“Vukisa Bantu”
1. Inki mutindu balukutakanu ya distrike mpi ya bansi mingi me fwanana ti lukutakanu ya mfunu yina bantu ya Izraele salaka ntangu fioti na nima ya kubasika na Ezipte?
1 Ntangu fioti na nima ya kubasika na Ezipte, Yehowa pesaka Moize ntuma ya ‘kuvukisa bantu’ na Ngumba ya Sinai sambu bo wa mambu na yandi na mpila nde bo tina yandi boma mpi bo longa bana na bo banzila na yandi. (Kul. 4:10-13, NW) Yo vandaka kibeni dibaku mosi yina bantu vilaka ve mpi yo kumisaka lukwikilu na bo ngolo! Na bangonda yina ke kwisa, bansadi ya Yehowa ta vukana na balukutakanu ya distrike mpi ya bansi mingi sambu Yehowa kulonga bo. Inki beto fwete sala sambu na kubaka mpenza mambote na lukutakanu yai?
2. Inki beto fwete sala sambu na ‘kuvanda ya kuyilama’ na lukutakanu ya distrike?
2 “Vanda ya Kuyilama”: Yehowa lombaka bantu ya Izraele na ‘kuvanda ya kuyilama’ sambu na lukutakanu ya mfunu yina salamaka na Ngumba ya Sinai. (Kub. 19:10, 11, NW) Mutindu mosi, yo ta lomba nde bantu yonso yina ta kwenda na balukutakanu ya nene mpi bayina ta sala masolo kuyilama mbote-mbote. Mu mbandu, yo ta lomba nde bantu mingi kubaka konzie na kisalu na bo. Ziku mambu na nge me fwanana ti ya Nehemia. Yo lombaka nde yandi bikisa kisalu na yandi ya kupesa Ntotila Artazeresesi malafu sambu na kukwenda na Yeruzalemi mpi kutunga diaka bibaka na yo, kansi yandi zabaka nde ntotila lenda buya. Nehemia salaka kisambu mpi na nima, yandi lombaka ntotila nswa na kikesa mpi na luzitu yonso. Ntotila pesaka yandi nswa ya kukwenda mpi nkutu yandi pesaka maboko na kisalu ya kutunga! (Neh. 2:1-9) Katula kulomba konzie na mfumu na nge ya kisalu, keti nge me zikisa bangidika ya ke tadila nzietelo mpi kisika ya kulala? Bankuluntu ta vanda ti kiese ya kusadisa konso muntu yina lenda vanda ti mfunu ya lusadisu. Kudibongisa sambu na kukuma na ntwala na lukutakanu mpi vanda ya kuyilama sambu na ‘kutula dikebi mingi kuluta’ na mambu yina nge ta wa.—Baeb. 2:1.
3. Inki ta sadisa beto na kuyidika ntima sambu na lukutakanu ya distrike?
3 Mutindu ya nkaka ya mfunu ya kudibongisa ke tadila kuyidika ntima na beto sambu na kuwidikila mpi na kulonguka. (Esd. 7:10) Bo ta tula manaka ya lukutakanu ya distrike na ntwala na site Internet na beto jw.org mpi manaka yango ta vanda na bantu-diambu ya badiskure yonso ti verse mosi to baverse zole ya mfunu. Manaka yina ta vanda ti malongi ya mfunu yina beno lenda tadila na nkokila ya Lusambu ya Dibuta mwa bamposo na ntwala nde lukutakanu ya distrike kusalama. Bansamuni ya nkaka ke niemaka manaka mpi ke sadilaka yo sambu na kubaka banoti ya nkufi ntangu lukutakanu ya distrike ke salama.
4. Inki mutindu bibuti lenda sadila lukutakanu ya distrike sambu na kulonga bana na bo?
4 ‘Longa Bana na Nge’: Lukanu mosi ya lukutakanu yina salamaka na Ngumba ya Sinai vandaka nde bantu ya Izraele ‘kulonga bana na bo.’ (Kul. 4:10) Lukutakanu ya nene ke pesaka bibuti dibaku ya kuluta mbote ya kulonga bana na bo. Bibuti fwete vanda kisika mosi ti bana na bo ntangu lukutakanu ke salama mpi kusadisa bo na kutula dikebi. Na nsuka ya konso kilumbu mpi na lusambu na bo ya dibuta, mabuta lenda tadila manaka ya lukutakanu.
5. Inki mutindu beto ta baka mambote ntangu beto ta kwenda na lukutakanu ya nene yina ke kwisa?
5 Lukutakanu ya mfunu yina salamaka na Ngumba ya Sinai sadisaka bantu ya Izraele na kumonisa ntonda na dibaku ya nene ya bo vandaka na yo ya kuvanda bansadi ya Nzambi. (Kul. 4:7, 8) Bo me yidika mpi lukutakanu na beto ya nene yina ke kwisa sambu beto baka mambote ya mutindu mosi. Na bilumbu tatu ya lukutakanu, yo ta vanda bonso nde beto me basika na nsi-ntoto ya Satana mpi beto ta baka kikesa na kimpeve mpi ta sepela ti kinduku ya mbote na paladisu na beto ya kimpeve. (Yez. 35:7-9) Sambu kilumbu ya Yehowa me finama, bika beto konda ve na lukutakanu yai sambu na kupesana kikesa!—Baeb. 10:24, 25.