Beto Yedisa Mayele na Beto na Kisalu ya Kusamuna—Mutindu ya Kupesa Mvutu Kana Muwi Kele na Makasi

Mfunu na Yo: Bantu mingi ya beto ke kutanaka ti bo na kisalu ya kusamuna ke vandaka luzitu. Kansi, Yezu bikulaka nde bantu ya nkaka ta menga beto. (Yoa. 17:14) Yo yina, beto fwete yituka ve kana beto kutana ti muwi ya kele na makasi. Kana beto me kutana ti muntu ya mutindu yai, beto fwete sala mambu na mutindu ya ke sepedisa Yehowa, muntu ya beto ke monisaka. (Bar. 12:17-21; 1 Pie. 3:15) Kusala mutindu yai, ta kanga dikambu ya fioti nzila na kukuma dikambu ya nene. Yo ta ta mpi kimbangi na muwi ti na bantu ya ke mona beto mpi yo ta sala nde na mbala ya nima, bo widikila Bambangi ya Yehowa yina ta kwenda kutala bo na dikebi yonso.—2 Bak. 6:3.

Mutindu ya Kusala Yo:

Vanda mawete mpi monisa zola. Bikalulu yai lenda lembika dikambu yango. Kutula ve mambu yina muwi ke tuba na ntima. (Lo. 7:9) Yandi lenda vanda na makasi sambu na mambu ya ke yangisa yandi to sambu beto me kwenda kutala yandi na ntangu ya mbi. Kana yandi me wa makasi sambu na nsangu na beto, yo ke vandaka mbala mingi sambu bo me kusaka yandi.—2 Bak. 4:4.
Pesa yandi mvutu ya mbote mpi ya luzitu. (Bing. 15:1) Keti me tedimisa yandi na mpongi to nge me zenga yandi ndinga? Ata beto ke lombaka ve bantu pardo sambu na kulonga bo, nge lenda lomba pardo na kudikulumusa yonso sambu nge me kwenda kutala yandi na ntangu ya mbi. Keti yandi kele na makasi sambu na mambu ya mbi ya bo me zabisaka yandi sambu na beto? Kana mpidina, nge lenda tuba nde: “Mono me bakisa kikuma ya ke pusa nge na kuwa makasi. Mbala ya nkaka bo me zabisaka nge mambu ya luvunu sambu na beto. Keti mono lenda tendudila nge?” Keti yandi ke tula ntembe sambu na dilongi mosi ya beto ke longaka, mu mbandu kubasisa muntu na dibundu to kuvutula menga? Nge lenda tuba nde: “Mono me bakisa. Bantu ya nkaka ke tubaka mpi mutindu yai. Keti nge ta zola nde mono songa nge na Biblia kisina ya malongi yango?”
Kana muntu me wa makasi mingi, yo ta vanda mbote na kukatuka na pima yonso. Kana yandi me tuba nde Bambangi ya Yehowa kukwenda kutala yandi diaka ve, nge lenda zabisa yandi nde beto ta zitisa luzolo na nge.

Sadila Yo Ngonda ya Mvimba:

Beno sala bansonga na lusambu ya dibuta.
Kana beno me yambula muntu ya me wa makasi, solula ti muntu ya ke samuna ti nge mutindu ya mbote ya nge zolaka kupesa mvutu.