima nde nge vutukila yandi na wikendi yina kelanda. Ntangu nge mepesa yandi dilaka, sala yonso na kuzitisa yo.—Mat. 5:37.
5. Inki mutindu kuvutukila bantu kukonda kusukinina tasadisa beto na kulungisa kisalu yina Yezu kupesaka ya kukumisa bantu ?
5 Beto kele ti bikuma ya mbote ya kuvutukila bantu yina kumonisaka mpusa kukonda kusukinina kana mpila kele. Yo yina, beto pesa bo dilaka mpi beto vutukila bo kukonda kusukinina, sambu ntangu “me bika diaka mingi ve.” (1 Kor. 7:29) Kana beto kevutukila bantu yina kusepelaka na nsangu ya Kimfumu kukonda kusukinina, bikesa na beto tabuta bambuma mingi mpenza.