Widikila mpi Longuka
1. Sambu na nki yo lenda lomba kusala bikesa mingi sambu na kuwidikila mpi kulonguka na lukutakanu ya distrike?
1 Ntama mingi ve lukutakanu ya distrike 2013 ta yantika. Kisalu ya ngolo me salama sambu na kuyidika manaka yina ke wakana ti bampusa ya bampangi ya nsi-ntoto ya mvimba. Keti nge me yilama sambu na kuvanda na bilumbu yonso tatu ya lukutakanu? Mambu mingi lenda katulaka muntu dikebi na ntangu ya balukutakanu ya nene; yo yina, yo lenda lomba kutula dikebi ya mingi na manaka. Sambu bitini ya lukutakanu ya distrike ke vandaka nda kuluta balukutakanu ya dibundu, beto fwete landa kutula dikebi na nsungi mosi ya nda. Diaka, nzietelo mpi mambu ya nkaka lenda lembisa beto. Inki ta sadisa beto na kutanina dikebi na beto sambu na kuwidikila mpi kulonguka?—Kul. 31:12.
2. Inki mutindu beto lenda yidika ntima na beto sambu na manaka ya lukutakanu ya distrike?
2 Na Ntwala nde Lukutakanu ya Distrike Kuyantika: Bo ke tulaka manaka ya lukutakanu ya distrike na site Internet na beto, www.jw.org; yo ke vandaka ti bantu-diambu ya badiskure yonso mpi verse mosi to zole ya mfunu sambu na konso diskure. Kana beto ke sadilaka Internet, kutala bansangu yai na ntwala ta sadisa beto na kuyidika ntima na beto sambu na kulanda mambu yina bo ta longa. (Esd. 7:10) Na nkokila ya Lusambu ya Dibuta, keti beno lenda tadila manaka ya lukutakanu ya distrike na mpila nde bantu yonso ya dibuta na beno kuvingila yo na kiese?
3. Inki ta sadisa beto na kuwidikila na dikebi yonso?
3 Ntangu Lukutakanu ke Salama: Kana mpila kele, kwenda dezia na WC na ntwala nde manaka kuyantika. Kanga telefone na nge sambu ntangu bantu ta binga to ta tindila nge bansangu, yo katula ve dikebi na nge, to sambu yo pusa nge ve na kutindila bantu bansangu ntangu lukutakanu ke salama. Kana nge ta bika telefone na nge ya kukangula, tula yo na vibreur to na silencieux sambu na kuvwalangasa ve dikebi ya bantu ya nkaka ntangu bo ta binga nge. Kana nge ke sadila ba-apareyi bonso tablet to ordinatere ya fioti, sadila yo na mutindu yina ta katula ve dikebi ya bantu ya nkaka. Kusosa ve kudia na ntangu lukutakanu ke salama. (Lo. 3:1) Talaka mutubi na dikebi yonso. Ntangu bo ke tanga verse mosi, landa na Biblia na nge. Baka ba noti ya nkufi.
4. Inki mutindu bibuti lenda sadisa bana na bo na kuwidikila mpi kulonguka?
4 Beto ke zolaka mpi nde bana na beto kuwidikila mpi kulonguka. Bingana 29:15 ke tuba nde: “Mwana yina ke landaka nzila na yandi mosi ke pesaka mama na yandi nsoni.” Yo yina, yo kele mbote nde mabuta kuvanda kisika mosi; mpidina bibuti lenda zikisa nde bana na bo ke tula dikebi na manaka, kansi bo ke solula-solula ve, ke tinda ve ba nsangu na telefone to ke tambula-tambula ve. Ata bo kele ntete bana ya fioti mpi bo lenda bakisa ve malongi yonso, bibuti lenda longa bo mutindu ya kutula dikebi mpi kuvanda mpima.
5. Sambu na nki yo kele mfunu na kutadila diaka manaka, mpi inki mutindu beto lenda sala yo?
5 Konso Kilumbu na Nima ya Manaka: Kuvutuka ve na nzo na retare. Lala na ntwala sambu na kupema mbote. Kutadila diaka mambu yina nge waka ta sadisa nge na kuyibuka yo na nsungi ya nda. Yo yina, yo ta vanda mbote nde mabuta kubaka mwa ntangu konso nkokila sambu na kutadila manaka ya lukutakanu. Kana nge ke lutisa ntangu ti banduku, nge lenda baka banoti na nge mpi kutadila kumosi ti bo ngindu mosi to zole yina sepedisaka nge mingi. Ntangu nge ke vutuka na nzo na nima ya lukutakanu ya distrike, nge lenda baka mwa ntangu na nkokila ya Lusambu ya Dibuta sambu na kutubila mutindu beno lenda sadila bangindu yina na dibuta. Konso mposo, nge lenda sala manaka sambu na kutadila diaka kitini ya mukanda ya mpa yina basikaka na lukutakanu.
6. Keti kukwenda kaka na lukutakanu ya distrike me lunga? Tendula.
6 Lukanu ya feti ke lunganaka kana bantu media madia yina bo lambaka mpi yo me sadisa bo. Beto lenda tuba mutindu mosi sambu na madia ya kimpeve yina beto ta baka na lukutakanu ya distrike. Beto lenda bakila yo mpenza mambote kana beto landa lukutakanu ya mvimba, kuwidikila mbote-mbote mpi kusadila mambu ya beto ke longuka.