‘Zinga na Ngemba ti Bantu Yonso’
1. Inki ndongisila ya Biblia beto fwete sadila ntangu beto ke kutana ti bawi yina ke sepelaka ve na beto?
1 Bantu ya Yehowa ke zolaka ngemba, mpi kisalu na beto ya kusamuna ke vandaka ya ngemba. (Yez. 52:7) Kansi, bantangu ya nkaka, beto ke kutanaka ti bantu yina ke sepelaka ve mutindu beto ke kwendaka kutala bo. Inki ta sadisa beto na kuzinga na ngemba kana beto kutana ti mambu ya mutindu yai?—Bar. 12:18.
2. Sambu na nki kubakisa mambu kele mfunu?
2 Bakisa Mambu: Ata bantu ya nkaka ke waka makasi sambu bo ke sepelaka ve na kieleka, bankaka lenda wa makasi sambu na bikuma yina ke tadila ve nsangu na beto. Ziku beto kwendaka na ntangu mosi ya mbote ve. Muwi lenda vanda na makasi sambu na mambu na yandi mosi. Ata yo vanda nde nsangu ya mbote me pesa yandi makasi, beto fwete yibuka nde, ziku yandi ke sala mutindu yina sambu bo me kusaka yandi. (2 Bak. 4:4) Kubakisa mambu ta sadisa beto na kuvanda pima mpi kumona ve nde yandi kewila beto makasi.—Bing. 19:11.
3. Inki mutindu beto lenda zitisa muwi?
3 Vanda Luzitu: Bantu mingi na teritware me kangamaka ngolo na balukwikilu na bo. (2 Bak. 10:4) Bo kele na kimpwanza ya kupona mambu yina bo ta wa to yina bo ta wa ve. Beto fwete mona ve mpamba balukwikilu ya muwi to kudimonisa nde beto me zaba mambu mingi ya Biblia kuluta yandi. Kana yandi kula beto, beto fwete kwenda na luzitu yonso.
4. Kutuba na mawete yonso ke tendula inki?
4 Tuba na Mawete Yonso: Ata kana bo finga beto, mvutu na beto fwete vanda ya mbote mpi ya mawete. (Bakol. 4:6; 1 Pie. 2:23) Na kisika ya kubendana ti muwi, beto fwete meka kusosa mambu yina beto ke wakanisa beto. Ziku beto lenda yula yandi na mawete yonso bikuma yina yandi ke telamina beto. Kansi bantangu ya nkaka, sambu na kupesa yandi ve makasi, yo ta vanda mbote na kuzenga disolo ti yandi.—Bing. 9:7; 17:14.
5. Inki mambote beto ta baka kana beto kele na ngemba ti bantu na kisalu ya kusamuna?
5 Kana beto kele bantu ya ngemba, muwi lenda yibuka mbote mutindu beto sadilaka yandi mambu, mpi kuwidikila mpangi ya nkaka yina ta sosa kulonga yandi. (Bar. 12:20, 21) Ata yandi ke landa kutelamina beto, yandi lenda kuma mpangi na beto kilumbu ya nkaka. (Bag. 1:13, 14) Yo vanda muwi ke sepela ti kieleka to ve, beto ta pesa Yehowa lukumu mpi ta kumisa malongi na beto kitoko kana beto ke landa kudiyala mpi ke zinga na ngemba.—2 Bak. 6:3.