Bamvutu na Bangiufula na Beno

◼ Inki minsiku ya Biblia ke tadila mutindu ya kusadila telefone na ntangu ya balukutakanu ya Bukristu to na kisalu ya kusamuna?

“Konso Kima Kele ti Ntangu na yo.” (Lo. 3:1, NW): Telefone ke pesaka beto mabaku ya kutindila bantu bansangu to kusolula ti bo konso ntangu yina. Kansi yo kele ti mabaku ya nkaka yina Mukristu fwete bika ve nde telefone kubenda dikebi na yandi. Mu mbandu, balukutakanu na beto kele ntangu ya kusambila Yehowa, kubaka malongi ya kimpeve, mpi ya kupesana kikesa mpenza. (Kul. 31:12; Nk. 22:22; Bar. 1:11, 12) Keti yo ke lomba ve kukanga telefone ntangu beto me kuma na lukutakanu mpi kutanga bansangu na nsuka? Kana beto ta vanda ti masolo ya mfunu mingi yina ke lomba nde beto kanga ve telefone, beto fwete tula yo na vibreur to na silencieux sambu na kuvalangasa ve dikebi ya bantu ya nkaka.

“Sala Mambu Yonso Sambu na Nsangu ya Mbote.” (1 Bak. 9:23): Bantangu ya nkaka yo ke vandaka mfunu na kusadila telefone na kisalu ya kusamuna. Mu mbandu, mpangi-bakala yina ke twadisa kimvuka mosi ya bansamuni lenda sadila yo sambu na kuzikisa kana ba yina ke samuna na ndambu ya nkaka ya teritware kele mbote. Bantangu ya nkaka, bansamuni ke sadilaka telefone sambu na kubinga muntu mosi yina monisaka mpusa to longoki ya Biblia na ntwala ya kuvutukila yandi, mingi-mingi kana muntu yango ke vandaka ntama. Kana beto kele ti telefone, beto fwete yidika yo na mpila nde yo zenga beto ve ndinga ntangu beto ke solula ti muwi. (2 Bak. 6:3) Ntangu beto ke vingila bansamuni ya nkaka, keti yo ta vanda ve mbote na kutula dikebi na kisalu ya kusamuna mpi na bantu yina beto ke samuna ti bo, na kisika ya kusolula na telefone to kutindila nduku mosi nsangu?

Zitisa Bantu ya Nkaka. (1 Bak. 10:24; Bafi. 2:4): Beto fwete vanda ve ata fioti ti kikalulu ya kukwendaka na retare na balukutakanu ya kisalu ya bilanga mpi kuyindula nde beto lenda binga muntu mosi na telefone to kusonikila yandi sambu na kuzaba kisika kimvuka na beto ke samuna. Kana beto me kuma na retare, mbala mingi yo ke lombaka kuyidika diaka kimvuka. Ya kieleka, mambu ya nkaka ya kukonda kukana lenda tula beto na retare. Kansi, kana beto kuma ti kikalulu ya kukumaka na ntangu ya mbote, beto ta monisa nde beto ke zitisa ngidika ya Yehowa, mpangi yina ke twadisa lukutakanu, mpi bansamuni ya nkaka.